با قسەیەک بۆ دزیش بکەین . عومەر محەمەد
با قسەیەک بۆ دزیش بکەین .
عومەر محەمەد
کەیادی ئەنفال دێتە پێشەوە هەموو دەم لەدەسەڵاتداران و حکومەت دەکەنەوە، زۆر کەس دەبینم لەکەناڵەکانی ڕاگەیاندنەوە دەڵێن لەگەڵ سەردەمی بەعس (هیچ) جیاوازییەک نیە، یاخود دەڵێن : (هیچ) بۆ کەسوکاری ئەنفال نەکراوە، بێگومان ئەو قسانە هیچیان ڕاست نین، چونکە کەسوکاری ئەنفال لەسەردەمی بەعسدا لەبەردەم هەڕەشەی لە ناوچوونی یەکجاریدا بوون. ئەوانەی ناوکۆمەڵگاکانیش لە دۆخێکدا راگیرابوون کە کوردبوون لەبیربکەن.
کێ دەڵێت: هیچ نەکراوە؟ ئەوە ڕاست نیە، بەلای کەمەوە (زەوی و پارەی خانوو دروستکردنیان پێدراوە) موچەیەکیان هەیە جاکەم بێت یان زۆر ئەوەیان قسەیەکی ترە.
ئەوانەی فۆکسیان لەسەر حکومەتە (ئەنفال بەدونیا بناسێنێ، بەلای کەمەوە سەنتەری توێژینەوەو لێکۆڵینەوە)ی بۆ دروست بکات، هیچیان ڕاست ناکەن بە کەسوکاری ئەنفالکراوانیشەوە ئەوانە ئەگەر بیانویستایە ئەنفال بەدنیا بناسرێت بەکارەکانیان حکومەت ودەسەڵاتدارانیان ناچار دەکرد.. ئەگەر بیانویستایە رێز لە ئەنفالکراوەکانیان بنێن دەیانتوانی بە رێگای جیاواز رێزیان لێ بنێن.
فەرموون ئەوە ئەرزو ئەوە گەز، خۆیان چۆنیان پێباشەو چۆنیان بۆدەگونجێت با بەقەد توانای خۆیان، کارلەو دۆسێیە بکەن، کەسوکاری ئەنفالکراوان ئەگەر بیانویستایە بەشانوقۆڵی خۆیان بەبرێک لە موچەی ئەنفالکراوانیان ئەگەر لەقوروبەردیش بوایە دەیانتوانی خانوچکەیەک (سەنتەری توێژینەوەو لێکۆڵینەوە) ناڵێم تەنها خانوچکەیەک بۆ کۆکردنەوەی وێنەی قوربانیانی ناوچەکانیان و گوندەکانیان دروست بکەن کە لەئەنفالدا بێ سەروشوێن بوون.
بەڵام ئەفسوس هەرگیز ئەم پەرۆشییەم نەدیت ! ئەم یادکردنەوانە هەر قابیلی کوڕان وکیژانی رۆژئاوای کوردستانە. ئەوەی گۆرستانی کۆبانێی دیبێ و یادی رزگارکردنی کۆبانێی دیبێت دەزانێت چی دەڵێم..دڵنیام ئەگەر دۆسێکەمان لەوێ بوایە یان ئەوان لێرەبوونایە،نەدۆسێی ئەنفال ئاوا بێکەس و خەسار دەبوو نە ئەنفالستانیش ساڵی جارێک دەردەکەوت.
دەی فەرموون هەرهیچ نەبێت چاوەروانی حکومەت مەبن، خۆئەوەیان هیچی تێ ناچێت و خەرجییەکی واشی ناوێت با هەرکەسەو ناوی ئەنفالکراوەکانی لەسەر تابلۆیەک بنوسێ و بەدیواری دەرەوەی ماڵەکەیەوە هەڵبواسێ..بۆئەوەی بەهەر کۆڵانێکدا رۆیشتین ناویان ببیستنەوەو بۆ هەمیشە ناویان لەیادەوەریماندا بمێنێتەوە.
