سهردێرهكان
نابۆ دوبارەبوونەوەی گۆپتەپەو هەڵەبجەیەكی تر .
ئەنفالستان – سلێمانی : بەبۆنەی یادی ٢٦ هەمین ساڵیادی کیمیابارانکردنی گوندی گۆپتەپە ڕێکخراوی سپی بۆ ناوچەکیمیابارانکراوەکانی کوردستان راگەیاندنێکی بڵاوکردووەتەوە جگەلەوەی یادی کیمیابارانکردنی گوندی گۆپتەپەو عەسکەر دەکەنەوە دەنگۆی بەکارهێنانی چەکی کیمیاویش لە گومان دەردەهێنێ و باس لە نیگەرانی سەرۆک وەزیری بەریتانیا دەکات دەڵێت ئەو هێرشە تاوانی جەنگە و دەبێت ببێتە هێڵی سور . رێكخراوی سپی داواكاره ئەنجومەنی ئاسایشو رێكخراوی نەتەوەیەكگرتووەكان بەئەركی خۆیان هەستنو رێگە نەدەن لەسوریا نەكوردونەهیچ گروپێكی تربەرپەلاماری گازی كیمیاوی بكەونەوە .
دەقی راگەیاندنەکەی سپی
ئەمرۆ لەكاتێكدا یادی كۆمەڵكوژیو گازبارانكردنی گوندی گۆپتەپە دەكەینەوە كە دەنگۆی بەكارهێنانی چەكی كیمیایی لە دژی خۆپێشاندەرانی كوردانی رۆژئاوا لەلایەن حكومەتی سوریاوە، لەگومان دەرچووە، ساڵی 1988 بەپێشچاوی كۆمەڵگەی نێودەوڵەتیەوە نەك هەر گوندی گۆپتەپە، بەڵكو چەندین گوندی گەورەو قەرەباڵغی هاوشیوە ئەنفالكرانو گازبارانكران، بەهۆیەوە بەهەزاران مرۆڤ گیانیان لەدەستداو بەهەزارانیش برینداربوون، گوندی گۆپتەپەو عەسكەر لەم رۆژەدا بووە مەیدانێكی لە ترسناك تەرمی مرۆڤو مەلوبالندەوئاژەڵی كێویو ماڵی . كەچی وەك دەبینین هێشتا كۆمەڵگەی نێودەوڵەتی پەندوعیبرەتی لەو تاوانەو ئاسەوارە خراپەكانی وەرنەگرتووە، رژێمێكی تری بەعسی بەرلەوەی دەست بۆ چەكی كیمیاوی بەرێ نزیكەی 80000 هەشتا هەزار لەخۆپیشاندەران كوشتووە، رۆژبەرۆژیش ئەگەری مەترسیدارتر دێنە پێشەوەو ئاماژەكان رونن.. پێناچێت بەكارهێنانی چەكی كیمیاوی لەسوریا هیچ بەربەستێكی لەبەردەمدابێ هەرچی دەیڤد كامیرۆن سەرۆك وەزیری بەریتانیایە دەڵێت بەڵـگەی زیاتر لە بارەی بەكارهێنانی چەكی كیمیاوی لە لایەن حكومەتی سوریاوە لە دژی خۆپیشاندەران لەبەردەستن. ئاماژەی بەوەش كردووە كە بەڵـگەكان لە لایەن دەزگا زانیاریـیەكانی ئەمەریكاوە پـشـتڕاستكراونەتەوە.
سەرۆك وەزیری بەریتانیا ئەوەی بە جێگای نیگەرانیـیەكی زۆرداناوەو دەلێت: ئەو هێرشە وەك تاوانێكی جەنگ وایە و دەبێت بەهێڵێـكی سوور دابنرێت لەلایەن كۆمەڵی نێودەوڵەتیـیەوە. هەردەربارەی ئەو تاوانەش كۆشـكی سـپی دانی بەو راستیەداناوە كە حكومەتی سوریا بڕێـكی كەم لە گازی سارینی لە دژی خۆپیشاندەران بەكارهێناوە.
ئەوەی هەتا ئێستا زانراوە سوریا برێكی زۆر چەكی كیمیاوی لەبەردەستدایە، ئەمەش زۆرمەترسیدارە كە دەسەڵاتدارانی ئەو حكومەتە بەو دیدە درندایەتیەوە پێشبینی تاوانی گەورەو گازبارانی هاوشێوەی هەڵەبجە دەكرێت، چونكە وەك زانراوە هەتا ئێستا نزیكەی 70000 هەزاركەس لە خۆپیشاندەران بوونە قوربانی روبەروبوونەوەی حكومەتەكەی بەشار ئەسەد، لێرەوە ئەركی كۆمەڵگەی نێودەوڵەتیو ئەنجومەنی ئاسایشی نێودەوڵەتیەكە هەمان خەمساردیو بێباكی دوبارە نەكەنەوە كە دەرهەق بە كوردانی باشور لەهەشتاكانی سەدەی رابوردوهەیانبوو لەسۆنگەی بێدەنگیانەوە چەكی قەدەغەكراو بەكارهێنراو تاوانی نێودەوڵەتی ئەنجامدران . هەموو دنیا شاهیدی روداوەكانی عێراقو ئەو تاوانە گەورانەیە كە لەسەدەی رابوردودا دژبەخەلكی عێراق بەگشتیو گەلی كورد بەتایبەتی ئەنجامیدان، ئێمە پێمانوایە رێمی بەعس لە سوریا هەمان كاردانەوەی لەبەرامبەر كوردەكان هەبێت لە سوریا.
رێكخراوی سپی داواكاره ئەنجومەنی ئاسایشو رێكخراوی نەتەوەیەكگرتووەكان بەئەركی خۆیان هەستنو رێگە نەدەن لەسوریا نەكوردونەهیچ گروپێكی تربەرپەلاماری گازی كیمیاوی بكەونەوە .
رێكخراوی سپی بۆ ناوچە كیمیابارانكراوەكانی كوردستان
3ی ئایاری 2013
