سهردێرهكان
هەتا مرد ئاوی ساردی نەخواردەوە
هەتا مرد ئاوی ساردی نەخواردەوە
هەركە دیدارەكەمان تەواوكرد،كاك عەلی عارف ووتی چیرۆكێكم لەلایە پێخۆشە باسی بكەم ودیكۆمێنت بكرێت، پاشئەوەی گوێبیستی بووم سەرلەنوێ كامێرام بۆ دامەزراندەوەو ریكۆردم كرد، بەڵام لەبەركاریگەری چیرۆكەكە پێم باش بوو بیكەینە دەست پێكی ئەم كتێبە.
عەلی عارف دەستی كرد بەگێرانەوەو وتی :
یەكێك لەوچیرۆكە جەرگبرانەی ئەنفالی هەڵەبجە كە هەرگیزاوهەرگیز لە بیرم ناچێتەوە، چیرۆكی مردنی منداڵێك و هەڵوێستی ئازایانەی دایكێتی، كە ناخی ئینسان دەهەژێنێ وپێویست بوو هەر زۆر زوو دیكۆمێنتبكرایەو هەتا ئێستا چەندین فیلمی لە سەر دروستبكرایە، بەڵام بەداخەوە هیچی لەبارەوە نەكراوە چیرۆكە تراژیدیاكە مردنی منداڵێكی هەڵەبجەییە لە نوگرەسەلمان.
ئەكبەرمنداڵێكی بچوكی سێ ساڵان بوو لە نوگرەسەلمان مرد، ئێستاش تەرمەكەی لەوێ بەجێماوە، مامۆستا دلێری برای ئەكبەر بۆی گیڕامەوە ووتی براكەم نەخۆش بوو هەر داوای ئاوی ساردی دەكرد، بەڵام لە نوگرەسەلمان ئاوی سارد چۆن دەستبكەوتایە ؟ ئەوە مەحاڵ بوو، تەنانەت ئاویش زۆر بە زەحمەت دەست دەكەوت، ئەوەشی هەبووگەرم و تاڵ وسوێربوو.
كاتێك براكەم داوای ئاوی ساردی دەكردو دەستنەدەكەوت دایكم (عالییە حەمە فەرەج) لە حەژمەتا توند كوڕەكەی گرتبوو بەسنگی خۆیەوە، بەڵام ئەكبەر زۆرنەخۆش بوو لە باوەشی دایكمدا گیانی لەدەستدابوو، كە زانیمان مردووە خەڵك هاتن تكاو رجایەكی زۆریان لە دایكم كرد بیانداتێ بیبەن بینێژن، چونكە مانەوەی بێسودەو بۆگەن دەكات، بەڵام دایكم قایل نەدەبوو تەرمەكەی بەرن بە جۆرێك بە سنگی خۆیەوە گوشیبووی دەتگووت پێكەوە لە حیم كراون، بەهیچ جۆرێك بەرینەدەدا، هەتا لە هۆش خۆی چوو ئینجا توانیمان برا مردووەكەمان لەباوەشی دەربهێنین وبیبەین بینێژین.
بەڵام لەوەش تراژیدی تر ئەوەیە هەتا ئێستا دایكم ئاوی ساردی نەخواردووەتەوە ئەوا (٢٥) ساڵ بەسەرمردنی ئەكبەرو ئەوكارەساتەدا تێدەپەڕێ هەتا ئێستا بۆیەكجاریش دایكم ئاوی سارد بەگەرویدا نەرۆیشتووەتە خوارەوە. ([1])
عومەر محەمەد قادر
هەڵەبجەی شەهیدان – هاوینی ٢٠١٤
[1] ئەوكاتەی چیرۆكەكەیان بۆ عەلی عارف گێڕاوەتەوە 25 ساڵ بەسەر تاوانی ئەنفال وكیمیاباراندا تێپەڕی بوو.
