سهردێرهكان
تاوانی تەیمەزئاوا.
تاوانی تەیمەزئاوا.
١٠/٥/١٩٨٨
ئاسۆ بیارەیی
ئیوارەیەکی درەنگ وەختی کۆتایی مانگی پێنجی ١٩٨٨، خەماوی وەک دڵی گوندە سووتاوەکانی ناوچەی جەباری، کۆمەڵێک پێشمەرگەی لقی جەباری حزبی شیوعی لە چەمێکدا خەریکی پشودان دەبن، گوێیان لە تەقە دەبێ، خۆیان لە ملی یاڵ دەئالۆسکێنن و بەرزایی دەگرن تا بزانن چ باسە، چوار پشمەرگەیان بە پەرتاو ههنگاو دەنێن، بەڵێ ڕەنگە مەفرەزەیەکی پێشمەرگە بێ، لەو ههردوو چەمەدا رێگەی وون کردبێ، بەهانایانەوە بچن…. نەخێر کە دەبینن دەستەیەک پێشمەرگەی پارتین(تەحسین سدیق، بورهان سدیق و دوو برای تریان و عەلی حەفتا جەشمەیی)ییە، هاوڕییان دڵنیا دەبن و زۆر بە سادەیی و دڵپاکییەوە باوەشیان بۆ دەکەنەوە. بێ ئاگا لەوەی کە ئەو دەستە پێشمەرگەیەی پارتی هیچ مۆرک و سیمایەکی شۆڕشگیریان تیا نەماوە، دوور نیە ههر هەشیان بووبێ، کە پێوەندییان بە هەڤاڵ (تەحسین شاوەیس)ەوە کردوە و دەمێکە رێککەوتن کە پێش چوونەوەی یەکجارییان بۆ ئامێزی فاشیەکان، دەبێ دیاریی ئەنفالیان، خوێنی چەند شیوعییەک بێ.. هاوڕێ قاسم و فازل(عەرەب) و ههڵمەت کەرکوکی، ههوڵ دەدەن وەک پێش ئەنفال ئاسایی میواندارییەکی گەرمیان بکەن، بەڵام تەحسین شاوەیس ئاسا، بارانی گوللەی بەعسیەکان دەبارێنن بەسەریاندا، ههر لەوێ دوو گوڵی سوور برایەتی(فازل و قاسم عەرەب) شەهید دەکەن و ههڵمەت کەرکوکی و کاوە شوشە بریندار دەکەن. کاوە شوشە دەتوانێ خۆی ڕزگار بکا، بەڵام بەداخەوە هاوڕێ ههڵمەت، بەبریندارییەوە لە شوێنی تاوانە دوور دەکەوێتەوە و لە هاوڕییانی دی، لە تاریکە شەوی ڕەهێڵەی بارانێکدا، خوێنی تێکەڵ بە خاك دەبێت. ئەو بکوژانە تا ئەمڕۆش بە ناو پێشمەرگە دێرینی پارتین و جێگەی شانازی ئەو حزبەن.
جاشەکانی “تەحسین شاوەیس” بۆ بەیانی بە چاوساغی ئەو چەند پارتییە تەرمەکەی دەدۆزننەوە وخەڵاتێکی نوێ دەکرێن. تەحسین شاوەیس کە دوای ئەنفالیش بووە هەڤاڵ تەحسین و پارتییەکی بە ئەمەک دەبێ، لە تاوانکردندا بەرامبەر کەسانی نیشتمانپەروەر لە راوکردندا ناوەستێ. چەند رۆژێک دوای ئەو تاوانە قێزەوونە، لە قوڵایی گەرمیاندا، بە هێزێکی گەورەوە، دەدەن بەسەر هاوڕێ سۆران و رێبوار( خەڵکی کفری)، حەمە سوور(خەڵکی گوندی حەیدەرە سوور) و هاوڕێ سەلام عەرەب (خەڵکی بەعقوبە) و شەهیدیان دەکەن. دواجار بۆ پاداشتی سیخوڕی تەرمەکانیشیان ڕادەستی جەلادەکانی بەغدا دەکەنەوە. چوار کوڕی لاوی پێشمەرگەی دی شیوعی ،چاو لە هیوا، لە ژیان دەکوژێننەوە.
بەڵێ! پارتی وەک حزب، پێ بزانێ یا نەزانێ، بە گرتنەخۆی ئەو تاوانبارانە و دانی دەسەلات پێیان، بەشدارییەکی کاریگەری کردوە لە پرۆسەی ئەنفالی کورد و عەرەبدا. باباسی تاوانەکانی هۆمەربل حەسار ،سەرحەسن، و زەنگەنە بوەستێ،،کەو ئەو تاوانبارانە وەک گورگ ورگی ههژارانیان بۆ خەلاتی بەعس ههڵدرییوە. پرسیارەکە ئەوەیە ئایا پارتی، یان ههر لایەنێکی دی، کە ئەنفالچیەکانی پەنا دابێ، ئیدی شانازی چی بە مێژوویانەوە دەکەن؟
