تاوانبارو تۆمەتبارەكانی دۆسیەی ئەنفال / ئامادەکردنی تەها سلێمان
تاوانبارو تۆمەتبارەكانی دۆسیەی ئەنفال
تەها سلێمان
2016
پێشەكی
ئەنفال یەكێكە لە تاوانەكانی جینۆساید دژ بە گەلی كورد لە باشووری كوردستان، لە چوارچێوەی ئەم تاوانەو جێبەجێكردنیدا، سەدان تاوانبارو تۆمەتبار هەیە كە تا ئێستا جگە لەوەی بەشێكیان لەلایەن دادگای باڵای تاوانەكان لە عێراق داواكراون، نە دەستگیركراون و نەش یەك كەسیان چوەتە بەردەم دادگا بۆ لێپرسینەوە.
پێچەوانەكەی چ لەسەر ئاستی عێراق و چ لەسەر ئاستی كوردستان لە دوای راپەڕینی 1991و رووخانی بەعس 2003 خزاون یان چوونەتە ناو حزب و لایەنە سیاسییەكان و جومگە جیاجیاكانی حكومڕانی و چەندین پلەو پۆستیان هەیە. ئەمە لەكاتێكدایە دەبوایە لێپرسینەوەی یاساییان لەگەڵ بكرایەو لەبەرامبەر بەشداری كردنیان لە ئەنجامدانی تاوانی ئەنفال سزای یاسایی خۆیان وەربگرتایە.
ئەمەی بەردەست كە بەسێ خشتە ئامادەكراوە، خشتەی یەكەم “423” تاوانبارو تۆمەتبار لەسەر ئاستی عێراق، خشتەی دووەم “258” تاوانبارو تۆمەتبار لەسەر ئاستی كوردستان كە بەشێكە لە خشتەی یەكەم، خشتەی سێیەم “679” تاوانبارو تۆمەتبار لەسەر ئاستی كوردستان، هەوڵێكە بۆ پشتڕاسكردنەوەی ناوی بەشێك لە بەشداربوانی ئەنجامدانی تاوانی ئەنفال.
بێگومان لەسەر ئاستی عێرق و كوردستان، بەشداربوانی ئەنجامدانی تاوانی ئەنفال زۆر لەو ژمارەیە زیاترن، بەڵام گرفتەكە لەوێدایە هێشتا نەتوانراوە بەتەواوی ناوی سەرجەم بەشداربوانی تاوانەكە تۆماربكرێن و پشڕاستبكرێنەوە، هەروەك لە خوارەوە باسی دەستنیشانكردنی جومگەو سێكتەرەكانی بەشداری و بەرپرسیارێتی لە ئەنجامدانی تاوانەكە دەكەین.
دەخوازم ئەم كارە ببێتە بەشێك لە بەشداری دۆكیۆمێنتكردنی لایەنێك لە لایەنە جیاجیاكانی تاوانی جینۆسایدی ئەنفال و دەریچەیەكیش بێت بۆ جوڵاندنی ئەم لایەنە گرنگەی دۆسییەكە كە تا ئێستا كاری تێدا نەكراوە لە رووی لێپرسینەوەی یاساییەوە. درێژەی بابەت
