سهردێرهكان
- لە سێدارەدانی عەجاج و لە گۆڕنانی دۆسێی جێنۆساید ……………………………هۆمەر محەمەد
- خراپەکاریی سادەکردنەوە: ستراتیژی سادەکردنەوەی تاوانەکانی جینۆساید لای دەستەبژێری سیاسی کورد. ……………….. ئیبراهیم سادق مەلازادە
- عجاج التكريتي بين عقوبة الدنيا وحساب الآخرة. د. سەربەست نادرعبدول
- جینۆسایدی کورد و جینۆسایدی جولەکە. -………………… سروە نوری ئەزیز
- لە نێوان قەفەسی ئایخمان و حکومەتی فەرامۆشیدا. – …………………. د.کامەران محەمەد
پهیامی گۆڤاری ئەنفالستان لە (٣٠) ههمین ساڵیادی تاوانی کیمیابارانی سێوسێناندا.
پهیامی گۆڤاری ئەنفالستان
لە (٣٠) ههمین ساڵیادی تاوانی کیمیابارانی سێوسێناندا.
ئەمرۆش لە مێژووی مرۆڤایەتیدا دەبوو هەر یادەوەری تاوانی کیمیابارانکردنی سێوسێنان بووایە كە ئابروی مرۆڤایەتی تێدا لەكەدار بوو،کەچی هەرئەمڕۆ فرۆکەکانی رژێمی تورکیا ئاسمانی هەرێمیان بەزاندو چوار گەنجی مەدەنیان پێکەوە شەهیدکرد کەچووبوون هەوایەکی پاک هەڵمژن! ئەمرۆ دەبوو هەموو دنیا لەبەرانبەر گازبارانی سێوسێنان هەست بەشەرم بکات، لەبەرئەوەی كۆمەڵگەی مرۆڤایەتی و ئەنجومەنی ئاسایشی نێودەولەتیو رێكخراوی نەتەوەیەكگرتووەكان وەک چۆن لەبەرانبەر لە شکرکێشی تورکیاو چەتەکانی ئەلقاعیدە بێدەنگ بوون، ئاوا لە کاتی ئەنفال و گازبارانی شارۆچکەو گوندەکانی باشوری کوردستانیش بێدەنگ بوون و چاویان لە درندایەتی دەوڵەتی عێراق و رەفتاری سەربازو ئەفسەرەكانی درەندەترین رژێمی ستەمكاری سەدەی بیستەم پۆشی.
هەرئەوسا تاوانی كیمیابارانکردنی هەڵەبجەو گوندەكانی تری كوردستان هەر ئابروی بەعسی نەبرد، بەڵكو پەردەی لە سەر روخساری ڕێکخراوهکانی مافی مرۆڤ وجاڕنامه جیهانیەكانی قەدەغەكردنی تاوانی جینۆسایدو قەدەغەكردنی چەكی كۆكوژی هەڵماڵی. لەپێش هەموویانەوە ئەنجومەنی ئاسایش كە ئابڕوی مرۆڤایەتی بە قوربانی رژێمێکی تۆتالیتارو ستەمكار كردو هەموو ڕێکهوتننامه نێودهوڵهتیهکانی پێشێلکردو كردیە قوربانی، بەرژەوەند یە ئابوریەكان.
بۆمبارانكردنی گوندی سێوسێنان بەگازی كیمیاوی، کە هەرلەجێدا ٦٩ کەس گیانیان لەدەستداو نزیکەی ٤٠ کەسیش بریندار بوون، بەتەنها لەسۆنگەی دكتاتۆرییەتی ڕژێمی بەعسەوە نەبوو، بەڵكو بە شێكیشی لەسۆنگەی بێدەنگی كۆمەڵگەی عێراقیو كۆمەڵگەی نێودەولەتیەوە بوو، بۆیە دەشێت بڵێین سێوسێنانیش قوربانیەكی تری بێدەنگی بوو، چونكە ئەو راستیە ساغ بووەتەوە كە بێدەنگی هۆكاری سەرەكی دروستبوونی دەولەتی ستەمكارو سەرۆك و دەسەڵاتداری دكتاتۆرە.
بەداخەوە ئەمرۆ لەكاتێكدا یادی تاوانە جینۆسایدیەكانی هەڵەبجەو سێوسێنان و یادەكانی راپەرینو نەورۆز دەكەینەوە، كە کۆمەڵگەی کوردی لەسایەی نەزمی نوێی جیهان و هەراو غەڵبەغەڵبی دیموکارسیدا هیچ لە مەینەتەکانی نەگۆڕان جگەلەوەی لەناوخۆدا توشی بە دەسەڵاتداری حزبی ستەمکارەوە بوو، روبەروی تاوانکاری و کۆمەڵکوژیش بووە، شەنگال بووە شانۆی روداوێکی تری کۆمەڵکوژی و بەکۆیلەکردنی ژنانی کورد لە بازارەکانی موسڵ و رەقەی پایتەختی خەلافەتی دەوڵەتی تیرۆرستی داعش لە عێراق و سوریا . کەچی تۆمەتبارانی جێۆسایدی کورد جگەلە کەمینەیەکی زۆرکەم لە سەرانی بەعس هەموویان بە ئاشكرا داڵدەدراون لە هەرێمی کوردستان و لەعێراق پلەوپایەیان پێدراوەتەوە، یاخود لەناو ریزەکانی داعش و بەرەی نوسرەی سەربە ریكخراوی قاعیدەی تیرۆرست فەرماندەو ئەمیرن کە ئەمرۆ ئەو رێکخراوە تیرۆرستیە بەناوی جیاجیاوە دەوڵەتی تورکیا باربۆۆیان دەکاو بەهەموو شێوەیەک هاوکاری دەکرێن و بەپشتیوانی ناتۆ پەلاماری رۆژئاوای کوردستان دەدەن، لەشکرکێشی بۆسەر شاری عیفرین بەڵگەیەکی ئاشکرای ئەو پشتیوانیەو دورویی وڵاتە زلهێزەکانە . لەكاتێكدا بەرەو رووی ئەم یادانە دەبینەوە كەخوێنی ترلەجەستەی ئەم میللەتە دەرژێ و لە شەنگال و عیفرین پەلاماری کورد دەدرێتەوەو هێشتا خوێنی بەکۆمەڵکوژراوانی شەنگال وشک نەبوونەتەوە، و خوێنی شەهیدەلاوەكان بەسەرشەقامەكانی شارۆچکەی شەنگالەوە مابوون، کە پەلاماری کۆبانێ درایەوە، لەوەش شەرمەزاری تر ئەوەیە بكوژانی منداڵانی هەرێمی عیفرین، بەهاوکاری ناتۆو دەوڵەتی روسیاو تورکیای شۆفێنی بەپێشچاوی ئەنجومەنی ئاسایش و ڕێکخراوەکانی مافی مرۆڤەوە ئەنجام دەدرێین بەبێ ئەوەی شەرمی ئەوە بیانگرێت پروپاگەندەی ئازادیو دییموكراسی دەكەن.. وەك بلێی كوشتنو برینداركردنی رۆڵەكانی ئەم گەلە سوكایەتی نەبێت بە ئازادیو دیموكراسی جیهان و ئەوانیش کێشەی نەتەوەییان لەگەڵ کورددا هەبێت و گیانوخوێنی هاوڵاتیانی کورد هێندە بێ بەهابێت !.
بێگومان ئەمرۆبێت یان سبەی کوردیش ئەزموون لەم هەموو ستەمکاری وجێنۆسایدانە وەردەگرێ و چیدی بە خەیاڵی دیموکراسی ومافی مرۆڤەوە چاوەروانی بەهاناوە چوونی کۆمەڵگەی نێودەوڵەتی ناکات و ناوماڵی خۆی رێکدەخاتەوە، بەبێ ئەوەی ریگای تۆڵەو فاشیزم هەڵبژێرێت دەرچەیەک بۆ رزگاربوون دەدۆزێتەوە، ئەوسا ئەوەی دەدۆرێ هاوکارانی دەوڵەتە ستەمکارەکان و رێکخراوی قاعیدەی تیرۆرست دەبن.
