گردبوونەوەو بەیاننامەى ناڕەزایی دژى ئازادکردنى تاوانبارى ئەنفال (سوڵتان هاشم)
٤/١١/٢٠١٥ نوێنه‌ری ڕێكخراوه‌كانی بواری ئه‌نفال و چه‌ند كه‌سایه‌تییه‌ك له مۆنۆمێنتی ئه‌نفال، بەمەبەستی ئیدانه‌كردنی ئه‌و هه‌وڵانه‌ی بۆ ئازادكردنی تاوانباری ئه‌نفال (سوڵتان هاشم) گردبوونه‌وه‌یه‌كیان ڕێكخست و به‌یاننامه‌یه‌كیان بڵاوكرده‌وه.
ده‌قی به‌یاننامه‌كه
بەیاننامەى ناڕەزایی دژى ئازادکردنى تاوانبارى ئەنفال (سوڵتان هاشم)
جەماوەرى بەهەڵوێستى عێراق و هەرێمى کوردستان
سەرۆکایەتى کۆمار
سەرۆکایەتى ئەنجومەنى نوێنەران
ئەنجومەنى وەزیرانى عێراق
دادگاى بالاى تاوانەکانى عێراق
سەرۆکایەتى هەرێمى کوردستان
سەرۆکایەتى پەرلەمانى کوردستان
ئەنجومەنى وەزیرانى کوردستان
حزب و لایەنەکانى عێراق و کوردستان
لەکاتێکدا گەورە تاوانبارى پرۆسەکانى ئەنفال (سوڵتان هاشم) لە حوزەیرانى ساڵى 2007 دا دادگاى باڵاى تاوانەکانى عێراق بڕیارى لەسێدارەدانى بۆ دەرکرد،
لە ئێستادا هەوڵێک هەیە بۆ ئازادکردنى ئەو گەورە تاوانبارە و جێبەجێ نەکردنى سزاکەى،
ئێمە وەکو کەسوکارى قوربانییانى ئەنفال داوا لە سەرجەم لایەنە عێراقی و کوردستانییەکان دەکەین ، دژى ئەم هەوڵە بوەستنەوە و نەهێڵن ئەو تاوانبارە ئازاد بکرێت، چونکە لەڕووى یاساییەوە پێچەوانەى بڕیارى دادگاى باڵاى تاوانەکانى عێراقە و هەروەها لەڕووى دەروونییشەوە بۆ کەسوکارى قوربانیانى ئەنفال و خەڵکى کوردستان ئازاردانی ڕوحیه.
هەربۆیە داوا لە نوێنەرانى کورد لە ئەنجومەنى نوێنەرانى عێراق دەکەین بە هەموو شێوەیەک رێگرى لەم هەوڵە بکەن .
کەسوکارى ئەنفالکراوان و شه‌هیدان و ڕێکخراوەکانى بوارى ئەنفال و ڕۆشنبیرانى سنورى پایتەختى شەهیدان و ئەنفالکراوان (چەمچەماڵ).
4/11/2015
