ئێزدی نیم هۆمر محەمەد
ئێزدی نیم هۆمەر محەمەد
Homer muhamad
ئەمڕۆ ٣ی ئاب لەبەردەم خەمی قوربانیانی جێنۆسایدێکی تری نەتەوەیی و ئاینی داین، بەڵام کارەسات ئەوەیە لەیادەوەریدا خەمی بونیاتنانەوەی مرۆڤایەتیمان نەبێت و بەدانانی وێنەی چاوبەفرمێسک و گریانی قوربانییەکانی بسپێرین یاخود خۆمان بەوە دڵخۆش بکەین بەدەربرینێکی سۆزدارانە یان بەهەستێکی نەتەوەیی دەمارگیرانەوە یادمان کردوونەتەوە.
یادەوەری لەبنەڕەتەوە بۆ خۆدامەزراندنەوەو خۆبنیاتنانەوەیە، نەک بۆ گریان و شیوەن. ئەگەر ئەمڕۆ دونیای کوردی تەماشا بکەین دەبینین چەندە بێ باک و بێخەمە لە یادکردنەوەی ئەم تراژیدیایەدا. هەر ئێستا سۆشیال میدیاو میدیای کوردی، لێوانە لە بێهەستی و لەڕق و کینە ! ئەمانە توخمی دروستکردنی یادەوەریی نین بەڵکو بەرهەمهێنەرەوەی زەلیلین ئەوەش کارەساتێکی ترە.
ئەمرۆ یادی جێنۆسایدی ئێزدییەکانە، یادەوەریی تاوانێکە پڕە لە خوێنڕشتن و سەربڕین و کۆیلەکردنی ژن و بە سبییە کردن و دەستدرێژی سێکسی دڕندانە. کەچی هێندەی وێنەی عەجاج و باسی ئەو تاوانبارە و ناردن و نە ناردنی کۆمەک بۆ غەززە بابەتن، نە یادی جێنۆسایدی دوێنێ بارزانییەکان و نەهی ئەمڕۆی ئێزدییەکان جێگەی باس و بایەخ نین.! ئەمە نیشانەیەکی ڕوون و ئاشکرایە بە جەستەو ڕۆحی نەتەوەیەکەوە کە زیاد لە جارێک جێنۆسایدکراوە و هێشتا بێباکە لەچارەنوس وئایندەی خۆی ! نامەوێ تۆوی نائومێدیی بڕێژم و ئینگەیەک لە کۆمەککردن بە غەززەدا بکەم. بەڵکو بابەتێکە بۆ تێڕامان لەخود لە بوون لە چاکەکاری و بەخشندەیی و شکۆی مرۆیی و نەتەوەیی و لە کوردبوون.
ئەگەر تۆ تەنها دڵت بۆ (ئەنفال) ژان دەکاو نەفرەت لە جاش و جەلادەکان دەکەی ئەوا گومانم لە دڵ باشی و نەفرەتەکانیشت هەیە. چونکە یادەوەری بەنەفرەت لێکردن دروست نابێت. مرۆڤی ساخلەم دژی ستەمکارییە، نەک ستەمی لەسەر لایەک پێ ناڕەوا بێ و لە دژی یەکێکی تر ڕەوا. کەی ئەنفال شەنگالی بیربردیتەوە یان بە پێچەوانەوە ئەوا خەلەلێک لە بیرکردنەوەتدا هەیە. ئەگەر دژی جێنۆسایدبی و کوشتاری غەززە و هۆڵۆکۆست پێکەوە بەتاوان نەزانیت ئەوا کێشەیەک لە ویژدان و فیکرتدایە.
هەست دەکەم ئەم بێباکییە زۆر قوڵتر ڕۆچووە لەوەی دەیبینین، هەندێک تەواو خۆیان کوشتووە بۆ غەززە و لە کوشتنی نزیکترین مرۆڤەکانی تەنیشت خۆی لە هاونیشتمانی و هاودین و هاوزمانی خۆی بێباکە! هەندێکیش لەشینی ئەنفال و شەنگالدا بەباسکردنی غەززە دڕدۆنگ دەبێ. چونکە پێیوایە عەرەب سەرچاوەی نەهامەتیەکانێتی. بەگومانم لەوەی کەسێک بە پاساوی ئاینی دڵی بۆ کوشتاری نەتەوەکەی و هاونیشتمانەکەی نەسوتێ و شین و هاواری بۆ منداڵانی غەززە خۆ نواندن نەبێ. یاخود کەسێک هاتوهاواری بەجێنۆساید ناساندنی کوشتارەکانی نەتەوەی خۆی بێ و کوشتاری غەززە مووی نەجوڵێنێ !
مرۆڤی بەویژدان بەڕەفتارو گفتار دژی کوشتنە جا کوژراو هەرکەسێک بێ و هەر دینێکی هەبێ یان نەی بێت یان سەربەهەر نەتەوەو زمانێک بێت. مرۆڤ کە دژی فاشیزم بوو پێویستی بەوەنیە هاواربکات و نەفرەت بنێرێ چونکە بەڕەفتارو گفتارییەوە دیارە، ئەو مرۆڤانە توخمە فاشیستیەکەی ناو ناخی خۆیان کوشتووەو لەپێش هەمووانەوە فاشیزمی نێو ئاین و ئایدۆلۆژیاو حزبەکەی خۆی ڕەتدەکاتەوە، بەهیچ پاساوێک ڕەوایەتی بەهیچ کوشتارێک نادات.
مرۆڤی بەویژدان بەوەدا دەرناکەوێ چەندێک دەبەخشێت بەڵکو بەوەدا دەردەکەوێت بۆ دەبەخشێت ؟ چۆن دەبەخشێت، لەبنەرەتدا بەخشین بۆ ڕیا نییە بەڵکو بۆ ئەوەیە مرۆڤ لەسەر پێی خۆی ڕاوەستێ نەک چاو بەرەژێری بەخشندە نەبێت.
ئاخر هەندێک هەڵوێست و ڕەفتارو گفتار زەق بەبەرچاوانەوەن، ئەوەی بۆ خۆنواندنە کاتێک لە یادی کۆمەڵکوژی ئێزدییەکاندا دەڵێت (منیش ئێزدیم) هاوسۆزی بۆ ئێزدی پێوە دیارنییە بەڵکو بۆ خۆ نواندنە، یاخود لە سۆنگەی ئێزدییەکانەوە دەیەوێت ئامانجێکی کەسی یان سیاسی بپێکێت بۆیە هێندەی لە ڕقی لەلایەنێکی دژە ئێزدییە هێندەش پێیەوە دیارە کەخەمەکە ئێزدی و هاوسۆزیی بۆ ئێزدییەکان نییە.
کاتێک ئیخوانییەک بەهات و هاوار بێگوێدانە مەینەتی ئێزدییەکان کۆمەک بۆ غەززە کۆدەکاتەوە هێندەی بانگەشە سیاسیەکەی دیارە دوو هێندە نیازە مرۆییەکەی وننە. دەنا بوغزاندنی نەیارە سیاسیەکانی بەتەنیشت غەززەوە نەدەکردە ئامانجی بانگەشە.
لە هەمووشی ناخۆشترو نامۆتر و بەئازارتر ئەوەیە، کە ئەم هەڵای کۆمەک ناردنە بۆ غەززە هیچی لەتێڕوانینی دونیای عەرەبی و ئیسلامی بەرانبەر ئێمەی کورد و تراژیدیاکانمان نەگۆڕیوە. نەک هەر ئەوەندە بگرە هیچ کات خەڵکی فەلەستین هێندەی ئێستا جنێویان بەکورد نەداوە و لە دژی کورد بەشان و باڵی سەدام و ئەردۆگانیان هەڵنەداوە.. هەر ئەمڕۆ گەنجێکی عەرەب لە بەریتانیا بەڕیشێکی درێژی داعشییەوە لە ڤیدیۆیەکدا دەیگوت: کورد ئیسلام نین و بەپێی قورئانیان لەگەڵدا بکەن کە بینیتانن خوشک و ژنیان بگرن و سەبییان بکەن” !! بەڵام هێشتا نابێت مرۆڤبوون و کلتورمان ڕێگە خۆش بکات بۆ ڕقبوونەوە لە عەرەب، بەڵکو هەر هاوکارییەک ڕەوایە کە خەڵکی ستەملێکراوی غەززە پێویستیان پێیەتی و بەرێزەوە لێمان قبوڵ دەکەن.
ئەم نمونەیەم لەیادی سەبی کردنی خوشک و ژن و کچەکانمان لە شەنگال هێنایەوە. هاوکات ئەو گەنجە ئێزدییەم بیرکەوتەوە کە چوارساڵ لەمەوبەر لەسەیرانگایەکدا بینیم کاری دەکرد، کاتێک بەنیازی دڵنەوایی و هاوسۆزی لێمپرسی تۆ ئێزدیت ؟ بەشەرمێکەوە گوتی نا ئیزدی نیم.. تێگەیشتم ئەو گەنجە لەژینگەیەکدا دەژی کە ئێزدی بوون تیایدا رێزلێنەگیراوە.
لەمڕۆدا ناڵێم ئێزدییم، بەڵام هەموو ڕۆژێک ئێزدیی بوون رێزلێگیراوە
