هەواڵەکە درۆیە – عومەرمحەمەد
هەواڵەکە درۆیە
عومەر محەمەد
١٤ی حوزەیرانی ٢٠١٦
هەواڵی سوتاندنی ١٩ ژنانی کوردی ئاین ئێزدی درۆیە، بەڵام واگریمان ڕاستە، چ دەبێ ؟ کوردستان دەبێتە ڤێتنام ؟ شەنگال دەبێتە کۆبانێ ؟ سەرکردەکانی باشور دەستبەرداری خەونە تاکە کەسیەکانیان دەبن ئیسلامیەکان حەج و عەمرەو بەناو عەلمانیەکان گەشتە ئاینی وتەرفیهیەکانیان دەبن ؟ دەبنە فریاد رەسی هەژارانی کورد ؟ بێگومان نەخێر، ئەوان بۆ ئەنفال چەندیان لە باڵاندا بوو، بۆ شەنگال کەمتر، خۆچاوی ئێزدیەکان لە هی موسڵمانەکان و شەنگالیەکان لەهی گوندنشینەکان کاڵتروجوانتر نیە.
میللەتێک ڕوتکردنەوەی ژنەکانی بەدەستی ئەمیرو خەلیفەکان و مەمکەمژەی منداڵانی لە گۆڕی بەکۆمەڵدا زەق بەچاوانی ببینێ و راینەچڵەکێنێ، سوتاندنی ژنان بۆی دەبێتە زەڵاتە، چونکە بۆنی کەبابی لێدێت. بەڵێ کەباب ! ئاخر کۆمەڵگایەک گەدەی لە مێشکی چالاکتربێ، هەتا کتێبخانەیەک دروست دەکات دەیان کەبابخەنە برازێنیتەوە، هەر هێندە دەربەستی ئایندەی دەبێت، بۆیە هەزارجاری تر ژنانی کورد ڕوت دەکرێنەوە و شەرعیەت بە ڕوتکردنەوەیان دەدرێت ئەگەر ڕانەپەڕن و نەبن بە ژنانی کۆبانێ، ئیدی ئەوسا مەگەر هەر لەکۆنفرانسی ئەکادیمیستەکاندا و لەناو هۆتێلە راقیەکاندا کۆببینەوەو چیرۆکی مەزلومیەتی خۆمان بۆ یەکتر بگێرینەوە، بەڵێ بۆخۆمان و بەس .. بەڵام ئەوسا کەس گوێ لە چیرۆکەکانیشمان ناگرێت، چونکە تاوانەکانی (ئەنفال وهەڵەبجەو شەنگال) دەمامکی خستن، دەرکەوت مرۆڤی ڕۆژهەڵاتی بەگشتی لەلای ئەمریکاو ئەوروپاییەکان خوێنیان هەرزانەو هەزارانیان بەهای تاکە کەسێکی وانی نیە، بۆیە دەبێت کورد بەدیدیكی ترەوە بیر لەژیان وبەرگری بکاتەوە، دەبێت ئەوانەی دێن و دەیانەوێ کەرامەتی ئینسانیمان بشکێنن، خۆیان بەشکاوی بگەرێنەوە،ئەوانەی دێن بۆ بەکە نیزەک کردنی ژنان، جەزرەبەی دەستی ژنان بخۆن . وەک چۆن لە کۆبانێ خواردیان و تەمبێ کران .
تێبینی
لەبارەی بەدرۆخستنەوەی هەواڵەکە چەندین لایەنی پەیوەندیدار قسەیان کردووەو هەواڵەکەیان رەتکردووەتەوە، من پشتم بە وتاری کاک (فەلاح مراد خان ) چالاکترین کەسایەتی دۆسێی ئیزدیەکان بەستووە .
بۆ وێنەکانیش پشتم بە شارەزایی رۆژنامەنوس مامۆستا (ئەرسەلان رەحمان) بەستووە، کەوا لەبارەی هەواڵەکە بەگشتی و وێنەکان بەتایبەتی لە پۆستێکیدا لە لاپەرەی تایبەتی خۆی لەفەیسبوک نوسێوێتی :
خۆشباوهڕى له لايهك و نهبوونى سهليقهى گهڕان و بهدواداچوون و كهوتنه شوێن ههڵڵاى وتى وتى سهرچاوهى كێشهكانه..
ئهو وێنهيه ساڵى رابردوو له چوارى ئابدا و له يهكهم ساڵيادى داگيركرانى شنگال له شارى دهۆك گيراوه و بۆ چهندين ههواڵى تايبهت به ژنانى ئێزدى بهكارهاتووهتهوه، كهچى دواى دهستكاريكردنى و گۆڕينى بۆ هاوشێوهى سوتانى كهساسبه، دهبينين وێنهكه بووهته ههوێنى لهدايكبوونى دهيان شيعر و درووشم وهوتاف تا دهگات به وتار و بهياننامه..
لهگهڵ ئهم وێنهيهدا ژمارهيهك وێنهى ديكه ههن كه نماييشن و شانۆگهرى سهر شهقامن و تێياندا ژمارهيهك كارهكتهرى هونهرى له قهفهزدان و رادهكێشرێن.. ئهوهشيان ههر نمايشه..
گرنگه بزانين كه خزمهتكردنى دۆزى ئێزدييان و ژنانى ئێزدى به تايبهتى به چهواشهكارى و فريودان و سۆز وروژاندنى بێ مانا نابێت.
