لەو دیوی چیرۆکەکانمەوە ئەو دوو مرۆڤەش ببینن
لەو دیوی چیرۆکەکانمەوە ئەو دوو مرۆڤەش ببینن
ئەنفالستان
نازانم پیویست بە داوای لێبوردن دەكات كە لەنێوان هەندێک دڵسۆزی تردا بەتایبەتی ناوی ئەم دوومرۆڤە دێنم یان نا؟ چونكە مەگەر تەنها خۆم‌و مۆبایلەكەم بزانین کە (مەلا ئیدریس و پشكۆ محەمەد) چەندە پێمەوە ماندوو بوون..مەگەر هەركۆمپانیای ئاسیا بزانێ لە گیرفانی خۆیان چەند كارتی مۆبایلیان بۆ دەرچوونی ژمارەیەکم خەرجكردووە.. هەمیشە یەكێكیان لەسەرخەتبوو.. جاری وا هەبوو ئاگایان لەماندوویتی سەرنوسەر دەبرا.. خۆ خوانەكا بموێرایە بلێم ئەوكەم‌و كوریەم هەیە . بەڵام ئەوان ئەوەندە هەستیار بوون چ پێویستی بەوتن بوو؟ بێئەوەی بەمن بلێن كەلێنەكانیان پڕدەكردەوە.. رۆژێك پشكۆ ئۆتۆمبیلەكە(ئۆپڵە پیر)ی لێوەرگرتم ووتی كارم پێیەتی‌و رۆیشت.. كە گەرایەوە هیچی نەوت .. بەلام بۆ ڕۆژی دوایی کە تەماشا دەكەم جووتێك تایەی تازەی خستووەتە ژێر.! كە پرسیم ئەوە تۆ چیت كردووە؟ ووتی برا چۆن دەهێڵم ئەنفالستان بێ (پا) بێت؟! لە رۆژانی بێكارەبایشمدا كاك پشكۆ محەمەد رۆستەم ووتی ئەمساڵ ئەنفالستان چۆن دەردەكەیت؟ ووتم بەهەر قیمەتێك بووە ناهێڵم بووەستێ.. پرسی: ئەی كارەبا؟ ووتم جارێ نازانم.. من ئەوکاتە خەتی مووەلیدەشم نەبوو، پێموانیە هەفتەیەك بەسەر ئەم قسانەدا تێپەریبن رۆژێكیان لە كەلارەوە هاتبوو بۆ سلێمانی بێئەوەی لە دەرگابدات بە تەلەفۆن ووتی: هام لەبەردەرگا كە چوومە پێشوازی‌و فەرموومكرد بۆ ژووەرەوە، ئەو صندوقی سەیارەكەی كردەوەو ووتی: با ئەوە داگرین.. ئەوکاتە هێشتا کێشەی فەقەراتم نەبوو، تەماشادەكەم موەلیدەیەكی تایگەری 12ئەمپێری لە پاكەتەكەدا هێناوە، بەرلەوەی بهێلێت دەم بكەمەوە ووتی: (نەی گەرەكە قسەی نەگەرەكە ئەمە هین توو نیە ئەمە هین (ئەنفالستان)ە. گەرەكمە ئەمسالیش دەربچێت).
دڵنیام ئەگەر ئەو موەلیدەیە نەبوایە بە بێنەو بەرەیەكی زۆر زیاتر ئەم ژمارەیە دەردەچوو.. ئەم هەلوێستەی پشكۆ هەردووچاومی پركرد لەئاو دڵم پربوو لە گریان.. هەم خۆشی وهەم ناخۆشی، ئێستاش كە ئەم چەند دێرە لە بارەیەوە دەنوسم دیسانەوە دڵم پرە ئەمە جگەلە گەورەیی پشكۆوگەرمیانیەكانی تر لە پێش هەمووانەوە مامۆستا نەجیبی هێنایەوە یادم ئەو هەلوێستانەی كاك پشكۆ‌ومەلا ئیدریس كت‌ومت هەڵوێستی مامۆستا نەجیب گەرمیانی بوون. دوای مەرگی مامۆستا نەجیب مەلا ئیدریس زوو زوو زەنگێكم بۆ دەكاو دەڵێت: ( بنوسە فڵان ئەوەندە دینار فیسار ئەوەندە هەزار.. ئامان لە بیری نەكەیت ها حەیامان دەچێت) .ئەمە هەمان ئەو قسەوکارانە بوون کە مامۆستا نەجیب دەیکردن !
دوای ئەوەی خۆم كۆنترۆڵكرد‌و نەمهێشت پشكۆ بەدڵی پرو فرمێسكەكانم بزانێ هەزاران نەفرەتم لە دڵرەقەكانی رۆژگاركرد، نەفرەتم بۆ ئەو كاربەدەستانەش نارد كە ساڵی رابوردوو لەفەرمانگەكەمدا بەو پەری ترسنۆكی‌و دڵرەقیەوە خەتی ئینتەرنێتەكەمیان لێدەبریم‌و بریاری دانە گیرساندنی موەلیدەیان لە دژم دەدا، تەنها بۆ ئەوەی پەكی ئیشەكانم بخەن لە كاتێكدا باشیش دەیانزانی من خەریكی چیم‌و ئەنفالستان چ هەمبانەیەکی چیرۆکی مرۆڤە ئەنفالکراوەکانەو نافرۆشرێ‌‌و كاری خۆبەخشە. فەرمانگەکەشمان بەحساب رێکخراوی ئاوەدانکردنەوەو ئینسانی بوو! بەڵام مەلا ئیدریس‌و پشكۆ كارێكیانكرد هەموو ماندووبونێكیان لێسەندمەوەو توریاندا. ووتیان هەستە، ئێستا كەی وەختی دانیشتنە قەڵەم لەتۆو هەوڵ لە ئێمە. نابێت ئەوەشم لە بیربچێت ئەوكاتەی کە كۆمپیوتەرەكەم ئینتیحاری كردو سوتا، هەر ئەوەندەم زانی پشكۆ زەنگی لێدا‌و وتی بڕۆ لە سەیارەی ژمارە ئەوەندەی خەتی كەلار كۆمپیوتەرێكم بۆ ناردوی وەریبگرە.
هەرچەندە ئەم چەند دێرە بەباڵای ئەو دوو مرۆڤە نیە. بەڵام بۆ ئەوەی نەچینە قاپی موجامەلەوە با هەڵویستەكانی تریان لێگەڕێین. كورد ووتەنی بەكەم نەزانین بەزۆریش فت.
تیبینی : ئەم پێزانینە ساڵی ٢٠٠٧ نوسراوە بەداخەوە ئیستا مەلائیدریس لە ژیاندا نەماوەو لە رێکەوتی ٣٠/١١/٢٠١١ بەدەستی رەشی تیرۆرستان شەهیدکرا. نابێت ئەوەش لەبیر بکەم کە لەژمارەکانی داهاتووش چەندین ئازاوبەئەمەکی تر هاتنە پیشەوەو بەقەلەم و بە شیوازی جیا بوونە کارەکتەرەکانی پشتەوەی دەرچونی گۆڤاری ئەنفالستان
