کۆمەڵکوژی کوردو ساختەکاری لەبەڵگەدا
دەسەڵات وکۆمەڵکوژی کوردو ساختەکاری
لەیادی کۆمەڵکوژی بارزانیەکاندا
عومەر محەمەد ٣١/٧/٢٠١٦
ئێوە عێراقتان بەم ساختەکاریە بەرێوەبردووە، ئەمە قسەی حاکم رەئوف رەشید بوو، کەلەدادگای باڵای تاوانەکاندا بە عەلی حەسەن مەجیدی گوتبوو.
پاریزەر ئەیاد كاكەیی چیرۆكی ژنێكی بارزانی بۆ گێرامەوەو لە نزیكبونەوەی سالیادی كۆمەڵكوژی بارزانیەكانیشدا سێ ساڵ لەمەوبەر لە پێگەی خۆی لە تۆری كۆمەڵایەتی فەیسبوك هەم بەڵگەنامەی مردنەکەی بڵاوکردوەتەوە هەم لەبارەیەوە نوسیوێتی : (دیكۆمینتیكی دۆسیەی بارزانییان عەلی كیمیاوی توشی شۆك كرد ) ئەیاد كاكەیی چیرۆكی ئەو ژنە ( عالیه ئەحمەد) دەگێڕێتەوە كە هاوسەرەكەی وكورە تاقانەكەی لەسالی ١٩٨٣ لەهەریرله گەل ٨٠٠٠ هەشت هەزار نێرینەی تری بارزانی گیران و ئیتر جینوساید كران، بەڵام كە سالی ١٩٨٩ سەدام حوسێن سەردانی هەریری كرد، عالیه خان دەربارەی چارەنوسی مێردەكەی و منداڵەكانی لە سەدام دەپرسی و ئەوەشی پێدەلێت كە بۆ خۆی بەتەنیا ماوەتەوە سەدامیش ناوی دەنوسێ بەمەبەستی بینینی لە دیوانی سەرۆكایەتی. پاشان عالیە ئەحمەد دەچێت سەردانی كۆشكی كۆماری دەكات بەڵام لەوێ بەڵگەی مردن (بیان وفات)ی مێردەكەی (قرطاس صاڵح حسین)دەدەنەوە دەستی كە له ١٩٨٣/٧/٢٩ له شەری عێراقدا كوژراوه. ئەوەش ساختەكارییەكی حكومەتی عێراق و دارودەستەكەی سەدام بوون، چونكە راستیەكەی ئەوەیە كە هاوسەرەكەی عالیه ١٩٨٣/٨/١٠ لەهەریر دەسگیركرابوو، تاوانەكەشی هەر ئەوە بوو كە بارزانی بوو، ئەیاد كاكەیی كە پارێزەرێكی دۆسێی بارزانیەكان بوو لەدادگا، دەڵێت ئەو بەلگەنامەیە لەدادگا عەلی كیمیاوی توشی شۆك كرد، كە هاتیشە دەنگ دادوەر كە (رەوف رەشید بوو) پێی گووت بێدەنگبە ئێوە عێراقتان بەم ساختەكارییە بەرێوەبردووە . حاکم رەوف راستی وتووە دەنا خودی سەدام لەتەلەفزیون گوتی بارزانیەکانمان نارد بۆ دۆزەخ .
