میوانێکی جوان
میوانێکی جوان
دوارۆژی مانگی ١١ی ٢٠٢١ گەنجێکی جوان و بەئەدەب میوانم بوو، سەرەتا من نەمناسی، بەڵام ئەو زوو خۆی ناساندو وتی : من منداڵ بووم تۆ هاتوویت بۆ ماڵمان و دیدارت لەگەڵ باوکمداکردووە، تۆ من ناناسیت بەڵام ئێمە قەت تۆ لەبیر ناکەین .. میوانەکەم کاک “فەرهاد حەسەن سێدەری بوو، تەنانەت ئەوەشی بیربوو کە من لەکاتی دیدارەکەمان داوام کردووە ئەو منداڵە دیدارەکەمان تێکنەدات و ئەوەندە بەبەردەم کامێراکەدا هاتووچۆ نەکات.ساڵی ٢٠١٢ لەگەڵ هاوڕێی ئازیزم د. فازل موراد بەدوای چیرۆکەکانی ئەنفالدا چوین بۆ دۆڵی جافایەتی، یەکێک لەوگوندانەی دیدارمان تێداکرد سێدەر بوو. کە لەئەنفالدا زیانی گیانی زۆری بەرکەوتووە. یەکێک لەوکەسانەش مام حەسەن سێدەری بوو کە لەعەسرێکی درەنگدا چیرۆکی خۆی بۆ گێڕامەوەو بەڤیدیۆ تۆمارم کرد. بەداخەوە فەرهاد هەواڵی مەرگی باوکی (مام حەسەن سێدەری) پێڕاگەیاندم ئەو پیاوەی دیدارم لەگەڵدا سازکردبوو، رۆحی شادبێت.
خوێنەری بەرێز لەکۆتاییدا بڕوانە دیدارەکەی من و مام حەسەن سێدەری کۆچکردوو . بەهیوام کاتی بینینتان هەبێت.
وێنەکان : یەکەم منداڵانی گوندی سێدەر- رۆژی ١٢/١/ / ٢٠١٢ لەناویاندا فەرهاد حسەن گەنجە جوانەکەی تێدایە، جل قاوەییەکە، پەرۆیەکی بەسەرەوەیە.
دووەم : فەرهادو من رۆژی ٣٠/١١/٢٠٢١ سلێمانی.
