کاتێک باوەڕو ئەخلاق نەما ………….هۆمەر موحەمەد
کاتێک باوەڕو ئەخلاق نەما ………………….هۆمەر موحەمەد
کاتێک مرۆڤ باوەرو مۆراڵ بەواتە ئینسانیەکەی لەدەستدات با کەسوکاری شەهیدو ئەنفالیش بێت، ئەگەر نەشبێتە درندە، دەبێتە هیچ وپوچترین و قێزەونترین بوونەوەر، نەرێز لە خۆی دەگرێ و نەلەشەهیدوئەنفالکراوەکەی، ئەوانە راستناکەن شەڕیان لەگەڵ دەسەڵاتداری کورد نیە بەڵکو شەڕیان لەگەڵ بەهای ئینسانە، رەنگە بەپاسەوانییەک بەبرێک پارە زۆر مەمنون بن، دەنا شەڕی ڕاستەقینە لەگەڵ دەسەڵاتداری کورد، شەڕە لەگەڵ بەعسیزم. هەرهیچ نەبێت دام ودەزگاکانیان پڕن لەکۆنەبەعسی.
لۆژیکی ئەنفال لە عێراق و کوردستان هێشتا وابەستەیەکی زۆری بە لۆژیک و بیرکرنەوەی بەعسەوە هەیە، مرۆڤ پەراوێزەو حزب و سەرۆک سەنتەرە، ڕاستە بەعس وەک دەسەڵات لەسەر شانۆی عێراق نەماوە، بەڵام کورد وتەنی لە کەوڵی ترو فۆرمیتردا ئامادەیە تەنانەت لەناو خانەوادەی قوربانییەکانیشدا، هەر تەنها بەسوک تەماشاکردنی مرۆڤی ئەنفالکراو ئەخلاقێکی بەعسیانەیە، بەعسیەکان کەسوکاری ئەنفالیان وەک پەراوێزخراوێک فرێدابووە تەنیشت مەرگەوە. ئایا لەجەوهەردا نەک لە روخساردا هیچ گۆڕاوە ؟ بیرکردنەوە و مامەڵەی حزبە سیاسیە کوردیەکان هەمان بەسوک تەماشاکردن نییە؟.
ئایا عێراقی دوای بەعس عێراقی هەمووانە؟ یان هی بنەماڵەکانە؟ ئایا دەسەڵاتدارانی عێراق و کوردستان بەکوردو عەرەبەوە بەسوننەو شیعەوە لەبەرانبەر تاوانی ئەنفال و هەڵەبجەدا هەست بەخەجاڵەتی وشەرم دەکەن؟ عەرەبەکان بەزمان وئاماژەی جیاواز جەخت لە پیرۆزی عەرەب و جەخەت لە عەرەبی بوونی عێراق ناکەنەوە؟ ئەمە هەمان لۆژیکی بەسوک تەماشاکردن و هەمان لۆژیکی ئەنفالە لە فۆرمی جیاوازدا.
لەهەمووان مەترسیدارتر دەسەڵاتداری کوردە کە سوکتر لە هەر شتێک تەماشای ژیان ومەرگی مرۆڤی کورد دەکات. لەکاردانەوەدا مرۆڤی کورد دوعای خێر بۆ سەدام دەکات! کارگەیشتە ئەوەی ئەمرۆ لەیادی هەڵەبجەدا لەداخی دەسەڵاتداری کورد دەنگی ناشاز بڵندبووەوە و گەردنی سەدام ئازاد دەکات.. ئەمە با کەسوکاری قوربانیش بێت شایانی گوێ لێگرتن نییە بەڵکو شایانی ڕیسواکردنە، چونکە بەرلەوەی سوکایەتی بەوهەموو خوێنە بکات شەقێک لەبەهای ئینسانی خۆی هەڵدەدات.
ڕاستە ئەمانە ئەگەر لەخۆرئاوابوایەن و دوعایان بۆ هیتلەربکردایە دەدران دادگا، چونکە لەوێ هەر قانون نیە بۆسزا لەڵکو خزمەتگوزاریش هەیە. لێرە وەک قانون نیە میدیاش وێرانە دەنا بەچ لۆژیکێک قسەی ئاوا شایانی سەرشاشەی تیڤی وناومیدیایە.
