سهردێرهكان
- دڵی ئەنفال دیدەیەکی تر لەلێدان کەوت
- تا دوای ساڵی ١٩٩١ ژنی ئەنفالكراو لە زیندانەكاندا مابوون ……………………… سمكۆسابیر
- مفهوم الإبادة الجماعية بين النظرية الأكاديمية والتمييز قراءة نقدية لمنشورات الأمم المتحدة ………..هومر محمد
- مەترسی ئەنفالکردنەوەی ئەنفال دادگایکردنی عەجاج. …………..ئیبراهیم شێخ وەسانی
- تاوانی ئەنفال بۆ نەوەکانت بگێڕەوە! با گۆپتەپە دووبارە نەبێتەوە… سروە نوری ئەزیز
دڵی ئەنفال دیدەیەکی تر لەلێدان کەوت
دڵی ئەنفال دیدەیەکی تر لەلێدان کەوت
ئەمرۆ پیاوێک لەگەرمیان کۆچی دوایی کرد. ئەم مەرگە تەنها مردنی فیزیکی پیاوێک نییە بەڵکو حەسەرەت و ئازاری قووڵی گەرمیانیەکانە وەک دۆسێیەک لە جێنۆسایدی کورد و ستەمی نەتەوەیی.
سابیر محەمەد مستەفا خەڵکی گوندی توکن سەربەناحێی سەرقەڵا و قەزای کفرییە ٣٨ ساڵی تەواو لەچاوەڕوانی هەواڵێکی هاوژین و کچ و کوڕەکانیدا بوو. ئەمرۆ ٢.٨.٢٠٢٦ دڵی شکاوی لەلێدان کەوت.
وەک وەفایەک بۆ ئەو باوکە ستەملێکراوە ئێمەش ئەم چەند دێرە بەئەرکی خۆمان و شکۆی ئەنفالکراوان دەزانین.
ئەمڕۆ، ۲ی ئابی ۲۰۲٦، دوای ۳۸ ساڵ لەهەڵگرتنی ئازارێکی بێئامان و چاوەڕوانییەکی کوشندە، مام سابیر محەمەد مستەفا ئەو باوکە کەڵەپیاوەی تەمەنێکی لەسەر پڕووسکەی داخی جگەرگۆشەکانی گوزەراند ماڵئاوایی یەکجارەکی کرد و گەڕایەوە لای ئازیزانی.
پێش تاوانی نەگریسی ئەنفال، ماڵی مام سابیر خێزانێکی گەورە و ئاوەدان بوو، خانەوادەکەیان ۱۱ سەرخێزان بوون. بەڵام دڕندەیی تاوانەکە ۹ ئەندامی ئەم خێزانەی (هاوسەرەکەی، ٥ کوڕ و ۳ کچی) بۆ زیندانەکانی بەعس و گۆڕە بەکۆمەڵەکانی باشووری عێراق ڕاپێچ کرد و بۆ هەمیشە لەیەکتری دابڕان و ئیدی ئامێزی باوکیان نەبینیەوە؛ تەنها کەسێک کە لە ئافاتی ئەنفال رزگاری بوو لەم خانەوادەیە ڕزگاریی بوو کاک (قادر)ی کوڕی بوو.
ئاخر ئاسان نییە مرۆڤ مەرگی سروشتیی ڕۆڵەیەکی ببینێت، چ جای ئەوەی بگاتە ئەوەی بە جارێک ۹ ڕۆحی شیرین و بێتاوانت لێ جیابکەنەوەو هەڵیاندەنە ناو دۆزەخی ئەنفالەوە. مام سابیر لەم ۳۸ ساڵەدا دۆزەخی بە چاوی خۆی بینی؛ هیچ کەس نەیزانی بێدەنگی ئەو پیاوە وەک خۆی بخوێنێتەوەو لێی تێبگات ئەو خەمە قووڵەی، چی برینێکی بەژان بوو وا لە دڵیدا دەکوڵا!
لە وێنەیەکیدا مام سابیری برینداری ئەنفال و رزگاربووی نوگرەسەلمان مامۆستا بەختیار ڕەئووفی باوک ئەنفالکراو و لەتیف فاتیح فەرج؛ لەماڵی مریەم، کە مۆزەخانەیەکە تایبەت بە ئەنفال کاتێک کە هێمن حەسیب گۆڤاری “تۆپزاوە”ی پێشکەش کردووە. هەر لەهەواڵی کۆچی دوایی ئەم پیاوە ئەنفال دیدەیەدا مامۆستا بەختیار ناوی تەواوی خانەوادەکەی مام سابیری نوسیوە.
ئەو زوڵمەی لەم پیاوەو هەزار پیاوو ژنی ئەم وڵاتەکرا، تەنها کورد بوون و خۆڕاگریی توانیوێتی بەپێوە ڕای بگرێ و ئەو هەموو ساڵە لەچاوەڕوانیدا بهێڵێتەوە.
ئێمەش بەناوی گۆڤاری ئەنفالستانەوە پرسە و هاوخەمیی قووڵی خۆمان بۆ تاقە کوڕەکەی و تەواوی خزمانی مام سابیری ئازارچەشتووی ئەنفال ڕادەگەیەنین. ڕیسوایی و شەرمەزاریش هەر بۆ ئەنفالچی و جاش و سەرشۆڕانی مێژوو، سەربەرزی مام سابیر و تەواوی شەهیدان و کەسوکاری ئەنفالکراوان دەمێنێتەوە.
زانیارییەکان لە بەریز مامۆستا بەختیار ڕەوف وەرگیراون
