سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
لە بۆسنەوهەرسک چیم دیت .. .. شۆرش ئەمین
لە بۆسنەوهەرسک چیم دیت
شۆرش ئەمین
بێگومان هه‌موومان جینۆسایدو ره‌شه‌كوژی بۆسنییه‌كانمان بیستووه، کە له‌سه‌ر ده‌ستی صربییه‌كان لەهەموو شوێنێكی بۆسنەدا رویداو، بەڵام ئەوەی شارۆچکەی سربرنستا بەبەرچاوی نەتەوەیەکگرتووەکانەوە ئه‌نجامدراوە، شاری سه‌رایڤۆ كه پایته‌ختی وڵاته‌كه‌یه پڕبوو له چیرۆكی تراژیدی سه‌رده‌می جەنگ. زۆر بەئازار بوو کە بینیمان ئه‌وشاره لێوان لێوبوو له بێوه‌ژن ومناڵی بێ باوك و دایك. سه‌رباری ئه‌و تاوانە گەورەیەش کەدەرهەقی بۆسنیەکان کرابوو، سەرباری چیرۆكە تراژیدیەکانیان، خه‌ڵكه‌كه‌ی هێشتا بەمیهرەبانی ماونەتەوەو هێنده تامه‌زرۆی پێكه‌وه ژیانی ئاشتیانه بوون، بەدوای تۆڵەوە نەبوون، من ئەمەم بەچاوی خۆم بینی کە کەسوکاری ونبووەکان و کوژراوەکان و ئەوانەش کە خۆیان راستەوخۆ ببوونە، قوربانی به خواردن ومۆسیقاوه سه‌ردانی یەکترو ئەو ماڵانەشیان دەکرد کە کەسێکیان تۆمەتبارو گومانلێکراوی تاوانەکە بوون، لەوێ لەبری بوخزاندن و تەحقیرکردنیان كاتێكی خۆشیان لەگەڵدا بەسەرده‌برد، بەم کارەیان گەورەیی زۆریان دەنواندو پێیان دەگوتن: ئێمە دەبێت هه‌موومان پێکەوە لەم وڵاتەدا بەئاشتی بژین، نایشارمەوە ئەم هەڵوێستە بۆمن نەک هەر نامۆ بوو بەڵکو زۆر قورس بوو. ئاخر چۆن خانەوادەیەک کوڕەکەیان بەبەرچاویانەوە کوژرابێت و ئێستا هەر ئەو خانەوادەیەی قوربانیانداوە سه‌ردانی ماڵ و خانەوادەی گومانلێکراوان و بكوژی كوڕەکەیان بکەن دڵنەوایشیان بدەنەوە !؟
بەڵام ئەوان وابیریان نەدەکردەوە ئەوانیان بەدوژمنی خۆیان نەدەزانی بەڵکو دەیانویست ژیان ئاسایی بكه‌نه‌وه‌و رابردوو به‌جێبهێڵن. لەراستیدا ئەمە زۆر جێگەی تێڕامان و سەرسامیم بوو، لەکاتێکدا ئەگەر خانەوادەو کەسوکاری تۆمەتبارەکان ئەم دەستپێشخەرییەیان بكردایه ئاسایی بوو، بەڵام بۆ خاوەن قوربانیەکان کە ئەم دەستپێشخەرییەیان دەکرد، تێگه‌شتنی بۆمنێك زۆر ئەستەم و ئاڵۆزبوو،ئەمەش هیچ گوناهێکی منی تێدانەبوو چونکە لاوڵاتێکدا ژیانم بەسەر بردووە، تیایدا تۆڵەسەندەنەوە برەوی هەیەو هەندێک جاریش دەبێتە دروشمی ئازایەتی حزبە بەناو عەلمانی و شۆرشگێرەکان وەک ئەو بانگەشە بەناوبانگەی یەکێتی کە دەڵێت : ( تۆڵه به‌سه‌بره ئه‌مما به‌زه‌بره). بەڵام لێرەدا ئەوە هاوسەنگی بۆگێڕامەوە کە لەو وڵاتەدا یاسا سەروەرەو ئەو کەسانەی تۆمەتبارن نابنە کەڵەگاو ناهێڵن ئاوا بەبێ لێپرسینەوە دەربازبن، بەڵکو هەموو تۆمەتبارێک بانگدەکرێتە بەردەمی دادگاو لێکۆڵینەوەی لەگەڵدا دەکرێت، تۆمەتبارەکان هەتا ئەوکاتە ئازادو گیانیان پارێزراوە کە دادگا بڕیاریان لەبارەوە دەدات و گوناه وتاوانەکەیان یەکلایی دەکاتەوە، ئەوسا یان بەتەوای ئازاد دەبن، یان بەپێی تاوانەکەیان سزای خۆیان وەردەگرن!
بێگومان ئەگەر لێرەش یاسا سه‌روه‌ر بوایه منیش هێندە بە چیرۆكی سربەکان سه‌رسام نەدەبووم، هەرئەوەشە کە هەتا ئێستا ئێمە قەوانی دادگایی کردنی جاش ومسته‌شارەکان لێدەدینەوە، دەنا ئەگەر ماف بگەڕێتەوە بۆ قوربانیان و تاوانبارانیش سزابدرێن، ئیدی ئەوەش نابێتە کاروچالاکی ئێمه هەموو ڕۆژێک لەسۆنگەی داڵدەدانی تۆمەتبارانەوە سەرزەنشت و ئامۆژگاری حیزبە دەسەڵاتدارە‌كان بكه‌ین وئەوانیش بێباکانە پۆست وپلەیان پێبدەن و حساب بۆمافی خەڵک نەکەن، تۆمەتباران لە قوربانیەکان باشتر بژین.
ئێستا روونە کە ئەو ئارامی ولێبوردەییەی لەوێ هەیە، بەرهەمی سەروەری یاسایە، ئەو هەموو کێشەو گرفتەو ئەو پەراویزخستنەی کەسوکاری ئەنفال لەماوەی ٢٧ ساڵ حوکمرانیدا نەبوونی سەروەری یاسایە.
