گومانم لە دڵسۆزی مالكی هەیە….. هۆمەر محەمەد
مانشێتی سەرەكی ژمارە (٧٧)ی هەفتەنامەی ئاوێنە، ڕێکەوتی ١٠/٧/٢٠٠٧ ئەوەیە كە نوری مالكی سەرۆك وەزیرانی عێراق، بە سەرۆكی هەرێم و سەرۆكی حكومەتی كوردستانی راگەیاندووە، پەتی سێدارە لە هەڵەبجە بۆعەلی حەسەن مەجید ئامادە بكەن.. من وەكو هاوڵاتییەك وێرای ئەوەی لە سیدارەدانی جەلادەكان لە كوردستان ڕەتدەكەمەوە، زۆریش گومانم لەم دڵفراوانییەی بەرێز مالكی هەیە، گومانەكەشم لەوێوەیە كە بۆچی بۆ هەزاران داواكاری ڕەوای خەڵكی كوردستان بەگشتی و شاری هەڵەبجە بەتایبەتی، مالكی مێشی میوان نیە؟ كەچی بۆ ورتەورتی لە سێدارەدانی عەلی حەسەن مجید لە هەلەبجە، گوێی سوكەو زۆر بە پەلە بەهانامانەوە دێت ؟! دڵنیام مالكی دەزانێ ئەم داوایەی كورد زۆرگچكەیە، نەجێبەجێكردنی كارێكی مەحاڵەو نەكوردیش سودێكی لێدەبینێ، بەپێچەوانەوە زۆریش زەرەرمەندە.
سەرۆك ئەگەر دەیەوێت، نییەت پاكی خۆی بۆ كورد بسەلمێنێت، كاری گرنگتری لە پێشە، بۆ ئەوەی رێز لە كوردو لە بریاری دادگای وڵاتەكەی بگرێت، با بە مەرسومێكی كۆماری داوای لێبوردن لە گەلی كورد واژۆ بكات، لەمپەر لە بەردەمی دەوڵەتی عێراق دانەنێت. ئەوەی سودی گەورە نەك هەر بە كورد وەكو نەتەوەیەكی جینۆسایدكراو، بەڵكو بەعێراقیش دەگەیەنێت و ڕوخساری لەبەردەم كۆمەڵگەی نیودەوڵەتی جوان دەكات. واژ‌ۆكردنی بریارێكی ئاوایە، ئەمە ئەركێكی سیاسی و ئەخلاقی دەوڵەتی عێراقە، كە ئەمرۆ بێت یان سبەی دەبێت پێی هەستێت.
بۆیە گومانم لەم موبادەرەیە‌و نیەت پاكی بەرێز مالكی هەیە.. چونكە وای بۆ دەچم بیەوێت، بەبەردێك دوونیشان بشكێنێت، لەلایەك سونەكان ئیستفزاز دەكاو كوردیش لە دوو بەرەكێی شەری مەزهەبیەوە دەگلێنێ، لەلایەكیش هەستی مردو پەرستانەی كورد دەوروژێنێ و داوا گچكەكانی ئەم میللەتە نیشانی دنیا دەدات. دەنا ئەگەر مەسەلەكە بەرژەوەندی و سۆزدارییە لەگەڵ ئەم میللەتە، ئەوا كورد زۆر داواكاری رەوای هەیە، لەپێش هەموویانەوە جێبەجێكردنی مادەی 140ی دەستور، سەنگی مەحەكی دڵسۆزی حكومەتی عێراق و سەركردایەتیەكەیەتی، بۆ چارەسەری كێشەكانی كورد لە عێراقدا.
من دەپرسم ئەگەر مەسەلەكە دلسۆزی و هاوسۆزیە لەگەڵ كورد، بۆچی پێشتر سەرۆك وەزیرانی عێراق، هێندە جەختی لەسێدارەدانی “صدام حسێن” گەورە تاوانبار دەكردەوە؟! مەگەر ئەمە نەدەچووە خانەی دڵسۆزیەوە بۆكێشەكانی كورد ؟ تری نیونەتەوەییدا بوو، بۆئەوەی بەلای كەمەوە “صدام” لەسەر هەردوو تاوانەكە سزا بدرایە.نەك لەبەرخاتری تاوانەكەی دوجەیل تاوانی ئەنفالی لەئەستۆ لابەرن.
تكام لە سەرۆكی هەریم و سەرۆكی حكومەت و سەركردایەتی سیاسی كورد ئەوەیە، ئەم داوایەی مالكی جێبەجێنەكەن و هەلەبجە بەم كارە ناشرین مەكەن، هەڵەبجە لانكەی ناوەندی رۆشنبیری كورد بووە، نەك شوێنی ئیعدامكردن، هێشتا هەناسەی بۆ نەگەراوەتەوە، باپەتی سیدارەی تیدا هەڵنەخرێ، ئەمە خزمەت نیە بەو شارەی دەكەن، كێ دەخوازێت چاكە لەگەڵ هەڵەبجەییەكان بكات، با كاریگەریەكانی تاوانی كیمیابارانی لەسەر كەم بكەنەوە، بەلای كەمەوە با كۆڵانەكانی قیرتاو بكەن و روخساری شاری رۆشنبیرانی بۆ بگێرنەوە.
ئەم بابەتە لە ژمارەی دواتری رۆژنامەی ئاوێنە بڵاوکراوەتەوە
