دەتوانین نەوەیەک پێبگەێنین کە شکۆی پێ لەپێش هەرشتێکی ترەوە بێ …………..نەریمان ئاغالی
دەتوانین نەوەیەک پێبگەێنین کە شکۆی پێ لەپێش هەرشتێکی ترەوە بێ
نەریمان ئاغالی
نەمانتوانی سزای تاوانبارانی ئەنفال بدەین، بەڵام دەکرا بە دەستخۆشی و سوپاسی ئەوانە کە لە خاکفرۆشی و گەلفرۆشی و گەندەڵی و ناشرینییەوە نەگلاون نەوەیەکی تر پێبگەێنین!
ئەو هۆکارە سەرەکیەی وایکرد کە ئێمە لە وێستگە جیاوازکانی مێژووی خۆماندا شکستی گەورە و پڕنەکراوە ببینین، ڕێک ئەو خاڵەیە کە نەمانتوانی کەسانی بێ هەڵوێست و بەهەڵوێست لە بەهای کۆمەڵەیەتی و یاسای نەنووسراودا لێکدی جیابکەینەوە!
بێگومان ئێمە ئاوا ناتوانین نەوەیەک بۆ ئایندە پێبگەێنین کە شکۆی پێ لەپێش هەرشتێکی ترەوە بێ، بۆ ناتوانین؟
وەڵامەکە ئاسانە:
چونکە جیاوازیی کەسێک، کە جاش و خیانەتکار و گەندەڵە لەگەڵ کەسێکدا کە بە ڕاستگۆیی ماوەتەوە لە واقیعی ژیاندا نەکراوە!
نووسین و قسە ئاسانە، وەلێ لە واقیعی کۆمەڵایەتی ئێمەدا کێ لەسەر گەندەڵی و جاشایەتی و ناپاکیی سزای قورسی کۆمەڵایەتی و کولتووری دراوە کە ئەو سزایە کاریگەری خستبێتە سەر چۆنیەتی ژیانی؟
بە پێچەوانە کەم نین ئەوانەی پێگەی کۆمەڵایەتی و شێوەی ژیانیان بەرزتریش بۆتەوە لەبری ڕووی ئەوەیان نەبێ خۆپێشان بدەن!
دادگایکردن و سزادانی تاوانبارانی ئەنفال لە دەسەڵاتی ئێمەی هاوڵاتیدا نەبوو، دەی گرنگترین هەنگاو دوای ئەوەیە ئەوەبوو “دەستخۆشی و سوپاسی ئەو کەسانە بکرێ کە بۆ ئەو پرسە بە ڕەنجی شانی خۆیان و بێ گوێدانە بەرژەوەندی تایبەت، خۆیان ماندوو کردووە و لەو بارەوە تێکۆشاون”.
ئێ نە بە یاسای نووسرا و وە نەنووسراو ئەو کەسانەی کە لە ڕابوردوودا تاوانیان ئەنجامداوە سزا نەدراون، دەی مادام جیاوازییەک لەنێوانی کەسێکی بێهەڵوێست و بەهەڵوێستدا نەکراوە، ئەی چۆن بەهای باڵا بە نەوەی داهاتوو پێشان بدەین؟
بەڕاست کاتێک گەنجێک نەتوانێ نمونەی باڵا و پاراو لە ڕەفتاری شکۆمەندانە ببینێ، چۆن دەتوانیت فێری بەهای باڵای بکەین؟
چۆن دەتوانین پێی بڵێین: ئەمە بەهای باڵای نێو کۆمەڵگەی ئێمەیە، ئەم جۆرە لە مامەڵە ڕێزی لێ دەگیرێ و وەکو نمونە چاوی لێدەکرێ!
دەی بە پێچەوانەوە کاتێک جاشیەتیی و گەندەڵکاریی و خراپبەکارهێنانی دەسەڵات و بەرپرسیاریەتی دەبێتە کولتوور واتە:
ئەوە هیچ بەرپرسان لەسەر تاوانی گەندەڵی سزا نادرێن، لەوەش خراپتر ئەوەیە کە کەس لە ئەنجامدانیدا شەرم ناکات، ئیدی گەنجێک بۆ ناچاربێ خۆی ماندوو بکات و بەڕێگایەکی پاک و دروستی دوروودرێژ خۆی پێبگەێنێ، لەکاتێکدا ڕێگا کورتەکەش لەنێو کۆمەڵگەدا هەمان بەهای پێ بدرێ؟!
سەنگ و بوونی بەهای گشتی لە نێو هەر کۆمەڵگەیەکدا نەک هەر گرنگە، بەڵکو پێویستیەکی سەرەتاییە بۆ بنیاد و مانەوەی کۆمەڵگەیەک.
هەر ساڵیک لە بیرکردنەوە و گەڕانەوە بۆ تاوان و جینۆسایدی ئەنفال بەرانبەر بە ئێمەی کورد، بەخۆم دەڵێم:
جورئەتی دەوێ بیر لە پرسی ئەنفال بەبێ هەوڵ و تێکۆشانەکانی هۆمەر محەمەد بکەیتەوە!
سوپاس بۆ هەموو ماندووبوون و تێکۆشانەکانت کە لە نەبوونی دەسەڵاتێکی بەرپرسیاردا بە ماندووبوون و ژیانی تایبەتی خۆت بەشێکت لەو بۆشاییە پڕکردەوە.
ئەو نمونە و دەیانی تر لەسەر ئەو بنەما زانستیەی کە باسی هەر شتێک بکرێ ئەوە زیاتر و زیاتر دەبێ، لە خوێندنگە و کایەکانی تری ژیاندا هێند زەقبکرێنەوە، کە گەنجان خەون بەو سەرمایە مەعنەوییەوە ببینن، نەکو تاوان و گەندەڵی و جاشایەتی و کەسایەتی جنێودەر بکرێنە نمونە و ئەوانە ئاسایی ببیندرێن!
