پارکی ئال حەکیم لە هەڵەبجەو ئەنفالکراوە گۆڕ غەریبەکانی بیابان .
پارکی ئال حەکیم لە هەڵەبجەو ئەنفالکراوە گۆڕ غەریبەکانی بیابان .
عومەر محەمەد
هەمیشە عەرەب وتورک وفارس بەزمانێک لەگەڵ سەرانی کورد دواون کە پربووە لە نهێنی، ئەوان بە قسەی سۆزدارانەی توێکلدار داواکاری سیاسەتمەداری کوردیان رەتکردووەتەوەو کوردیش شەرمنانەو ساویلکانە چونەتە ژێربار، لە میانەی لیکۆلینەوەو باسەکانی کۆنفرانسی ئەنفال وجینۆساید لە گەرمیان کە دەزگای لیکۆلینەوەی جینۆساید، لە رۆژانی ١-٢-٣/١٠/٢٠١٥ لە شاری کەلار بەڕێوەچوو، مداخەلەیەکی د. شوکریە ڕەسوڵ سەرنجی راکێشام، کە وتی : لە کاتێکدا کوردەکان بە دوای گۆڕی بەکۆمەڵدا دەگەڕان، ( ئال حەکیم) وتوویەتی پێویست ناکات ئێوە خۆتان بەوەوە سەرقاڵ بکەن، چونکە ئەوانەی لێرە لە بیابان نێژراون میوانی ئازیزی ئێمەن ! هەرچەندە لە کۆنفرانسەکەشدا باری سەرنجی خۆم لەبارەیەوە خستەڕو بەڵام پێمباشبوو، کەوا بەم وتارە زیاتری لەبارەوە بڵێم .
سەرەتا دەبێت لە قسەکەی ئال حەکیم ورد بینەوە بزانین ئەو هەستە راستە یاخود، فریودانێکی بێپەردەی کوردەکانە ؟ بەرلەوەی وەلامی ئەو پرسیارە بدەینەوە دەبێت ئەو پرسیارەش بکەین ئایا ئەنفالکراوەکانمان کە ئێستا دەست و پەنجەیان تێکەڵ بەلمی بیابان بووە نێژراون ؟ یان بەوپەری بێڕێزییەوە ژێرلم دراون ؟ ئایا ئال حەکیم نازانێت کە ئەنفالکراوانمان بە رێزەوە نە نێژراون ؟ بێگومان دەزانێت بەڵام بۆچی ئەم قسەیە دەکات ؟ بێگومان لە عەقڵی سیاسەتمەداری کوردی گەیشتووەو دەزانێت توانای فریودانیان ئاسانەو زۆر خۆماندوو کردنی گەرەک نیە .
ساڵی ٢٠٠٥ هەر ئەم ئال حەکیمە لەسەردانیدا بۆ شاری هەڵەبجە، لەسەر مەزاری شەهیدان ( قوربانیانی بەگاز خنکاوی دەستی رژێمی بەعس) بریاریدا لەسەر حسابی خۆی لە شاری هەڵەبجە پارکێک بۆ شەهیدانی هەڵەبجە دروستبکات و ناوی بنێت (پارکی ئەلحەکیم)، ئەو سەروەختە من ئەندامێکی ناوەندی چاک بووم، لە سەرەتای مانگی یەکی ساڵی ٢٠٠٦ لەگەڵ هاورێیانم (دلێر محەمەد کۆڵنەدەرو سەلاح مەزن) سەردانی شاری هەڵەبجەمانکرد، دوای گفتوگۆ لەسەر ئەو پارکە بریارماندا، کەمپەینێک بکەین بۆ رێگرتن لە دروستکردنی ئەو پارکە، بەلای کەمەوە گۆرێنی ناوەکەی لە پارکی ئال حەکیمەوە بۆ ناوێکی تر (دیاری عەبدلعزیز حکیم ) بۆ ئەو مەبەستە سەرۆکی شارەوانیمان بینی و گفتوگۆمان لە بارەیەوە کرد، داوامان لێکرد ئەو پارکە دروست نەکرێت، بەڵام ئەو داواکەی ئێمەی پێ سەیر بوو، تێگەیشتنی ئەو وابوو کە هەر کەسێک هاوکاری هەڵەبجە بکات شایانی سوپاسە نەک رەتکردنەوە. بەلام ئێمە نیازو ئامانجێکی ترمان هەبوو، دەمانویست پارکێک لە هەڵەبجە بە ناوێکی عەرەبی نەکرێتەوە بیرمان له نه‌وه‌ی داهاتوو ده‌کرده‌وه که چۆن ئه‌و هه‌نگاوه ده‌خوێننه‌وه، لەبەرئەوەی ئەزمونی تاڵمان هه‌یه) تەرمی دەیان جەلادی کورد کوژ ئەمرۆ بوونەتە شەخسی پیرۆز، ترسمان هەیە رۆژگارێک بێتە پێشەوەو ئەم پارکە لە دیارییەوە ببێتە ژەهر، ببێتە نەعلەت، ببێتە پرسیارێک وەلامەکەی ئاڵۆز بێت، پارکێک بە ناوی کەسایەتیەکی عەرەبییەوە بۆ لیرەیە ؟ بەلام سەرۆکی شارەوانی لێمان تێنەگەیشت و پێیوابوو دژایەتی کردنی ئال حەکیم دژایەتی کردنی سەرۆک مام جەلالە !
لە کاتێکدا ئال حەکیم لوتفی دروستکردنی پارکێکی لەهەلەبجە دەکرد، کە گۆرە بەکۆمەڵەکانی کورد لەبیابان و لە مەملەکەتی لم کە ئال حەکیم حوکمرانێتی بەوپەری بێرێزییەوە ماونەتەوەو رۆژانە شوانە عەرەبەکان بەگۆچانەکانیان کەللە سەرو ئیسک وپروسکی ئەنفالکراوەکانمان دەردەهێننەوە، پرسیار ئەوەیە ئال حەکیم وئەوانی دی چەند پارک ومۆنۆمێنتیان بۆ ئەنفالکراوانی کورد (میوانە عەزیز)ەکانیان دروست کردووە ؟ چەندە هاوکاری هەڵدانەوەو گەراندنەوەی روفاتی ئەنفالکراوانیان کردووە، بۆئەوەی بە دابونەریتی کۆمەڵایەتی بەخاک بسپێردرێنەوە ؟
هەرئەوکاتە لە هەڵمەتەکەماندا رامان گەیاندبوو، بەرێزەوە دیارییەکەت وەردەگرین بەلام لەوە گرنگتر بەفەرمی ناسینی تاوانی جینۆسایدو داوای لێبوردنە لەگەلی کورد، بەلای کەمەوە بریار بدەن عەرەبە شیعە مەزهەبەکان کە لە قسەتان دەرناچن دەستبەرداری مال وحاڵی کوردبن و بگەرێنیەوە شوێنی زێدی خۆیان کە پێشتر بۆ چەسپاندنی سیاسەتی تەعریب هاتبوون .
ئەوەی ئال حەکیم وتوویەتی سەبارەت بە ئەنفالکراوانمان کە حەکیم بە (میوانە عەزیزەکان) ناوی بردبوون، تێگەیشتنێتی لە گرنگی گەرانەوەی روفاتەکان و دروستکردنی مۆنۆمێنت بۆیان لەکوردستان، دەشێت ئەمە کۆدێکی گرنگی سەربەخۆیی ودامەزراندنی دەوڵەتی کوردی بێت، بەداخەوە ئەوەی لێی تێنەگەیشت سیاسەتمەداری کوردبوو. ئەو قسەیەی ئال حەکیم لە ئێستادا باشتر لە هەرکاتێک حەشدی شەعبی پەردەی لەسەر لادەبات .
