ئەنفال و جێنۆساید
ئەنفال و جێنۆساید
عومەر محەمەد
کۆمەڵکوژییەکانی تری پێش ئەنفالیش بەگشتی کۆمەڵە پالامارو پرۆسەیەکی مەترسیداری سڕینەوەی کوردن، بەواتاو زاراوە قانونییە نێودەوڵەتییەکەی جینۆسایدی کوردن.
ئایا دەتوانین ئەمە بسەلمێنین ؟ بێگومان بەڵێ، چونکە بێجگە لەبریارەکانی دادگای باڵای تاوانەکان کە چوار دۆسێی بەتەواوی وەک جینۆساید یەکلایی کردووەتەوەو بڕیاری لەبارەیانەوە داوەو تاوانبارەکانی سزاداون کە بریتین لەم دۆسێی تاوانانە : ( ئەنفال، هەڵەبجە، بارزانیەکان، فەیلییەکان، راگواستنی ناوچەی شارەزورو پشدەر) ئەم پێنج دۆسێیە هەموویان لەدادگا بەفەرمی بەجینۆساید ناسراون .
هێشتا چەند دۆسێیەکی تریش ماون کە نەچوونەتە بەردەمی دادگا. وەک دۆسێی کانی ئاشقان و ئەشکەوتی دەکان . دەبێت ئەوەمان لەلا ڕون بێت کە شەڕو ناکۆکی جیاوازن لە نیازو هەوڵ بۆ جینۆساید وسڕینەوەی شوناس وقڕکردن، بەڵام ئایا کەس دەتوانێ نەک جارێک چەندین جار ئەو نیازە مەترسیدارانەی دەوڵەتەکانی تورک وعەجەم و عەرەب نکۆڵی لێبکات ؟ کەس دەتوانێ نکۆڵی لە نیازەکانی داعش بکات ؟ ئایا هەموو دنیا نازانن چەند جار هەوڵی سڕینەوە و فەوتاندنی کورد دراوە؟ نازانن چەند پەلاماری ترسناک دراوە هەتا گەیشتووەتە ئاستی ئەنفال و دواجاریش پەلاماری شەنگال و کۆمەلکوژی و ئەتککردنی ژنانی ئێزدی بەشێوەیەکی تەواو ئابڕو بەرانە ؟ بێگومان هەموو ئەمانە زەق بەبەرچاوانەوەن .
فڕێدانی کورد بۆ ئەودیوی ژیان و بوونی ئینسانی ڕاستییەکی حاشا هەڵنەگرە تورکیا کورد وەک کورد قبوڵ نیە وەک تورک و نکۆڵی کردن لەکورد بوون قبوڵێتی ئەگەرواشی کرد هێشتا وەک پلەدوو تەماشا دەکرێ و پێیان دەوترێت تورکی شاخاوی کەواتە پەلاماری کورد چ لە دێرسیم و چ لە ئەنفال و چ لە شەنگال و عیفرین سڕینەوەی بوونی کوردە. ئایا ئەگەر لە کۆبانێ بەرگری ئازایانە نەبوایە کۆمەڵکوژی بەئەندازەی شەنگال نەدەبوو ؟
بەعس پێش ئەنفال لە ڕووی تیۆری (ئایدیۆلۆژیی)یەوە کوردی وەک دوژمن تەماشا کردووە بۆیە توانیوێتی ئەنفال ئەنجامبدات، بەخۆرایی شوناسێکی تایبەتی پێنەدابوو ( بەکرێگیراوانی ئێران و خائین زادەکان) ئەمە پرۆسەی بەخائین نیشاندان و رەشکردن بوو، دواتر پرۆسەی لە ئینسان خستن دەست پیدەکات (ناهێڵم چیتر وەک کەر لەچیاکان بژین ) ئەمە قسەی عەلی حەسەن مەجیدبوو، کورد کافرن، کورد جنۆکەن، کورد جۆرە مرۆڤێکی نامۆن بە ئۆمەتی محەمەد، کورد جۆرە ئاژەڵێکن هەموو ئەم هەوڵانە بۆ رەشکردن و بێزراندن بوون بۆ ئەوەی لە پەلاماردانیاندا سەربازو ئەفسەران رەحمیان پێ نەکەن و باشترو خێراتر دەستیان بچێتە کوشتنیان. ڕەوایەتی دان بە کوشتنی کوردەکان بەو ئەندازەو قەبارەیە تەنها لە دڵرەقی جەلادەوە سەرچاوە ناگرێت بەڵکو بەشێکیشی لەبێدەنگی کۆمەڵگەی نێودەوڵەتیەوە بوو کە بۆنی نەوت گێژی کردبوون.
