ئەنفال دیدەیەکی تر کۆچی دوایی کرد
ئەنفال دیدەیەکی تر کۆچی دوایی کرد
بەفراو ڕەشید لەدایکبوی ساڵی ١٩٤٥ ە
خەڵکی گوندی عەزیزقادری سەربەناحێی سەرقەڵای کفرییە.
رۆژی ١٦/١/٢٠١٢ لە کۆمەڵگەی رزگاری- صمود دیدارم لەگەڵدا کرد. بەرلەوەی لێبپرسم بەرانبەر بەکامیراکەم گوتی : هەتا بەردی ئەلحەد دەنێنە سەرم ئەنفالم بیر ناچێتەوە.
بەفراو دایكی شەهیدێكی سەنگەرو (٤) كوڕ وكچی ئەنفالكراوە شەهیدەكەی ناوی عەدالەت و ئەنفالكراوەكەیشی ناوی (كەرەم) بوو، كچەكانیشی (ئاوات‌و گوڵەو محسومە) لە تۆپزاوا لێیجیاكرانەوەو ئیتر جارێکی تر چاوی پێیان نەكەوتەوە .
هێشتا ئەنفال نەگەیشبووە گەرمیان، بەڵام دەنگ‌و باسی ناخۆش لە دیوی قەرەداغەوە دەگەیشە گەرمیان وگوندنشینەکانی شپرزە دەکرد،رژێم بەتۆپی دورهاوێژ لەسەرقەڵای كفرییەوە تۆپبارانی دەكردو بێبەزەییانە بەسەرگوندەكاندا دەرۆیشتن‌و لە ئاوەدانییەك دەتەقییەوە. لە بۆمبارانێكدا لەسەرەتای مانگی ئازاردا بەفراو بە تۆپباران بریندار بوو، هێشتا برینەكەی تەربوو كە ئەنفال گەیشتە سەریان‌و دەستگیركران، هەر لەنزیک گوندەکەی خۆیاندا جەیش‌و جاش پێشخۆیانیاندان و بردیانن.بۆ قەلای قۆرەتوو، لەوێشەوە بۆ تۆپزاواو پاش چەند رۆژێک رەوانەكران بۆ نوگرەسەلمان‌و ماوەی شەش مانگ لەمەینەتیدا بوون ئینجا ئازادكران.
بەفراو هەرگیز ئەو دیمەنەی نوگرەسەلمانی لەبیرناچێتەوە كە حەجاج بە كیبڵ پیاوێکی كوشتووە.
لەو دیدارەماندا بەفراو قوڵ تەماشای دەکردم لەسەر خۆ پێیگوتم: هەرچەندە لەبەر بریندارییەكەم بەزەیی بەمندا دەهاتەوەو قەت لێینەداوم بەڵام بەبەرچاوی خۆمەوە پیاوێكی بەیەك كیبڵ كوشت
بەفراو دوای ماوەیەك بێدەنگی هەناسەیەكی ساردی هەڵكێشاو ئینجا ووتی : جاكێ لەوێ نەبوو ؟ گەرمیان گشتی لەوێ بوو، خەڵكێكی زۆری مردو هەرنەگەرایەوە، حمە خولە خەڵكی گوندی عەزیز قادر لەوێ مرد زۆر مردن ماڵ هەبوو سەرپاکیان تیاچوون‌و یەك كەسیان نەماوە، هەیە هەر پیرەژنێكیان ماوە لەبەر كەنەفتی موچەكەشیان وەرناگرێت.
بەفراو هەتا لەژیاندا بوو هەمیشە لەبیری كورو كەنیشكەكانیدابوو، دوای ئەوەی بە قوڵی چاوەكانی بڕییە ناوچاوم‌و ماوەیەك بەبێدەنگی وەستا ئینجا ووتی : هیچ كاتێك لەبیریان ناكەم زۆرجاریش كە دەخەوم دێنە خەوم، هەتا ئێستا چاوەروانی مێردەكەم‌و كورو كچە ئەنفالكراوەكانم دەكەم، تا ئەو رۆژەی بەردی ئەلحەد ئەنێنە بان لاشەم هەرچاوەروانیانم.ئەمە دوای قسەی بەفراوبوو.
بەداخەوە رۆژی ٤/٤/٢٠٢٠ کۆچی دوایی کرد، بە ناوی ماڵپەرو گۆڤاری ئەنفالستانەوە پرسەو سەرەخۆشی بۆکەسوکاری دەنیرین … رۆحی کۆچکردو شاد بێت.
