بۆچی تاجەگوڵینەمان لەسەرمەزاری شەهیدانی هەڵەبجە دانەنا
بۆچی تاجەگوڵینەمان لەسەرمەزاری شەهیدانی هەڵەبجە دانەنا
عومەرمحەمەد
رۆژی 21/12/2008 خۆپیشاندانێكی گەورە لەشاری هەڵەبجە سازدرا‌و خۆشبەختانە جەماوەرێكی زۆر كۆبوونەوە، هەریەك لە قایمقامی هەڵەبجەو كۆمەڵەی قوربانیانی چەكی كیمیاوی ووتاریان خوێندەوە، زۆرێك لە ڕێكخراوە مەدەنیەكان!و حزب‌و لایەنە سیاسیەكان تاج‌و چەپكەگوڵی رێزلێنانیان لەسەر مەزاری شەهیدان دانا. بەڵام ئێمە (ناوەندی چاك) وێرای بەشداریكردنیشمان نە وتارمان خوێندەوەو نە (گوڵ) یشمان لەسەرمەزاری شەهیدان دانا.. بێگومان ئەوەش لەخوێن ساردیمانەوە نەبوو، بەڵكو بەپێچەوانەوە.
كە ووتارمان نەخوێندەوە، بێ قسە نەبووین، بەڵكو لەبەر ئەوە بوو رێگەیان پێنەداین..! بۆچی ؟ وەڵامی ئەو پرسیارە لەلای لیژنەی باڵایە، وادیارە هەتا ئێستاش بەئاژاوەگێرو موخەریبمان دەزانن، دەنا بیرۆكەی خۆپیشاندانەكە ئێمە بووین، ئەمە خۆ قەبەكردن نیە، بەڵكو حەقیقەتە، زۆریش هەوڵماندا كە ئەو ڕۆژە نابێ لە هەڵەبجە رۆژێكی ئاسایی بێت، نابێت وەكو ڕۆژانی تر تێپەرێت، وەلێ سەرەتا بەدەنگەوە هاتنێكی ساردوسڕهەبوو، ترس هەبوو لە قەرەباڵغی خەڵك، زۆرمان ووت: سەبارەت بەوەی ئامانجمان چیە..پێشتریش لە 21/8/2006 لە رۆژی دادگایی كردنی تۆمەتبارانی ئەنفال هەروامانكرد، لەگەرمیان‌و شۆرش بەتایبەتی‌و لەكوردستان بەگشتی چالاكیەكانمان چڕكردەوە، تەنانەت بۆ ئەو مەبەستە لەگەڵ وەزارەتی ناوخۆو وەزارەتی كاروباری شەهیدان‌و ئەنفالكراونیش مشتومرێكی زۆر مانكرد.. ئامانجیشمان خۆ دەرخستن نەبوو، بەڵكو بۆ ئەوەبوو رێز لەقوربانیانی ئەنفال‌و دادگاو دەستەی دادوەری دادگاكەو دەستەی داكۆكی كار لە قوربانیان بگرین، مەبەستمان بوو پەیامێكیش بدەینە دادگاو پێی بڵێین ئێمە ماوین، دەمانەوێت ئێوەش دادگایەكی سەربەخۆو دادگۆ بەرێوەبەرن، دەمانزانی ئەو ڕۆژە كامێرای دونیا چاوی لەسەر ئێمەیە. بێگومان لەرۆژی 21/12/2008 لەهەڵەبجەش هەمان ئامانجمان هەبوو، خۆ بەنیاز نەبووین دروشم لە دژی حكومەتی كوردستان بەرزبكەینەوە، تا سانسۆر بكرێن..؟!
كەتاجە گوڵینەشمان لەسەرمەزاری شەهیدان دانەنا، لەبەر ئەوەبوو كەوا لەو داب‌و نەریتە باوە دور بكەوینەوە، كەجگەلە ئەتەكییەتێكی لوتبەرزانە شتێكی ترنیە، دەنا وەكو چۆن توانای نوسینی چەند لافیتەیەكمان هەبوو توانای كرینی چەپكە گولێكی پلاستیكیشمان هەبوو.
ئەو راستیە لەكەس شاراوەنییە لەوەتەی تاجە گوڵینە لەسەر مەزاری شەهیدان دادەنرێ ماڵوێرانی زیاتر بۆ كەسوكاریان دێتەپێشێ..؟ نازانم بەرپرسان چۆن خۆیان بەوەقایل دەكەن،كە بەچەپكە گوڵ‌و تاجە گوڵینەی گرانبەهاوە دەچنە گۆرستان، كەچی بەلالوتەوە وەڵامی زیندووەكان دەدەنەوە.! ئەرێ ئەوانەی ئەمرۆ چەپكە گوڵ لەسەرمەزاری شەهیدان دادەنین هەرئەوان نەبوون بەگوللەی شەڕی ناوخۆ كوڕانی ئەم میللەتەیان خەڵتانی خوێن كرد..؟ با بەگوڵی پلاستیكیەوە نەچنە سەرمەزاری شەهیدانی هەڵەبجەو بەگوللەش وەڵامی داخوازیەكانی خەڵك نەدەنەوە.
ئاخر خەڵكینە ڕەوایە شارێك بەبۆنی سێو بخنكێنرێ‌‌و بەگوڵی پلاستیكی دڵخۆشی بدرێتەوە..؟ هەر بۆیە ئێمە ئەو نەریتەمان پیادە نەكرد..؟ بەڵكو رەخنەشمان لە رێكخراوە مەدەنیەكان بەتایبەتی ئەوانەی هەڵەبجە هەیە كەبەهەمان نەفەس‌و نەغمە چوونە سەرمەزاری شەهیدان.. دیارە مەبەستم لەو رێكخراوانەیە كەجدین‌و بەتەنگ ئایندەی ئەم كۆمەڵگایەوەن، دەنا ئەوانەی پاشكۆی دەسەڵاتن یان بازرگانی بەو هەموو خوین‌و ئێسك‌و پروسكەوە دەكەن گللەییان لەسەرنیە.
ئەوەشی لەم بارەیەوە رەخنەمان لێدەگرێت‌و تانەوتەشەرمان لێدەدات، هەرئەوەندە وەڵامی پێویستە، كەپێبلێم : ئەو كاتەی سەرقاڵی بەدادگایی گەیاندنی فرانس ڤان ئانرات بووین، ئەوان سەرقاڵی چی بوون..؟ ئەوكاتەی كۆنە بەعسیەك، بەرپرسێكی گەندەڵ، سوكایەتی بە قوربانیانی هەڵەبجەو ئەنفال دەكات.. ئەو هەلوێستی چیە..؟ ئێستا كە فرۆكەوانێكی تۆمەتبار لەدادگا دەشارنەوەو نایدەنە دەست یاسا.. ئەو بێ یاساییە ناودەنێ چی‌و هەڵوێستی چیە لەبەرانبەری..؟ ماوەتەوە بلێم ئەرێ تۆ كە لە هەموو ئەو پێشیلكاریانە بێدەنگ بووی، چەپكە گوڵی چی دەبەی بۆ سەرمەزاری شەهیان‌و تانەی چی لەئێمە دەدەی ؟ ئەگەر زیندووەكانی ئەو شارە بەتایبەتی بریندارەكانی لەمەینەتیدابن، تاجە گوڵینەی سەرمەزاری شەهیدان دەبێتە مایەی رێزو وەفاداری یان روپامایی ..؟
