سهردێرهكان
ڕەجەب تاقانەیەكی تری ئەنفال لە گوندی جەلەمۆرد
مام ڕەجەبتاقانەیەكی تری ئەنفال لە گوندی جەلەمۆرد
عومەر محەمەد
مام رەجەبی گوندی جەلەمۆرد لە دایكبوی (١٩٣٣) یە جگەلەوەی تەمەنی تەواو هەڵكشاوە، گوێیەكانی گران بوونو یادەوەری لە دەستداوە، ئەم پیرەمێرەدە ئەنفالدیدەیە هەر لە بنەڕەتەوە خەڵكی گوندی جەلەمۆردە، بەرلە تاوانی ئەنفال بە كارو كاسبی خۆیەوە سەرقاڵبووەو خەركی كشتوكاڵو ئاودێری بووە، كاتێك پەلاماری ئەنفالی سێ کۆتایی هات هەروا دەڕۆژێک دوای ئەوە قۆناغی چوار بەکیمیابارانی گوندی گۆپتەپە دەستی پێکردو رۆژی دواتر (٤ی ئایاری ١٩٨٨) ئەنفال گەیشتە بناری خاڵخاڵان مام رەجەب خۆی و ئەندامانی خانەوادەكەی بەنیازی خۆشاردنەوە لەگەڵ خەڵكی ئاوایی گەیشتنە چەمی بابە روشەو ماوەی دوو رۆژ لەوێ خۆیان شاردەوە، بەڵام هەر زوو بە چاوساغی جاشەكان سوپا گەیشتە نزیکیان و بەزەبری هێز لەوێش دەری پەراندن و کەوتنە دەست هێزە پەلاماردەرەکەی ئەنفالی چوار، خەلکی جەلەمۆردو ئەو گوندانەی کە وەک پەناگا هاتبوونە بابە ڕوشە پێكەوە دەستگیركرانو پێکەوە ئەنفالكران.
خانەوادەكەی بریتی بوون لە : ( هاوسەرەكەی بەناوی نایلە شەریف) و كورەكانی ( حسێن، جمعە)و كچكەشی (كافیە ) بەدەستو برد رەوانەی تۆپزاواكرانو لەوێ كوروكچەكانی جیاكرانەوەو چاویان بەیەكتری نەكەوتەوە، رۆژێك دواتر خۆیو نایلەی هاوسەری لەگەڵ خەڵكیكی زۆر رەوانەی نوگرەسەلمانكرانوماوەی شەش مانگ لەوێ زیندانی كران، كە ئازادیشكران بەخت یاوەریان نەبوو، ماوەیەك دوای ئەوە هاوسەرەكەشی لە فیراقی كچو كورەكانی نەخۆشكەوتو هەرزوو كۆچی دوایی كرد، ئیتر مام رەجەب تەنیا كەوتەوەو ئێستا لە ژورێكی تەنیاو ساردو سڕی لە قوروبەرد دروستکراوی گوندی جەلەمۆرد دا بەتاقی تەنیا دەژی، ژورێكی بێ رایەخ وبێ رۆح.
ئەو پیرەمێردە ئەوەندە هیلاكە تەنانەت ناوی كوڕەكانی بەزەحمەت بیردەكەوێتەوە، من ئەو رۆژە لە بری بەعسیەكانو دەسەلاتدارانی خۆماڵیش تەریق بوومەوە، بەتایبەتی ئەو كاتەی پرسیارم لە بارەی منداڵەکانی لێدەكردو ئەویش ناوی جمعەی كوڕی بیرچوو بووەوە، كاتێك دراوسێكەی (مام محمود کە ئەویش ١٠ کوروکچ وژنەکەی ئەنفالکراون وبە تەنیا دەژی) هاوكاری كرد بەدەنگێكی بەرزتر وتی ناوی جومعە بوو، (جمعە ئەوەندە بەسۆزەوە وتی : ئەی بە قوربانی ناوی دەمت بم، ئیمە كە هەربەسەر پێیانەوە بەدیاریەوە راوەستابووین لەناخەوە ئازارمان چەشت.
مام رەجەب ئەوەی بیرە كەجاش گرتویاننو ڕادەستی سوپایان كردون، هەر ئەو رۆژە گەیاندویانە تۆپزاوا، ئەوەشی بیرماوە كە كورەكەی داوای لێكردووە بچێت لە سەربازەكان بپارێتەوە لەگەڵ ئەوان بێت، بەلام مام رەجەب، بە ئازارەوە دەلێت نەچووم لەبەرئەوەی دەمزانی بەقسەم ناكەن.
مام رەجەب دەلێت : هەرگیز نامەردی شێخ بایزی جاشوعەزابی نوگرەسەلمانو حەجاجو ئەو رۆژانەم لەبیر ناچێتەوە كە سەیارەی سەرداپۆشراویان بۆ هێناینو رەوانەی نوگرەسەلمانیان كردین، دەلێت نوگرەسەلمان دۆزەخ بوو، حەجاجیش جەلاد بوو.. ئەوپیاوە هیلاكە تەنانەت بیری نەماوە چ سالێك ئەنفالكراوە كەچی ئەو عەزابەی نوگرەسەلمان لەبیرناكات، لێرەدا پرسیاری جەوهەری لەمەڕ خزمەتگوزاریەكەی حكومەت ئەوەیە مانگی نۆسەد هەزار دینار موچەکەیەتی بەڵام ئەو کەنەتوانێ خزمەتی خۆی بکات ئەو برە پارەیە بۆ ئەو چ سودێكی بۆ كە نەفتێكی وەک مام رەجەب هەیە ؟
