سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
مەرگی ژنێکی ئازاو ئازارچەشتو
مەرگی ژنێکی ئازاو ئازارچەشتو
بەداخەوە (ڕێژاو یابە بابا) ژنە ئازاو ئازار چەشتووەکەی گەرمیان ژیان ئاوایی کرد.
رێژاوو خانەوادەکەی بەرلەتاوانی ئەنفال، دانیشتوی گوندی کانی عوبێد بوون. لەپەلاماری سێی ئەنفالی گەرمیاندا مێردەکەی بەناوی (عەلی مەجید) و کوڕەکانی (حسێن و هوشیارو ئازاد)و خزم وکەسوکارێکی زۆری بەرشاڵاوەکە کەوتن و خۆشی دەستگیرکراو رەوانەی تۆپزاواو دواتریش رەوانەی نوگرەسەلمان کرا.
ئەم ژنە لەماوەیەکی زۆرکەمدا سێ کوڕی بەدوای یەکدا مردون، ئازادیان بەڕێگای (نوگرەسەلمانەوە یاخود تۆپزاواوە) مردووە، دوانەکەی تریشی (حسێن و هوشیار) لە نوگرەسەلمان لە تینوێتی و برسێتیدا بەپێش چاوی خۆیەوە گیانیان لەدەستداو لەوبیابانە بوونە خۆراکی لم و سەگەڕەشەکان.
دوای ٦ مانگ ئەم ژنە بەهیلاکی لە نوگرەسەلمان گەڕاوەتەوە.. تەنها سەبوری رژاوی ئەنفال دیدە ئەوەبوو کەلەدادگایی کردنی تاوانبارانی ئەنفالدا وەک شایەتحاڵ ئامادەبوو، یەکێک بوو لەشایەت حاڵە ئازاکانی گەرمیان کە بەبەرچاوی کامێراو دەستەی دادوەرییەوە، چیرۆکی ئەنفالکردنی گوندەکەیان و بەسەرهاتی خۆی و جیاکردنەوەی مێردەکەی و منداڵەکانی بۆ دادگاو دونیا گێڕایەوە. بەڵام نەدەوڵەت و نەدادگاو نەسەرۆک ونەحزبی کوردی وعێراقی نەیانتوانی ماف وئاسودەیی بۆئەم ژنەوتەواوی کەسوکاری ئەنفال بگێڕنەوە.
بەڵام ئەم ژنە ئازایە نە تاوانی ئەنفال و نەدڵڕەقی جەلادو نەبێ هەیبەتی دادگاو نەبێشەرمی سەرۆک وسیاسی کورد وعەرەب چۆکیان پێدانەداو وەک مرۆڤێکی بەرپرسیار هەمیشە چالاک و عەوداڵ بەدوای مافەکانی خۆی ئەوانی تریشەوە بوو، یەکێک بوو لەو مرۆڤانەی لەسەنگەری پێشەوەی داکۆکی کردن بوو لەماف وداوا ڕەواکانی خۆی و هەموو کەسوکاری ئەنفالکراوان.
ئەفسوس بیستم کە دادە ڕێژاو کۆچی دوایی کردووە، ئەم مەرگەش دوای ململانێیەکی زۆر لەگەڵ نەخۆشیدا کە دڵنیام چاوەڕوانی ئازیزانی زیاتر لەهەر نەخۆشییەک ئازاریان داوە. ئەمرۆ کۆچی دوایی کردو لەگەڵ خۆیدا ئاواتەکانیشی بردنە ژێرگڵ کەسەرەکی ترینیان دوای بێ ئومێدبوونی گەڕانەوەی ئازیزانی دادگایی کردنی تۆمەتبارانی ئەنفال بوو.
ساڵی ٢٠١٢ بوو، لەمەراسیمی یادی ئەنفالدا بینیم،
تراکتێکی بەرزگردبووەوە هەر بەقەڵەمێکی ماجیکی رەش لەسەری نوسرابوو (ئەنفال ئەم
بنەماڵە گەورەی نەههێڵا کوا ٣ کوڕم، برازاکانم، مێردەکەم ٣ برام ؟) هەر لەویادەدا
لێم پرسی:
– دەتوانم داوایەکت لێ بکەم ؟
– فەرموو
– دەتوانیت ئەم وێنەیەت و قسەکانت بگۆری بەم قسانە ؟
– وتی کامە؟
– (تکایە رێز لەخۆتان و
لەئێمەش بگرن چیتر پێمان مەڵێن پاشماوەی ئەنفال، ئێمەش مرۆڤین) – لەوەڵامدا وتی: ئەرێوەڵا رازیم، پێیان بێژە با ئاگاتان لەدەمتان
بێت ئێمەش ئینسانین) ئیتر لەسەر رەزامەندی خۆی بەرگی ژمارە ١٠ی ئەنفالستانم
بەوێنەی دادە ڕێژاوو تراکتەکەی دەستیەوە گۆڕی بەوە.. دواتر لەرێگەی کاک مەلا
تەحسینەوە سەلامی بۆناردبووم و پێی وتم کە ئەو گۆڕانکارییەی زۆر پێخۆش بووە.
بەداخەوە ئەمڕۆ ٢٨/١١/٢٠٢٣ (ڕێژاو یابە بابا) ژنە ئازاو ئازار چەشتووەکەی گەرمیان ژیان ئاوایی کرد. ڕوحی ڕێژاوی ئازارچەشتوو ئارام و ئاسودە بێت.. سەبوری و ئارامی بۆ کەسوکارە بەرێزەکەی .
