لە پەرلەمانی كوردستان پرسی تۆمەتبارو تاوانبارەكانی جینۆسایدو ئەنفال تاوتوێ‌ كرا.

تشرینی دووهەم 16, 2015 Omer ئه‌نفال, هه‌واڵ لێدوان نووسین ناچالاککراوە لە لە پەرلەمانی كوردستان پرسی تۆمەتبارو تاوانبارەكانی جینۆسایدو ئەنفال تاوتوێ‌ كرا.

---

 لە پەرلەمانی كوردستان پرسی تۆمەتبارو تاوانبارەكانی جینۆسایدو ئەنفال تاوتوێ‌ كرا.

لەژێر ناوونیشانی (نابێت ئاشتەوایی نیشتیمانی بكرێتە پاساوی دەربازبوونی تۆمەتبار و تاوانباران))، سەعات 10ی پێشنیوەڕۆی ئەمڕۆ 2015/11/16، لە هۆڵی پەناگیری لە تەلاری پەرلەمانی كوردستان، دەزگای لێكۆڵینەوە بۆ جینۆساید و ئەنفال، بەهاوكاری لیژنەكانی مافی مرۆڤ و كۆمەڵی مەدەنی و لیژنەی شەهیدان و ئەنفال و پێشمەرگەو جینۆساید پانێڵێكی رێكخست. پانێڵەكە بە ئامادەبوونی لیژنەكانی (مافەكانی مرۆڤ، كۆمەڵگەی مەدەنی، كاروباری پێشمەرگە و شەهیدان و قوربانیانی جینۆساید و زیندانیانی سیاسی) لە پەرلەمانی كوردستان ‌و نوێنەری وەزارەتی شەهیدان و ئەنفالی حكومەتی هەرێم و ژمارەیەك لە ئەندامانی پەرلەمانی خولی ئێستا و پێشوو، لەگەڵ رێكخراوەكانی كۆمەڵی مەدەنی و پارێزەران بەڕێوەچوو ‌و تیایدا بەشداربووان گفتۆگۆیان لەبارەی رێكخستنی هەوڵی سەرجەم لایەنە پەیوەندیدارەكان كرد بۆئەوەی تۆمەتباران و تاوانباران لە رێگەی یاسا و دادگاوە سزابدرێن. سەرەتای پانیڵەكە لەلایەن بەڕێوەبەری پانێڵكە رۆشنا مەحمود بەبەخێرهاتنی میوانەكان دەستی پێكرد، دواتر لەلایەن تەها سلێمان بەڕێوەبەری دەزگای لێكۆڵینەوە بۆ جینۆسایدو ئەنفال ووتەیەك پێشكەش كرا، جگە لە خستنە ڕووی ئامانج و ناوەڕۆكی پانێڵەكە، كە گفتوگۆكردن بوو لە بارەی پرسی تۆمەتبارو تاوانبارەكانی دۆسیەی جینۆسایدو ئەنفال، هاوكات كورتەیەك لەكارو چالاكییەكانی یەك ساڵی رابووردووی دەزگای لێكۆڵینەوە بۆ جینۆسایدو ئەنفالی خستەڕوو. لای خۆشیەوە ئاری محەمەد هەرسین سەرۆكی لیژنەی كاروباری پێشمەرگە و شەهیدان و قوربانیانی جینۆساید و زیندانیانی سیاسی لە پەرلەمانی كوردستان، رایگەیاند: “گەورەترین تاوانە، تاوانبارێكی گەورە كە بەشداربووە لە پرۆسەی ئەنفال بەرامبەر بە گەلی كورد ئازاد بكرێت”. هەر لەم پانیڵەدا سەرۆكی لیژنەی كاروباری پێشمەرگە و شەهیدان و قوربانیانی جینۆساید و زیندانیانی سیاسی لە پەرلەمانی كوردستان، ئەوەشی راگەیاند: “پێویستبوو حكومەتی هەرێم راوێژی بە لیژنەكەیان بكردایە سەبارەت بە گەیاندنی سكاڵا بە دادگای نێودەوڵەتیی لاهای لەبارەی جینۆسایدی ئێزدییەكان، چونكە لیژنەكەی ئەوان تایبەتمەندە بەمجۆرە دۆسییانە”. پاشان سۆران عومەر سەرۆكی لیژنەی مافەكانی مرۆڤ لە پەرلەمانی كوردستان، رایگەیاند: “ناكرێت تاوانبارانی ئەم تاوانە بە بەرچاوی گەلی كورد هاتووچۆ بكەن و دادگایی نەكرێن و بە سزای خۆیان نەگەن”. لای خۆشیەوە سالار مەحمود سەرۆكی لیژنەی كاروباری كۆمەڵگەی مەدەنی لە پەرلەمانی كوردستان، رایگەیاند: كاروچالاكییەكانی دەزگای لێكۆڵینەوە بۆ جینۆسایدو ئەنفال، جێگای دەست خۆشی و ستایشن و نموونەی كاری جدین لەبواری دۆسیەی جینۆسایدو ئەنفال. هەروەها وتیشی”سوڵتان هاشم یەكێكە لەو (56) داواكراوە سەرەكییەی بەردەم دادگا و دانی بە تاوانەكەیدا ناوە، بۆیە هەر هەوڵێك بۆ ئازادكردنی ئەم تاوانبارە بە بەشێك لە گەڕانەوەی بەعسییەكان دەزانین بۆ ناو پرۆسەی سیاسی لە عیراقدا”. پاشان بەشداربوان بەشێوەیەكی جددی و بەرفراوان بەشداری تەوەرەكانی پانێڵەكەیان كردو چەندین پێشنیارو بیرۆكەی پێویستیان خستە ڕوو، هەروەك كۆك بوون لەسەر ئەوەی ئەنجامدانی ئەم جۆرە كارە جددیانە تایبەت بە جینۆسایدو ئەنفال، جێگای تەقدیرەو پێویستە بەردەوامیان هەبێت. سەبارەت بە پێشنیاز و راسپاردەكانی پانێڵەكە، تەها سلێمان سەرۆكی دەزگای لێكۆڵینەوە بۆ جینۆساید و ئەنفال بە ماڵپەری فەرمیی پەرلەمانی كوردستانی راگەیاند: “راو بۆچوون و پێشنیازی هەرسێ لیژنەكەی پەرلەمانی كوردستان و وەزارەتی شەهیدانی حكومەتی هەرێم و ئەندامانی پەرلەمان لە خولی ئێستا و پێشووتر، لەگەڵ رێكخراوەكانی كۆمەڵی مەدەنی و یاساناسان لە كۆنووسێكدا ئاراستەی حكومەتی عیراق و هەرسێ سەرۆكایەتییەكەی هەرێم دەكرێت”. بڕیاریشە بۆ هەمان مەبەست شاندێكی گەورە لە ئەندامانی پانێڵەكە سەردانی ئەنجومەنی نوێنەرانی عێراق بكەن و لەڕۆژانی داهاتوو كاری ئامادەكاری بۆ ئەو مەبەستە دەست پێدەكەن.

سه‌رنجه‌كان

---