بە بۆنەی ٢٨ـەمین ساڵوەگەڕی کیمیابارانی شاری سەردەشت، قوربانیانی کیمیابارانی شاری نۆدشە پەیامێکی هاودەری ئاراستەی قوربانیانی کیمیابارانی شاری سەردەشت دەکەن.
لە بەشێکی پەیامی قوربانیانی کیمیایی بارانی شاری نۆدشەدا هاتووە کە ” ێمەی قوربانیان و بەجێماوانی کیمیابارانی نۆدشە، پەیامی ئاشتی و یەکیەتی کێو بە کێو لە شاهۆ و داڵانیەوە بە خەڵکی لێقەوماوی شاری سەردەشت دەگەیەنین.
دەقی تەواوی پەیامە کە،
٧ی پووشپەڕی ١٣٩٤ی هەتاوی، ٢٨ ساڵ بە سەر کیمیابارانی شاری سەردەشت تێپەر دەبێت، جینۆسایدی سەردەشت، هەڵەبجە و نۆدشە درێژەی پرۆسەی کۆمەڵکوژی کوردەکانە لە رۆژهەڵاتی ناوەڕاست، پرۆسەیەک کە لە زهنیەتی کوردکوژی و دیکتاتوری و ملهۆڕیەوە سەرچاوەی گرتووە، شەڕ تەواو بوو بەڵام زامەکانی خەڵکی سەردەشت و نۆدشە هێشتا هەرنوێیە و ساڕێژ نەبوونەتەوە.
ئێمە خەڵکی خۆڕاگری نۆدشە وێڕای وەبیر هێنانەوەی بیرەوەری تەواوی شەهیدان و کەمئەندامانی کیمیابارانی شاری سەردەشت، هاوخەمی و هاودەردیی قووڵی خۆمان بۆ ئەو بەرێزانە و بنەماڵەکانیان رادەگەینین.
ئەوەیکە سەدام حوسین لەگەڵ هاووڵاتیان و هاونیشتمانیانی ئێمەی کورد کردی بە هێچ شێوەیەک قەرەبوو ناکرێتەوە، هەر بەو بۆنەوە هەموو ئینسانە ئازادیخوازەکان چاوەڕوانن کە پشتیوانانی سەدام حەسین و ئەنجامدەرانی ئەو تاوانە سزا بدرێن و پەروەندەی بەرکەوتوانی کیمیاباران نەبەسترێت. خەڵکی ئازارچێشتووی نۆدشە تەواوی ئەو لایەن و کەسانەی کە لە کیمیابارانی ساڵی ١٣٦٦ی هەتاوی لە شارەکانی سەردەشت و نۆدشەدا دەستیان هەبووە مەحکوم دەکەن.
بە چاوخشاندنێک بە بارودۆخی ئێستا، ئەوەمان بو روون دەبێتەوە کە پێشێلکردنی ماف و ئازادییە سەرەکییەکانی مرۆڤ بە شێوەیەکی بەرفراوان و سیستماتیک درێژەی هەیە، وێڕای یادکردنەوەی کیمیابارانی شاری سەردەشت و مەحکووم کردنی ئەنجامدەرانی ئەو تاوانە و پێشێلکرانی مافی مرۆڤ، خوازیاری دابینبوونی ماف و ئازادیە بنەڕەتییەکان لە تەواوی جیهان داین و دەمانهەوێت تەواوی دەوڵەتەکان لە بەرامبەر نەتەوەکانی خۆیان بەرپرسیار بن و مافەکانیان دابین بکەن و دەست لە سەرکوتی خەڵک هەڵبگرن.
ئێمەی قوربانیان و بەجێماوانی کیمیابارانی نۆدشە، پەیامی ئاشتی و یەکیەتی کێو بە کێو لە شاهۆ و داڵانیەوە بە خەڵکی لێقەوماوی شاری سەردەشت دەگەیەنین.
