هەڵوێست

مارس 11, 2015 Omer ئه‌نفال لێدوان نووسین ناچالاککراوە لە هەڵوێست

---

هەڵوێست

سمكۆ سابیر

رۆژی 14/4 ی ئەمساڵ، لەیادی 27 ساڵەی تاوانی ئەنفال لەگۆڕستانی دێبە،دوای كۆتایی هاتنی مەراسیمەكە،تادوای نیوەڕۆ بەهۆی چەند كارێكەوە چەند رۆژنامەنوس ‌و كەناڵ ‌وچالاكوان ‌و هەندێک لە تاقانەكانی ئەنفال لەسەر ئەو مەزارە مابوینەوە.

ئەوەی مایەی سەرنجی ئێمە بوو تاقە ژن‌و پیاوێك بوون کە لەوێ‌ مابوون، ئاخۆ بۆچی لێرە ماونەتەوە، وتم رەنگە كێشەی ئۆتۆمبیلیان هەبێ و نەگەنەوە شار؟! بەڵام دوای ئەوەی پرسیارم لێكردن، تێگەیشتم كەئەو دوو مرۆڤە میهرەبانە، عەزیزمحەمەد قەرەداغی ‌و فاتمە حسێن قارەمان هاوسەری یەكترن . ئەوان لە گوندی مەسۆیی قەرەداغەوە هاتبوون بۆ مەراسیمی یادەی ئەنفال.

کە لێیان نزیكبومەوە دواتر تاقانەكانیش گەیشتنە لایان ‌و لە دوای بەخێرهاتن و پرسیاركردن هەموومان سەری ریزمان بۆ هەڵوێستەکەیان دانەواند، زۆر تكامان لێكردن كە دەبێت بۆ پشوو نانخواردنی نیوەڕۆ میوانمان بن . بەلام ئەوان قایل نەبوون ، زوو زوو ئەوەی دووبارەیان دەكردەوە ئەوە بوو کە دەیانگووت: ئێمە ئەركی خۆمانمان بەجێهێناوە و هاتووین بۆساڵیادەكە، ئیدی هیچ شتێكی تربەلامانەوە گرنگ نییە، نەبرسێتی ‌و نەهیلاكبوون، ئێمە بۆ بەجێهێنانی ئەوئەركە پیرۆزە، خۆمان بەبەختەوەر دەزانین ‌و پێمانوایە هەردەبوو بهاتینایە.

لەگەڵ تاقانەكانی ئەنفال، كە نزیكەی 10 كەس دەبوون، زۆر هەوڵماندا بیانبەینەوەو پشوویەک بدەن بەلام رازی نەبوون دواتر لەوەش تێگەیشتم عەزیز، شاعیریشە و شیعرێكی بۆ ئەنفال نوسیوە و دەیان وێنەی ڵی كۆپیكردوە و دابەشیكردووە. بەڕاستی لەلایەك زۆر دڵخۆشبووم بەو هەڵوێستە جوانەی ئەو دوو مرۆڤە، كەلەو رێگا دوورەوە هاتووون ‌وپابەندیی و هاوخەمی خۆیان بۆقوربانی ئەنفال ‌و كەسوكارەكانیان دووپاتدەكەنەوە.

ناوچەکەی ئەوانیش ” قەرەداغ ” لەقۆناغی دووەم ئەنفالكراوە، بەڵام هیچ كەسێك ناناسن ‌و لەوانەیە هیچ ناسیاوێكیان لەگەرمیان ‌و شارەكانی گەرمیان نەبێت، ئەوەی ئەوانی هێناوە بۆگەرمیان، ئەو پابەندییەیە كە بەداخەوە پوڵ وسامان لەلایەک و هەژاریش لەلایەکی ترەوە ئەو بیرورەفتارەی تاکی کوردی لاواز کردووە.

بەهیوام هەڵوێستی لەو جۆرە، ببێتە بەنەرێتێكی گشتی و لە هەموو كایەكانی كۆمەڵگە رەنگبداتەوە. دەبێت هەموو دۆسییەكانی تاوان ‌و جینۆسایدەكان لەنێو یادەوەرەی هەمومان، جێگەیەکی شیاوی هەبێت، نەك تەنها پەیوەندی بەهاوشاروكەسوكاری قوربانیانەوە هەبێت.. كەواتە، دەبێت دڵخۆش بین بەوی كە هێشتا مرۆڤی جوان ‌و خاوەنی هەڵوێستی نیشتیمان پەروەرانە ماون, وەڵێ‌ كۆمەڵگەی ئێمە نایانبینێت ‌ونایاندۆزێتەوە.كەسانێك ئەو رێگایە ببڕن،كەچی كەسانێك هەن لەشارەكەی خۆتن نەئامادە دەبێت ‌و نەبڕواشی بەشتێك ماوە، كەناوی ئەنفالە.بۆیە دەڵێم:چەند ئاسوودەن ئەوانەی هەوڵدەدەن وێژدانی خۆیان ئاسوودەبكەن لەڕێگەی كاری مرۆڤدۆستانە و رێز گرتن لەمرۆڤ ‌و كۆی ئەو پرسانەی دەبێت لەناخەوە رێزی لێبگرین ‌و پێوەی پابەندبین، وەك پرسێكی مرۆیی ‌و ئەخلاقی لەفكرو كرداری خۆماندا.

سه‌رنجه‌كان

---