سهردێرهكان
- تاوانی ئەنفال بۆ نەوەکانت بگێڕەوە! با گۆپتەپە دووبارە نەبێتەوە… سروە نوری ئەزیز
- عەجاج وەک ئایشمان ………………..سەیوان محەمەد
- لە سێدارەدانی عەجاج و لە گۆڕنانی دۆسێی جێنۆساید ……………………………هۆمەر محەمەد
- خراپەکاریی سادەکردنەوە: ستراتیژی سادەکردنەوەی تاوانەکانی جینۆساید لای دەستەبژێری سیاسی کورد. ……………….. ئیبراهیم سادق مەلازادە
- عجاج التكريتي بين عقوبة الدنيا وحساب الآخرة. د. سەربەست نادرعبدول
ڕاستیەکی تاڵ و یادی کیمیابارانی گۆپتەپە
عومەر محەمەد
راستی تاڵ
لە یادی کیمیابارانی گۆپتەپەدا دەبێت دۆسێیەک باس بکەم کە باس نەکراوە، دۆسێی منداڵانی ونبوو، ئەوانەی کوردن و شوناسیان گۆڕاوە، بۆعەرەب و تورکمان دۆزراونەتەوەو دۆسێکەیان خراوەتە بەردەم حکومەت و پەرلەمان بەڵام ئەفسوس وەک نەیان بیستبێت لێی بێدەنگن. (تکایە بروانە پاشکۆکە)
چیرۆکی ئەم دوو منداڵە
١- لەساڵی ١٩٨٨ (ئایشێ) تەمەنی ١٣ ساڵ بوو، کاتێک ئەفسەرێک لەو هەموو تەرمەی ناوگوندەکە رادەمێنێت و دەبینێت ئەم کچە زیندووە، رادەستی ئەمن و پرۆسەی کۆمەڵکوژییەکەی ناکات، بەڵکو دەیخاتە ناو تویتا لانکروزەکەی و دەینێرێتەوە بۆ ماڵی خۆیان لە شاری بەسرە، چونکە بەبۆچونی ئەو ئەم منداڵە هیچ کەسێکیی نەماوە، ئێستا ئەم کچە شوناسی لەکوردەوە گۆڕاوە بۆ عەرەب وهاوژینی پیاوێکی عەرەبی بەسراییە کە خزمی ئەفسەرەکەیە. چیرۆکەکەی درێژە بۆ ئەم یادە ئەوەندە بەسە .
٢- هاوراز، قوربانی تراژیدیای هەمان گوندە، ساڵی ١٩٨٨ تەمەنی تەنها ٦ مانگ بووە، جاشێک لە نزیک تەرمی دایکی دەیدۆزێتەوەو هەڵیدەگرێت و دەیباتەوە بۆماڵی خۆیان، بەڵام لەبەرئەوەی هاوژینەکەی بەسکێک دوو منداڵی دەبێت ناتوانێت ئەمیش بەخێو بکات، جاشەکە هاوراز دەدات بە برادەرێکی خۆی کە سەربازێکی عێراقی بەرەگەز تورکمانە، سەربازەکە دەیبات بۆ ماڵی خۆیان لە کەرکوک بەخێوی دەکات. ئێستا هاوراز تەمەنی ٣٢ ساڵەو هەر لەکەرکوکە و شوناسی گۆڕاوە بۆ تورکمان .
تێبێنی :
١- ناوی ئایشێ و هاوراز، خوازراون و ناوی راستەقینەیان پارێزراوە.
٢- ساڵی ٢٠٠٩ ەتا ٢٠١٣ لەگەڵ خانەوادەکەی هەوڵێکی زۆرماندا ئایشێ ئەگەر بۆ تەنها جارێکیش بووە، بهێندرێتەوە بۆ کوردستان یان کەسوکاری بچن بۆلای بەڵام هیچ لایەنێکی پەیوەندیدار بەپەرلەمانیشەوە ئامادەی هاوکاری نەبوون .
٣- لەگەڵ هاوراز، کچێکی تریش دۆزرابووەوە، بەلام بەختی ئەوەی هەبوو هەر لەلای جاشەکان مابووەوە دواتر، کچەکە رادەستی کەسوکاری کرایەوە چیرۆکی ئەو کچەو هاورازیش لەرێگەی مامۆستا بەختیارشێخ لەتیفەوە گەیشتە من و خانەوادەکەی.
بەداخەوە هێشتا هیچ هەنگاوێکی یاسایی بۆ دۆسێی ئایشێ و هاوراز نەنراوە، ئایشێ هێشتا نەبینراوە بەڵام لەرێگەی کۆمەڵایەتیەوە کەسوکاری چون بۆ کەرکوک و هاورازیان بینیوە.
