عەبدولكەریم سەعید : دەڵێم بەڵكو ئەمە خوایە لەو عەرەبانەی هاتوون لێرە كاردەكەن یەكێكیان كورەكەی من بێت‌و عەرب نەبێت .

حوزەیران 16, 2016 Omer دیدار لێدوان نووسین ناچالاککراوە لە عەبدولكەریم سەعید : دەڵێم بەڵكو ئەمە خوایە لەو عەرەبانەی هاتوون لێرە كاردەكەن یەكێكیان كورەكەی من بێت‌و عەرب نەبێت .

---

عەبدولكەریم سەعید :

دەڵێم بەڵكو ئەمە خوایە لەو عەرەبانەی هاتوون لێرە كاردەكەن یەكێكیان كورەكەی من بێت‌و عەرب نەبێت .

عومەر محەمەد

عەسرێكی درەنگ وەختی رۆژی ٢١/١/٢٠١٢  لە ئۆردوگای صمود گیرسامەوە، ئەو ئۆردوگایەی کە لەدوای راپەرینەوە بەهەق ناونراوە رزگاری! لەبارەگای لقی رزگاری كۆمەڵەی داكۆكی لە قوربانیانی ئەنفال، چاوم بەم پیرەمێردە كەوت‌، هەرچەندە من لە تاڵوکەدا بووم و کاتی ئەوەم بەدەستەوە نەبوو بۆ دیمانەسازی دابنیشم، بەڵام بەپێویستم زانی هەرچۆنێک بووە، دیدارێكی كورتی لەگەڵدا ئەنجام بدەم .

مام عەبدولکەریم خۆشی نەیدەزانی بۆچی هاتووە بۆ بارەگای کۆمەڵەکە، ئەو هێندە ماندوشەکەت بوو، نە حەوسەڵەی قسەی هەبوو، نەیادەوەریشی هاوکاربوو بۆئەوەی دیدارێکی باشتری لەگەڵدا ئەنجام بدەم، ئەو پیاوە بەرلە پەلامارەكانی ئەنفال لە گوندی قولیجانی سەرحەد نیشتەجێ بووەو خەریکی ئاژەلداری وکشتوکاڵ کردن بووە، لەپەلاماری ئەنفالی گەرمیاندا زەرەری زۆری کردووە ئەوسا دانیشتووی گوندی (قوڵیجانی سەرحەد) بوون کەوا نزیكەی 20 ماڵێک بوون، خەڵكەكەی بە هەژاری خۆیان قایل بوون‌و لە گوندەكەیاندا خەریكی كشتوكاڵ‌و ئاژەڵداری بوون . بەڵام بەداخەوە ئەم گوندە لەئەنفالدا گورزی کوشندەی بەرکەوت و خەڵکێکی زۆری ئەنفالکران و خانووەکانی لەگەل زەویدا تەختکران ، ئێستاش تەنها 3 ماڵی تێدا ئاوەدانکراوەتەوە .

عەبدولكەریم ئێستا تەمەنی بەتەواوی هەڵكشاوەو لە ئۆردوگای (صمود)  ڕزگاری نیشتەجێیە‌و تەنها تاكە كورێكی بۆماوەتەوە بەناوی ( محمد ) ئەویش بە ئازایەتی خۆی لە ئەنفال دەربازی بووە، دەنا كۆی خانەوادەكەی، كە بریتی بوون لەهەدوو ژنەكەی بەناوەكانی (مەحسە حمەئەمین قادر) و (جەیران حاجی تۆفیق) هەروەها چوار منداڵ‌و دوبراو برازاكانی ئەنفالكراون و خۆشی گیراوەو بە قۆناغەكانی گرتن‌و جیاكردنەوە‌و زیندانەكانی قۆرەتوو تۆپزاوادا تێپەریووەو دوای شەش مانگ بەكەنەفەتی لە زیندانە نەفرەتیەکەی نوگرەسەلمان بەبێ کەسی گەڕاوەتەوە بۆ صمودی ئەوساو رزگاری ئێستا.

جەیرانی هاوسەری بەچوار مندالەوە سێ كورو كچێك ( لوقمان‌و حەیدەرو صدیق‌و كوێستان) ئەنفالکراون و مەحسەسەش لە نوگرەسەلمانەوە گەراوەتەوە.

مایەی تێڕامانە ئەم پیرەمێردە هێشتا بە ئومێدی گەرانەوەی کورەکانیەوە دەژی و چاوەڕوانی هاتنەوەیان دەكات‌و دەڵێت : ( ئێستاش هەرچاوەڕوانم، دەڵێم ئەمە خوایە بەڵكو عەرەبێك كوڕەكانمی هەلگرتبێ‌‌ و ئێستا گەورە بووبن‌و هاتبن بۆ ئێرە بۆعەمەلە،(کریکاری) بۆیە هەر لەم ناوە گڕئەخۆم‌و دێم ودەچم و لەبەرخۆمەوە قسە دەکەم و ئێژم.. بەڵكو ئەمە خوایە لەناو ئەو عەرەبانەدا پەیدا ببنەوە .) ئەمە قسەی مام عەبدولكەریم بوو .  دواجار شوكرانەی بۆ كوڕەكەی خۆی‌ و حكومەت كرد: وتی كورەكەم زۆر بۆم باشەو حكومەتیش موچەمان پێدەداو خانوویان بۆكردووم ‌و لێیان ڕازیم .

سه‌رنجه‌كان

---