سهردێرهكان
- مفهوم الإبادة الجماعية بين النظرية الأكاديمية والتمييز قراءة نقدية لمنشورات الأمم المتحدة ………..هومر محمد
- مەترسی ئەنفالکردنەوەی ئەنفال دادگایکردنی عەجاج. …………..ئیبراهیم شێخ وەسانی
- تاوانی ئەنفال بۆ نەوەکانت بگێڕەوە! با گۆپتەپە دووبارە نەبێتەوە… سروە نوری ئەزیز
- عەجاج وەک ئایشمان ………………..سەیوان محەمەد
- لە سێدارەدانی عەجاج و لە گۆڕنانی دۆسێی جێنۆساید ……………………………هۆمەر محەمەد
ژمارە (١٣)ی گۆڤاری ئەنفالستان بخوێنەرەوە
ژمارە (١٣)ی گۆڤاری ئەنفالستان بخوێنەرەوە
بۆچی ئەم ژمارەیە بە P.D.F و بەشێوەی ئەلیکترۆنی دەردەچێت ؟
خوێنەری خۆشەویست
ساڵی (٢٠٠٤) یەکەمین ژمارەی ئەم گۆڤارە لەلایەن وەزارەتی ڕۆشنبیری حکومەتی هەرێمی کوردستانەوە لەچاپ دەرچوو، هەرچەندە ئەوسا حکومەتی هەرێم پارەوپولێکی زۆری لەبەردەستدابوو، بەڵام سەرباری ئەوەی پارەیەکی زۆریش بەهەدەردەدا بەڵام ئامادە نەبوون ژمارە (٢) دەربکەن، بێگومان ئەوەش ئاماژەی ئەوەیە دۆسێی ئەنفالیان بەلاوە گرنگ نیە، دەنا ئەگەر گۆڤاری ئەنفالستانیشیان بەلاوە پەسەند نەبوایە خۆدەبوو گۆڤارێکی لەوە باشتریان دەربچواندایە.
بەڵام ئەم کەمتەرخەمییەی حکومەت نەبووە مایەی ساردبوونەوەی ئێمە و وەک دەزانن هەموو ساڵێک ژمارەیەکی گۆڤارەکە وەک ساڵنامەیەک لە چاپ دەرچووەو وەک بەژمارەکانیەوە دیارە ساڵ بەساڵ گەشەی کردووەو دەستی بەناوچە دورە دەستەکانیش گەیشتووە، نەک هەر ناوچەیی نەبووە، بەڵکو بەسنوری هەرێمی کوردستانیشەوە نەوەستاوەتەوەو ئاوری لە جینۆسایدی وڵاتانی ترو کیمیابارانی سەردەشت وکۆمەڵکوژی دەرسیمیش داوەتەوەو بەتیراژی زۆر بەدیزاین و بەرگی تایبەتی خۆیەوە گەیشتووتە دەستی خوێنەرانی و بەتایبەتیش لەناوچە کیمیابارانکراوو ئەنفالکراوەکاندا بەخۆرایی وبەبێ بەرانبەر دابەشکراوە.
ئەمرۆش کە خەڵکی هەرێمی کوردستان لە قەیرانێکی ئابوری قورسدایەو هەرێمی کوردستان لەدۆخێکی سیاسی ئاڵۆزدایە، کاریگەری بۆ خاوکردنەوەی ئێمە نەبووەو هەر بەردەوام بووین و بەبەردەوامیش دەمێنینەوە . نەک هەر ستافەکە بەڵکو سەرباری برینی موچەی فەرمانبەران هێشتا دڵسۆزی زۆر هەن کە برێک لە داهاتی خۆیان دەخشنە دەرچوونی ئەم گۆڤارە، بەڵام لەبەرئەوەی زۆری کۆمەک بەخشان لەکەسوکاری ئەنفالکراوانن و بەزۆریش دانیشتووی، کەلارو کفری و خورماتوون، بۆیە بەباشمان زانی لەبری بەخشینی برێک پارە بە دەرچوونی گۆڤارەکە کۆمەکەکەیان ببەخشنە هەرکەسێک کە پێویستی پێیەتی، یاخود خۆیان بە بەباشی دەزانن کۆمەکی بکەن . چونکە بەراشکاوی و بە ئازایەتیەوە دەیڵێین بەلامانەوە گرنگترە منداڵێک بێ شیروخۆراک نەبێت نەک بری ٦ هەتا ٧ ملیۆن دینار بدەین بە کاغەزی چاپخانە، ئێمە دەتوانین بەشێوەی (P.D.F) و ئۆنلاین بڵاوبکەینەوە بەڵام ناتوانین چاو لەبرسی بوونی منداڵانی ئاوارەی خورماتوو بنوقێنین .
بەهیواین ئەم قەیرانە درێژە نەکێشێ و قوڵتر نەبێتەوەو ژیان و شکۆ بگەرێتەوە بۆ خەڵکی کوردستان و کۆمەک بەخشە دڵسۆزەکانی ئەنفالیستانیش بە شەوقێکی زیاترەوە بێنەوە پێشێ و گۆڤاری ئەنفالستانیش هەم لەچاپخانەو هەم بەشێوەی ئۆنلاین بە تیراژێکی زۆرتر و دیزاینێکی جوانتر بێتەوە بەردیدەتان .
ئێمە بەبەردەوامی دەمێنینەوەو ئێوەش خوێنەرو دۆست وهاوکارمان بن .
بۆ خوێندنەوەی کلیک لەسەر (ئەنفالستان- ژمارە ١٣ ) بکە
