جێنۆسایدی بارزانییەکان چیرۆکی ئەو پیاوەی بارزانی نەبوو. …………………….هۆمەر موحەمەد
جێنۆسایدی بارزانییەکان چیرۆکی ئەو پیاوەی بارزانی نەبوو. …………………….هۆمەر موحەمەد
تاوانی جێنۆساید جگەلە کوشتارە مەترسیدارەکەی چیرۆکی سەرسوڕهێنەرو شۆک هێنەر دەخوڵقێنێ، زۆرجار چیرۆکە گرنگەکان لەناو وێنەگەورەکەدا ون دەبن و ناچنە مێژووەوە.
دوێنێ روفاتی ١٠٠ پیاوی بارزانی کە ٣٩ ساڵە بێ سەروشوێنن لەبیابانەوە هێنرانەوە، خۆزگە دەخوازم یەکێک لەوانە روفاتی خۆشابە یوحەنا بێت، کە بارزانی نەبوو. جگەلە کوردبوون و داکۆکی لەنەریتی کۆمەڵایەتی هیچ تاوانێکی نەبوو، هەموو تاوانی ئەو پیاوە ئەوەبوو جامادانێی سوری لەسەر بەستبوو. ئەگەرچی ئەو پیاوە بارزانیانەی بەکۆمەڵ کوژران هیچ دەسەڵاتێکیان لە شەڕوئاشتی نێوان دەوڵەت وحزبی کوردیدا نەبوو، ئەوان بەگشتی هەژاری ماڵی خۆیان بوون و بەعس ستەمێکی گەورەی لێکردن. ئەوە ئەگەر بۆ بارزانییەکان بەعس پاساوێکی هەبووبێ بۆ خۆشابە یوحەنا هیچ پاساوێکی نەبوو بەڵکو نیشانەیەکی زەقی شۆڤێنیزمی بەعس و دڕندایەتی پیاوان و سەرکردایەتیەکەیەتی.
چیرۆکی خۆشابە چییە ؟
چیرۆكی خانەوادەی (خۆشابە یوحەنا) زۆر ئازاربەخش و مایەی تێڕامانە، هەتا ئەوپەری ستەمكاری و مرۆڤ هەژێنە، گلیانا كوڕی خۆشابە یوحەنا كوردێکی بە ئاین مەسیحیە دەڵێت: (رۆژانی سەری ساڵ و جەژنان بۆ ئێمە پرسەن) باوكی گلیانا بارزانی نەبوو، خەڵكی گوندی بێدیال بوو، تاوانی ئەو پیاوە مەسیحیە تەنها ئەوە بوو كەوا وەك داب ونەریتی کۆمەڵایەتی جامادانێی سوری لەسەربەستبوو. كاتێك پیاوانی ئەمن و گاردی كۆماری بەمەبەستی گرتنی پیاوە بارزانییەکان گەمارۆی شاری دیانا دەدەن باوكی گلیاناو چەند كەسێكی دی كە بەهۆی دابونەریتەوە جامەدانێی سوریان لەسەر ناوە گرتوویانن. بەڵام ئەفسەرێك کە زانیبووی ئەو پیاوانە بارزانی نین و مەسیحین پێیان دەڵێت: جامادانێکانتان لەسەرتان فرێبدەن.. ئەوانیش دەڵێن چۆن فرێی دەدەین ئەوە داب و نەریتە ؟ ئەفسەرەكەش تورەدەبێ و دەڵێت: مادام وایە سەركەوون، ئەوانیش سواری ئەو پاسانە دەكەن كە بۆ گواستنەوەی بارزانییەكان ئامادەكرابوون، ئیدی هەر ئەو گرتنە بوو ڕۆیشتن و جارێكی تر نەگەرانەوە.
گلیانا ئاماژە بەوەش دەكات و دەڵێت لەپاشئەوە دایكی من هەمیشە دەگریاو دەپارایەوە هەتا رۆژێك دەماری سەری تەقی و خوشكێكیشم ( بەناوی نەهرێن) ئەوەندە بۆ بابی من پەرێشان بوو هەتا توشی نەخۆشی دەرونی بوو دواجاریش بەتەواوی بەتەواوی تێكچوو .
بەهیوام لەو ١٠٠ روفاتە یەکێکیان خوشابە یوحەننا بووبێت.
( بروانە ڕێكارێ مزوری- سەربۆرا تراژیدیاێن بارزانیان-2013-هەولێر – ل 212-213 .)
