سهردێرهكان
نامق عەبدوڵا توفيق لەمەرکەز شەبابەکە دەمتوانی خۆراسان رزگار بکەم بەڵام خۆی لەگەڵمدا نەهات، وتی ناتوانم منداڵەکانم بەجێبێڵم .
نامق عةبدولا توفيق
لەمەرکەز شەبابەکە دەمتوانی خۆراسان رزگار بکەم بەڵام خۆی لەگەڵمدا نەهات، وتی ناتوانم منداڵەکانم بەجێبێڵم .
دیدار : عومەر محەمەد
دوای ئەوەی هەواڵەكانی میدیا جارێكی تر لەسەر دۆسێی هەژدە ئافرەتەكەی ئەنفال گەرم بوونەوە، بڕیارمدا وەك سەرنوسەری گۆڤاری ئەنفالستان بچم سەردانی كەسوكاریان بكەم و لە نزیكەوە دیداریان لەگەڵدا سازبكەم، هەڵبەت لە خاڵی سفرەوە دەستم پێنەکردووە پێشتریش هەرلە ساڵی ٢٠٠٦ ەوە سەردانی مەیدانی کەسوکاریانم کردووەو لە نزیکەوە هەندێکیانم دواندووەو لە هەوڵەکانی ناوەندی چاکدا بۆ سۆراخی ئەو دۆسێیە بەشداربووم.
سەر لە بەیانیەكی زوی ڕۆژی ٢٤ی ئابی ٢٠١٣ بە مەبەستی دیدارەكانم لە خەودا بێئەوەی خەبەریان بكەمەوە منداڵەكانم ماچكردوو، ماڵئاوایم لە هاوسەرم كرد، ماچێک کە پڕبوو لە سۆزو میهرەبانی باوکایەتی چونکە دەچوون بۆ خورماتوو شارە مەترسیدارەکە کەهەمیشە تیرۆرستان بە تەقینەوەی بۆمبەکان خەلکە مەدەنیەکەیان دەکرد بەئامانج و دەبوونە هەواڵی میدیاکان. لەوەها دۆخێکدا بوو کە لە سلێمانیەوە بەرێكەوتم بۆ شاری كفری. ئەگەرچی پێشتریش دیدارم لەگەڵ چەند كەسێكیاندا ساز كردبوو، بەڵام بەڵامەوە گرنگ بوو ئەمجارە بە مەبەستی بە دواداچونێكی وردتر هەم بۆ گۆڤاری ئەنفالستان و هەم بۆ نوسینی كتێبێك لەبارەیانەوە سەردانی مەیدانی بكەم و ئەمجارە هەموویان ببینم و دیداریان لەگەڵدا ساز بكەم وەک پێشتر ئاماژەم پێکرد لە ساڵی ٢٠٠٦ یش لەگەڵ مامۆستا نەجیب گەرمیانی سەردانمان كردبوون و دیدارمان لەگەڵ کاک عەبدولخالق قادرعەزیزو مامۆستا یوسف یونس و عەباس نەوجولی و پیاوێکی تر کردبوو بەناوی ئەحمەد و دواتریش سورەد قەیدی ٦ كەس لەو ژن وكچانەمان لە فەرمانگەی باری كەسێتی سڵیمان بەگ دەرهێنابوو، هەندێك زانیاریمان چنگ كەوتبوو .
هەركەیشتمە شاری كفری چومە ماڵی کاک عەبدولخالق قادر کە بە هاورێ مەحمود ناسراوەو برای عیسمەت قادر عەزیزە كە ناوی لە بەلگەنامەكەی موخابەراتی کەرکوک دایە، عیسمەت لە دایكبوی سالی ١٩٤٥، ئەو کچێک بوو، تازە عەلقەی دەستگیرانی کردبووە پەنجەی[1] بەڵام ئەنفال نەیهێشت بەدڵخوازی خۆی بگات و ئەنفالکراو دواتریش ناوی لەگەڵ ١٧ کچ وژنی تر لە بەڵگەنامەیەکی مەترسیداردا بڵاوکرایەوە لەوێ لەگەڵ (هاورێ محمود) عەبدوالخالق قادر عەزیز دوای دیدارێكی ڤیدیۆی و پشویەكی كورتخایەن لە كفرییەوە بەرێگایەكی پڕلە تاسەو هەڵبەزودابەزدا بە قرچەی گەرمای ئاب بەرێكەوتین بۆ شاری خورماتوو. درێژی دیدارەکە
[1] محەمەد رەئوف لە کتێبەکەیدا واباسی عیصمت دەکات کە تەمەنی ٤٥ ساڵەو دایکی چەندین منداڵە بەلام ئەوە راست نیە، چونکە عیصمەت هێشتا نەچووبووە کەژاوەی هاوسەرگیرییەوە بەڵکو تازە عەلقەی دەستگیرانی کردبووە پەنجەی و ئەنفال گرێبەستی هاوسەرگیریانی هێنایەوە خاڵی سفر.
