چیرۆکی ئەوگەنجەی لەنوگرەسەلمان باوكی لێ وون بوو
لە گوندی تەپەسەوزەوە بۆ نوگرە سەلمان
حیكایەتی ئەوگەنجەی لەنوگرەسەلمان باوكی لێ وون بوو
محەمەد سابیر
ئومید فتاح رۆستم لەسەروەختی ئەنفالەكانی ساڵی 88 دا تەمەنی 13 ساڵ بوو، كە پەلاماری ئەنفالی سێ گەیشتە سەر گوندەكەیان، جاشەكان بۆدلنەواییان پێیان ووتبوون، مەترسن حكومەت بە رەحمەو هەروا گەشتێكات پێدەكەن‌و بەشاردا گڕتان دەدەن‌و دەتان نێرنەوە، ئیتر ئومید خۆی بۆئەو گەشتە ئەفسوناویە ئامادەكردبوو، بەڵام چۆن گەشتێك لەگەڵ دایك باوكیدا لەگوندی تەپەسەوزەوە هەر ئەو سواركردنە بوو، ئیتر بەرەو كەمپەكانی كۆكردنەوەی قۆرەتوو تۆپزاو دوجاریش بۆ نوگرەسەلمان بەرێیانكردبوون، بەڵام هەر كە گەیشتبوونە قەڵای سەلمان زانیبویان گەشتەكەیان بۆ دۆزەخی ئەنفالكراوەكانە، ئەوەندەی بەبیری ئومید دێت جیاكردنەوە‌و پۆلێنكردنی پیاوان‌و ژنانە، ئەویان لەگەڵ دایكی‌و پیرەپیاوو پیرە ژنەكان دانابوو، ئیتر كە لای كردووەتەوە بەلای باوكیدا، باوك نەماو هەر ئەو ونەبوونە بوو كەس نەیزانی زەوی قوتیدا یان لێیان بوبە هەڵم‌ولەوساتەوەختەوە لە بەرچاویان وونبوو، ئیتر ئومێد بووە منداڵێكی تری دلشكاوی ناو قەڵای سەلمان، نە گەمەو یاری كۆڵانی ناو گوندو نەشوانی بەرغەل‌و نەچاوشاركێی شەوانی ئاوایی، نە ئامێزی باوك نەبوونەوە بەشێك لەژیانی منداڵی ئەو، بەڵكو لەناو ئاهو فرمێسكی پیرە ژن وپیرە پیاوەكانی نوگرەسەلمان‌و دواجاریش گەرانەوەیان بۆ گەرمیان، بوونە بەشێك لەژیانی تاڵ‌و مەینەتی، ئەوەندەی بە ئومید بڕا لەئەنفالدا تەنها ئەوەندە بوو بەخت یاوەری بوو، بە زیندوویی بمێنێتەوە‌و لەگەڵ عبدالقادر فتاح‌و فاتمە مەجیدی خەڵكی گوندەكەیان ” تەپە سەوز” دا بگەرێتەوە، بێگومان ئەویش بۆ ژیان نا بەڵكو بۆپەتپەتێنی رۆژگارو هەلگرتنی خەموحەسەرەتی رۆژگارە دڵڕەقەكانی دوای ئەنفال لە ئۆردوگایەكی ئەنفالنشیندا، كاتێك ئومیدو دایكی گەڕانەوە بۆ گەرمیان‌و باوكیان لەگەڵدا نەبوو، ئەوكاتە كاریگەری زیاتری ئەنفال بەسەریانەوە دەركەوت، ئیتر زانی گەشتەكەیان بۆ دۆزەخ بوو، ئومێد ئێستا گەنجێكی قەڵەوی ناتەندروستە، ئەگەرچی موچەی ئەنفالانەی باوكی وەردەگرێت، بەڵام كوا ئەو موچەیە باری خراپی دارایی خێزانێك ڕاست دەكاتەوە..كە لەگەڵ دایكی‌و برایەكیدا پێكەوە لە خانوویەكی هەناسە ساردی شاری كەلاردا دەژین؟
