کاتێک دەوڵەتدار، لە ئەخلاق دادەماڵدرێ
کاتێک دەوڵەتدار ، لە ئەخلاق دادەماڵدرێ هۆمەر موحەمەد
لە دوای تاوانی ئەنفال وهەڵەبجە کورد مافی بوو پارێزبەندی نێودەوڵەتی هەبێت، کەچی جارێکی تر بەر پەلاماری جێنۆساید کەوتەوە، ئەمە پێچەوانەی یاسای نێودەوڵەتییە! لە دونیای دکتاتۆرەکاندا هەڵەبجەو ئەنفال و لە دونیای بەناو دیموکراسیشدا تاوانی گەورەی شەنگال، نیشانەیەکی زەقی بێ مافی کوردو بێ ئابڕویی دەوڵەتی عێراق و کۆمەڵگەی نێودەوڵەتی و ئەو دەسەڵاتدارە لۆکاڵیانەشە کە جڵەوی مەرگ و ژیانی خەڵکیان بەدەستەوەگرتووە.
رۆژی ٣ی ئابی ساڵی ٢٠١٤ هێزە فشۆڵەکانی سوپای عێراق و پێشمەرگە لەبەردەم داعش هەڵاتن و ئێزدییەکانی شەنگالیان بۆ چەکدارە دڕندەو لە ئەخلاق داماڵدراوەکانی داعش بەجێهێشت، کۆمەڵکوژی پیاوان و ڕفاندن و دەستدرێژی سیکسی بۆسەر ژنان و وێرانکردنی ماڵ و حاڵی ئێزدییەکان بووە بە ئازارترین برین بەڕۆحی کوردەوە، ئەگەرچی پەلامارەکە وەک تاوانی دژە مرۆڤایەتی لە جیهاندا دەنگیدایەوە، بەڵام جگەلە ڕشتنی فرمێسکی تیمساحی، هیچ سودێکی بۆ ئێزدییە ستەملێکراوەکان نەبوو کەس بەهانایانەوە نەهات.
ئێزدییەکان قەرزداری کەس نین، بەڵکو دونیاو بەتایبەتیش دەوڵەتی عێراق و حکومەتی هەرێم قەرزداریانن، ئەو خەڵکە بریندارو هەلاهەلابووەی دەستی داعش، بەئیرادەی خۆیان، خەریکی بنیاتنانەوەو ڕێکخستنەوەی ژیانی خۆیانن، دەیانەوێ خۆیان برینی خۆیان ساڕێژبکەن، کەچی دەسەڵاتدارانی عێراق لەبری ئەوەی شەرم دایانبگرێ و بەئەرکی ئەخلاقی و سیاسی و قانونی خۆیان هەستن، لەبری ئەوەی دەوڵەتەکەیان بەمەرسومێکی کۆماری پارێزبەندییان بۆ دروستبکات و هاوکاری مادی ومەعنەوییان بکات. بەهەمان ئەو سوپایەی لەبەردەم چەکدارەکانیی داعشدا بەزی بوو پەلاماریان دەداتەوە! ئەمە چ مۆراڵێکە دەوڵەتدارانی عێراق دەیکەن ؟ بەچ روویەک ئەو سوپایە بۆگیانی ئێزدییەکان پڕچەک دەکەنەوە؟ کە لەبەردەم داعش هەڵاتن و چەک و جلیان فرێدا ؟! بەچ چاوو ڕوویەکەوە پەلاماری ئێزدییەکان دەدەن !
دەسەڵاتدارانی عێراق هێشتا زیاد لە داوای لێبوردنێک لەکورد قەرزدارن، کەچی نابەرپرسیارانە هێرش دەکەنەوە سەر شەنگال ! لەوەش بێشەرمانەتر لەیادی کیمیابارانکردنی گۆپتەپەو عەسکەردا؟ ئەوە ئاماژەیەکی تەواو مەترسیدارە!
خەڵکی کوردستان مافی خۆیەتی هێرشی سوپای عێراق بۆ سەر ئێزدییەکان، بە جێنۆسایدو درێژەپێدەری کۆمەڵکوژییەکەی شەنگال و جێگرەوەی داعش ناوبەرن، فەرماندەکانی هێزی پێشمەرگەش ئەگەر هەتا ئێستا شەرمیان لە هەڵاتن و بەگورگان خواردنی ئێزدیەکان نەکردووە، هەقە ئیدی شەرم بیانگرێ وبوێری ئەوەیان هەبێت کەهاوکاری سوپای عێراق نەکەن. ئەگەر ئامادەنین شەنگالییەکان و ئێزدییەکان بپارێزن و شەڕیان لەگەڵدا بکەن، هەق نییە ویژدان و ئەخلاقیان ڕێگەیان پێبدات لەگەڵ سوپای فشۆڵی عێراق هێرشبکەنە سەر ئێزدییەکان.
ئەوەی ئەرکی پێشمەرگەو سوپای عێراقە پاراستنی سەروماڵی هاوڵاتیانە نەک وەک سوپای سەدام وداعش نیشتمان وێران بکەن و هاوڵاتییەکانی بکوژن !
فەرماندەکانی پێشمەرگەو سوپای عێراق هەق نییە چیدی ببنە جێبەجێکاری ئەجێندای سیاسی حکومەت و پیاوانی بەرژەوەندی خوازی دەسەڵات و حیزبەکان کە هەتا ئێستا دژبە بەرژەوەندی خەڵکی عێراق و کوردستان سڵیان لەهیچ شەڕو پێشێلکارییەک نەکردووەتەوە.
پەلاماردانی ئێزدییەکانی شەنگال، ئابروی دەوڵەتی عێراق و دەسەڵاتدارانی هەرێمیش لەکەداردەکات، چونکە ئەوەی ئەرکی هەرێمی کوردستان و دەوڵەتی عێراقە بەهانەوەچونی ئێزدییەکانە کە داعش جێنۆسایدی کردوون. ئیدی چۆن دەبێت دەوڵەت کوشتارو مەینەتی زیاتریان بۆبهێنێت؟!
