سه‌ردێره‌كان
- رەنگە ڕۆژێک بیابان ببێت بەگوڵزار …………………………….هۆمەر محەمەد
- لەمێژە لەم ڕۆژە ترساوم هۆمەر محەمەد
- في حضرة الفناء… الإبادة الجماعية منذ آلاف السنين وحتى اليوم! إعداد المحامية: رولا باش إمام
- دووەمین كۆنفرانسی “جینۆساید ڕەنگدانەوەی لە ئەدەب و هونەرومیدیادا” لەشاری سلێمانی بەڕێوەچوو.
- خەڵکی ئەنفال کردووەو بێباکانە لە بۆنەکاندا دەردەكەوێت. ……………زانا یادگار
گۆڕە بێتەرمەكان و تەرمە بێگۆڕەکان.!!
گۆڕە بێتەرمەكان و تەرمە بێگۆڕەکان.!!
عومەر محەمەد .
١٢/٣/٢٠٠٩
ڕەنگە کورد تاکە میللەتی سەر روی دنیا بێت کە ژمارەیەکی ئێجگار زۆر گیانبەختکردووی بەبێ کفن و گٶربن ؟ رەنگە تاکە میللەتیش بێت گۆرستانەکانی بێ تەرم بن، ئایا ئەمە راستە یاخود 
مەتەڵە ؟! بۆ وەڵامی ئەم پرسیارانە سەردانێکی مۆنۆمێنتی کلێسە پێویستە، هەروەها بۆ تەرمە بێگۆڕەکانیش دیسانەوە دەبێت باڵی خەیاڵمان بنێرینەوە بۆ بیابانەکانی عەرەبستان ! لەوێ تەرمی ئەنفالکراوەکان بێگۆڕن و لە کوردستانیش گۆڕەکان بێ”تەرم”ن ئەوەیە ئاڵۆزی دۆسێی ئەنفال .
گوندی کلێسە لەو دیو چیای کەڵکەسماق و لە قەراغی ڕوباری زێی بچوک گیرساوەتەوە، گوندێک ئەنفال گورزی کەمەر شکێنی لیداوە بەڵام نەمردووە، کڵێسە ١٣٥ کەسیان ئەنفالکراوەو یەک کەسیشیان بە کیمیاباران گیانی لەدەستداوە، تاقە گوندە کە بەشان و قۆڵی دانیشتوانەکەی مۆنۆمێنتێکیان بۆ ئەنفالکراوەکانیان کردووەتەوەو هۆڵێکیشیان بۆ گەلەری و کۆکردنەوەی وێنەو بەڵگەی قوربانیەکانیان دروستکرووە، بەتەنیشت هۆڵەكەشەوە باخچەیەكی بچكۆلە كەپەیكەری ئەنفال‌و كێلی بێگۆری ئەنفالكراوەكان بەشێوەیەكی ئەندازەیی دروستكراون، كلێەكان بەلاری دانراون‌و بەرەنگێكی سپی بۆیاخ كراون‌و لەسەر هەر كێلێكیش ناوی سیانی قوربانیەكی ئەنفال و نیشانەیەكی پرسیاردانراوە، بەڵام پێویستە هەموو ئەو راستیە بزانن کە لە نێوانی ئەو كیلانەی ناومۆنۆمێنتەکەی گوندی کڵێسەدا هیچ تەرمێك بوونی نیە كە من بە گۆڕە بێتەرمەكان ناویان دەبەم . ئەمەش وەكو ئاماژەیەك بۆ بێسەروشوێنكردنی ئەنفالكراوەكان‌و چارەنوسی نا دیاریان ، وەك بڵێی بە جیهانی ئەمڕۆ بڵێن كوان ( ئەنفالكراوەكانمان ؟ هەرهیچ نەبێت كوان تەرمەكانیان ؟) دەتوانم بلێم كوردستان تاكە شوێنی سەرگۆی زەوییە كە كێلی بێگۆڕوگۆڕی بێتەرمی تێدایە ! مردووەكانی كورد زۆرترین رێژەن كە لە بیابانەکانی خواروی عێراقدا بەکۆمەڵکوژراون بەڵام بێگۆڕن ! ئەوەش گەورەترین بێحورمەتیە بە مرۆڤ بوونی کوردو مافەكانی .
لەناو باخچەی مەزارەكەدا قوربانیەكانی گوندی كلێسە بەكێلەكانیاندا دیارە كە زۆر خێزان هەن هەموویان ئەنفالكراون، ئەو خێزانانە یان هەموویان لە بەین چوون یان تاقە كەسێك یاخود لە كەسێك زیاتریان لێ دەرباز بووەو بەهەر هۆیەکەوە بووە گەراوەتەوە، دەنا ئەوەی تری هێشتا بێسەروشوێنە.
خانەوادەی واشیان تێدایە تاقە كەسێكیان لێدەربازنەبووەو هەموویان ئەنفالكراون. بۆ هەر میوان‌و رێبوارو گەریدەیەك كەسەردانی ئەو مەزارە پڕ ئازارە بكات، راستەوخۆ دەكەوێتەبەردەمی گەران بەدوای پرسیارێكدا كە دواجار دەبێ لە دوای سەرانی بەعس‌و كۆمەڵگای نێودەوڵەتی، لەپێش هەموویانەوە رێكخراوی نەتەوە یەكگرتووەكان وەڵامی ئەو پرسیارە بداتەوە.. پرسیارەکە ئەوەیە ئەم مرۆڤانە چیان لێبەسەرهات و لە كۆێ كۆمەڵكوژ كراون..؟ کە کۆمەڵکوژکران قەرەبوویان چیە ؟ ئێمە ناپرسین بۆچی ئەنفالكران‌و بۆچی كۆمەڵكوژكران، چونكە وەڵامەكەی دەزانین، تەنها لە بەرئەوەی كوردبوون‌و نەیاندەویست زیدی خۆیان بگوازنەوە بۆناو ئەو دەدوانزە كۆمەڵگا زۆرەملێ دۆزخیانەی بەعس ناوی لێنابوون ئۆردوگای هاوچەرخ‌و هەندێكیانی بەناوی سەروەریەكانی بەعسەوە ناونابوون، ئەمەش وەكو ئیستفزاز كردن‌و برینداركردنی هەستی ئەوخەڵكەی كە بەعس خۆی ئەنفالی كردبوون‌و كەسوكارەكەی بێسەرو شوێنكردبوون، لەوانە ئۆردوگای صمود، هەڵەبجە سەدامیە، ئۆردوگای نصر. بەڵام دەبێ بپرسین كورد بەشێكە لە كۆمەڵگەی مرۆڤایەتی یان نا ؟ ئەگەربەشێكە بۆ بەودەردە دەبرێ ؟ كە برا بۆ قەرە بووی ناكرێتەوەو پارێزبەندی بۆناكرێ ؟
ئەو ڕۆژەی چووینە سەردانیان ریكەوتی ١٢ ی /٢٠٠٩ دووشەممە بوو، ڕۆژێكی بێزەوق و خۆڵاوی بوو، هەر بە گەیشتنمان چەند كەسێكی گوندی كلێسە بە رێزەوە هاتنە پێشوازیمان، ئەگەرچی هەندێكیان دەستیان لە چیمەنتۆدا بوو قۆڵیان لە کارهەلماڵی بوو سەرقاڵی دروستكردنی حەوزێكی گەورە بوون لە تەنیشت هۆڵی مەزارەكەوە، بەڵام كورتماوەیەك بۆ بەخێرهاتنمان دەستیان لە كارەكەیان هەڵگرت‌و هاتن بەخوڵق و خۆیەكی لادێیانەوە بەخێرهاتنیانكردین‌و دوای ئەوەی كەمێك بەروخسارمانیاندا هەڵروانی و لە مەبەستی چونمان تێگەیشتن ئەوانیش گەڕانەوە سەركارەكانیان.
