ئەنفال و شۆرش و چیرۆکی حاجی حەبیب
ئەنفال و شۆرش و چیرۆکی حاجی حەبیب
حاجی حەبیب کەسایەتیەکی دیاری ناوچەی گەرمیانە، بەرلە پەلاماری ئەنفالی گەرمیان، دانیشتووی ئاوایی بوو لە ناوچەی داوێ، ئەو خێزانەش وەک زۆربەی گەرمیانییەکان قوربانی زۆریان داوە، حاجی حەمید دوو کوڕی لەسەنگەری بەرگریدابوون و خانەوادە و کەسوکارەکەشی لە قۆناغی سێی تاوانی ئەنفالدا لەلایەن جاش وجەیشەوە گیران و ئیترجارێکی تر چاوی پێیان نەکەوتەوە.
ئەم پیرەمێردە ٣٥ ساڵی تەواو بە ئازاری دابڕان و ئەنفالکردنی ئازیزانیەوە تلایەوەو ژیانێکی سەختی لە هەژاری و چاوەڕوانیدا گوزەراند، رۆژی ٧ی پوشپەڕی ٢٠٢٣ بەتاسەی ئازیزانیەوە کۆچی دوایی کردو لە چاوەڕوانیدا سەری نایەوە.
هاوڕێ پێشڕە لەبارەی ئەم پیاوەوە دووچیرۆکی گرنگی یاداشتکردووە، هەردوکیان بۆمن مایەی تیڕامانن. چونکە نەک هەر دونیابینی ئەوسای گوندنشینەکانمان نیشان دەدات، بەڵکو وێنەیەکی ڕونی ئەو هەلومەرجەشمان نیشان دەدات، کە ئەم گوندنشینانەی تێداژیاون. ئەویش لەزاری کەسێکی ترەوە نوسێوێتی:
کاک هیوا تاهیر بۆی گێڕامەوە:
یەکەمیان : ساڵی ١٩٨٣ بۆماوەی ٦ مانگ لەلایەن برادەرانی یەکێتی نیشتیمانی کوردستانەوە دەگیرێت، لەبەرئەوەی قسەی بە شۆڕش و پێشمەرگە کردوە.
کاک عومەر فەتاح لەکاتی لێکۆڵینەوەدا پێیدەڵێت: بۆ قسەت بە شۆڕش کردوە.. مام حەبیب لەوەڵامدا دەڵێت قسەم بەشۆڕش نەکردوە ڕێنمایم کردوون.. من وتوومە شۆڕش نەتوانێت خۆی بژێنێت و خۆراک و پۆشاکی لەسەرسفرەی خەڵک بێت چۆن دەتوانێت میللەت بژێنێت ؟
ئێوە خۆتان پێ وەخاوەن نەکرێت، خەڵکتان چۆن پێ بەخێو دەکرێت.. ئێوە شەڕێک ئەکەن و خۆتان ئەشارنەوە.. ئێمە هاین لەبەردەم تۆپ و تەیارەی حوکمەتداو ماڵمان وێران ئەبێ و گورگان خوارد ئەوین.. قسەکەی مام حەبیب ڕاست دەرچوو هەر خەڵک گورگان خواردووبوو.
دووەم : مام حەبیب خاوەنی ڕانە مەڕێکی زۆربوو، لەسەرو بەندی ئەنفالدا لەناو ڕانەکەیدا گیسکێک دیاری دەکات بیکاتە خێر، بەڵام قۆناغی سێی تاوانی ئەنفال هەموو مەڕوماڵاتەکەی بەتاڵانی دەبرێت.. دوای چەند مانگێک مام حەبیب بۆ ڕەواندنەوەی خەم و مەراقی دابڕانی ئازیزانی و بەتاڵان بردنی ڕانە مەڕەکەی.. هاتوچۆی مەیدانی ئاژەڵانی خورماتوو دەکات.. ڕۆژێک لە مەیدانەکە ئەو گیسکەی بۆ خێردای نابوو دەبینێت وا بەدەستی هاوڵاتیەکی عەرەبەوەو هێناویەتی بۆ مەیدانەکە بۆ فرۆشتن.. مام حەبیب خۆی لێ نزیک دەکاتەوەو بە کابرای عەرەب دەڵێت: بەچەند دەیفرۆشی.. کابرای عەرەب داوای (١٥٠) دیناری لێ دەکات.. مام حەبیب تەنها (٧٥) دیناری پێ دەبێت.. دەڵێت نایفرۆشی بە (٧٥) دینار.. کابرای عەرەب بەلوت بەرزیەوە دەڵێت درهەمێکی کەمبێت لە (١٥٠) دینار نایفرۆشم.. مام حەبیب جگە لە هەناسەساردی هیچی تری پێ ناکرێت و لەبەر خۆیەوە دەڵێت ڕاستە پێشینان وتویانە ( ماڵ لە خاوەن ماڵ حەرامە) ؟
