سهردێرهكان
مەرگی ژنێکی جیاواز……………….. عومەر محەمەد
مەرگی ژنێکی جیاواز
عومەر محەمەد
نەزیرە نەجم حەمە خەڵکی گوندی شێخ لەنگەری گەرمیانە، ئەمرۆ بەهۆی نەخۆشییەوە کۆچی دوایی کرد، چیرۆکی ئەم ژنە زۆر تایبەت و بەئازارە، نەزیرە نەجم لەدوای ئەنفالەوە واتا لە ساڵی ١٩٨٨ ەوە ٣١ ساڵی تەواوە بەتەنها دەژی لەپەلاماری ئەنفالدا هەردوک کورەکەی (سالارو جەبار) ئەنفالکران لەوساوە (٣١)ساڵی رەبەق نەزیرە نەجم چاوەروانی هاتنەوەی کوڕەکانی بوو، هیچ هیزێک نەبوو، بتوانێ بروای پێبهێنێ کە کورەکانی لەژیاندا نەماون، بۆیە هەموو جەژنێک دوو دەست جلی کوردی بۆ هەردووک کوڕەکەی بەدورین دەداو جوان قەدیان دەکات و هەڵیان دەگرێت بە نیازی ئەوەی کورەکانی کەهاتنەوە جلی تازە بۆ جەژن، لەبەربکەن بەڵام هەرگیز ئەو جلەکوردیانە لەبەر نەکران !
ئەو گۆچانەی لەوێنەکەدا دیارەو بەدەستی مامۆستا ئەکرەم ساڵحەوەیە، بۆ سالاری کوری کریوە و بەو هیوایەی بێتەوەو بیداتە دەستی، سالار یەکێک بوو لە پیشمەرگەکانی یەکێتی نیشتمانی کوردستان و لە تیپی ٥١ی گەرمیان بووەو پێش ئەنفال لەشەڕێکدا برینداربووە ، لە پەلامارە درندایەتیەکەی ئەنفالدا گیراوەو ئیدی ئەویش وەک هەموو ئەوگەنجانەی گیران بردیان و جارێکی تر نەبینرایەوە.
نەزیرە کە ئەمرۆ سێشەممە ٨ی کانونی دووەمی ٢٠١٩ کۆچی دوایی کرد، چیرۆکی ژیانی تەواو مایەی تێڕامانە وەک لە سەرەوە ئاماژەم پێکرد (٣١)ساڵە چاوەروانە ٣١ ساڵە نەیهێشتووە بەشەوانیش دەرگای حەوشەی مالەکەیان هەمیشە ئاواڵا بووەو هەرگیز رێگەی نەداوە پێوەبدرێت چونکە هەمیشە دەیگوت: با دەرگاکراوەبێت کورەکانی دێنەوە .
مامۆستا ئەکرەم سالح
٣١ ساڵە ئەم پیرەژنە بەتەنها دەژی، بەتەنها نان دەخواو بەتەنها دەخەوێ کەچی هەموو پێداویستەیەکانی ماڵەکەی (٣)دانەن ! سێ قاپ و سێ نەفەر خواردن، سێ کورسی بۆ دانیشتن، شەوانیش سێ جێگای دادەخست بەئومیدی ئەوەی کە کوڕەکانی هاتنەوە بچنە جێگاکانیانەوەو بخەون ! بەداخەوە ئەمرۆ نەزیرەش کۆچی دوایی کرد، جێگەکان خاڵی مانەوە، جلەکان هەر بەقەد کراوی بەجێمان، رادیۆو تەسجیل و تەسبیحی کورەکانی هەرماون و پارێزراون، وەک مامۆستا ئەکرەم بۆی باسکردم لەساڵی ١٩٨٨ەوە بۆیەکجاریش موجی رادیۆکەی جەبار بانەدراوە، ئەمرۆ بەمەرگی نەزیرە دۆسێی ئەنفال جارێکی ترهەڵدرایەوەو نیشانەیەکی تری شەرمەزاری چووە سەر تەوێلی مرۆڤایەتی و کۆمەڵگەی نێودەوڵەتی، ئەمرۆ شۆڤێنیزمی عەرەبی پەڵەیەکی تری شەرمەزاری زیاتر لەهەر رۆژێکی تر بەنێوچاوانیەوە تۆختر دەردەکەوێ ، ئەمرۆ گەرمیان و گوندی شێخ لەنگەر پرسەیانە.
رۆحی نەزیرەو ئەنفالکراوان شادو شەرمەزاری بۆهەموو ئەوانەی لەم تاوانە بێدەنگ وبێ باک بوون. شەرمەزاری بۆ ئەنجامدەرانی تاوانی ئەنفال وهەرتاوانێکی تر کەدەرهەق بەمرۆڤایەتی دەکرێت .
تێبینی : بەسوپاسەوە زۆربەی زانیارییەکانی ناو ئەم نوسیەنە مامۆستا ئەکرەم ساڵح پێی داوم و وێنەکانیشم لە واڵەکەی ئەو وەرگرتووە .
