ئەمرۆ یادی کیمیابارانی گۆپتەپەو عەسکەرە، بەڵام

مارس 03, 2022 Omer كیمیاباران, وتار 0

---

ئەمرۆ یادی کیمیابارانی گۆپتەپەو عەسکەرە، بەڵام ……..

٣٤ساڵە ئەو تاوانە گەورەیە رویداوە و ٣٠ ساڵە دەسەڵاتی بەعسیەکان لەکوردستان نەماوە، بەحساب ٣٠ ساڵە یادی شەهیدانی کیمیاباران و ئەنفالکراوان دەکرێتەوە! کەچی هێشتا ئەم یادکردنەوەیە هیچی لێشین نەبووە! بۆچی ؟ چونکە یادێکی راستەقینەی ئەو خەڵکە هەژارە نەکراوەتەوە، کە ئێواری ٣ی ئایاری ١٩٨٨ بەچەکی کیمیایی لێیاندراو بەکۆمەڵکوژران و ئەوانەی تریش رۆژانی دواتر بەزەبری هێزی جاش وسوپا کۆکرانەوەو بەکۆمەڵ لە بیابان کوژران..! ئەمرۆ لەم یادەدا تەنها روی قسەم لە حکومەت و دەسەڵاتداران نییە، بەڵکو لە خەڵکی کوردستان و تەنانەت خودی کەسوکاری شەهیدەکان و ئەنفالکراوەکانیشە.. بەهیوام دۆستانە قسەکانم وەربگرن و خراپ بۆم ئەژمارنەکەن. بەداخەوە نەخەڵکی کوردستان و نە دەسەڵاتدارانی هەرێمەکەشی لەئاست وەفاداری قوربانیە زۆرەکانی ئەو تاوانە گەورەیەی ئەنفال وکیمیاباراندا نەبوون، ئەوخەڵکەی بەهەوای سیاسیەکان هەڵدەپەڕی و بەبانگەشەی ئەوان شاگەشکە ببوو، هەر بەبڕیاری ئەوانیش چوونە لەیەکتری چونە سەنگەرەوە، پشتیان کردە مافی شەهیدەکان وئەنفالکراوەکان و چاویان لە ستەمکاری حزب و دەسەڵاتی کوردی پۆشی نە تۆمەتبارانیان راکێشایە بەردەم دادگا و نەبەعسیزمیشیان لە کوردستان ریشەکێشکرد، ئەوە دەرئەنجامەکەیەتی کە حکومەت و حزبی کوردی ریزەکانیان پڕکردووە لە جەلادو کۆنەبەعسی .. وێنەی هەرێمی کوردستانیان لە ئاستی دونیادا ناشرین کرد. لەهەرێمێکدا دەژین نەیاسای هەیەو نەخزمەتگوزاری !لەوەش بەئازارتر بێباکی کەسوکاری شەهیدەکان و ئەنفالکراوانە بۆ یادکردنەوەیەکی شایان بەو هەموو خەڵکە بێ گوناحەی کوژران و ئەنفالکران ئەو هەموو ژن ومنداڵ و پیرەمێردو پیرەژنەی هیچ دەسەڵاتێکیان نەبوو لە هەڵایسانی شەڕدا، دەوڵەت و حزبی کوردی خۆیان بڕیاردەری شەڕوئاشتی بوون.. کەچی باجەکەی هەر ئەوخەڵکە بێدەسەڵاتە دایان و بەرهەمەکەشی هەر ئەوانە خواردیان کەبەشێکن لەتاوانە گەورەکە. دەنا وەک حکومەت هیچی لەباردا نەبوو، خۆ خەڵکەکە دەیانتوانی وەفاداری کەسوکارەکەیان بن. خۆدەیانتوانی لەدەروازەی گوندەکانیان ناوی هەموو ئەنفالکراوەکانیان بنوسن. خۆ دەیانتوانی لەگەڵ دروستکردنی قوتابخانەو مزگەوتەکانیاندا هۆڵێک هەرهیچ نەبێت ژورێکیان هەبێت بۆ کۆکردنەوەی ناوو وێنەو هەرشتێکی لەپاش بەجێماویان .. ئەی بۆ نایکەن ؟ بۆنەیانکردووە ؟ چی تێدەچوو ؟ ئەی ئێستاچی تێدەچێت ؟ هەرهیچ نەبوایە وەک رێزلێنانێک هەر لەو موچەیەی شەهیدو ئەنفالکراوەکانیان بەبڕێکی زۆرکەم و بەکاری هەرەوەزی دەیانتوانی هەمووشتێک بکەن، هەرهیچ نەبێت هەرکەسەو بەتەنیشت دەرگای ماڵەکەیەوە ناوی ئەنفالکراوەکانی بنوسێت، دەتوانن لەدەروازەی گوندەکانیان ناوی هەموویان بنوسن و لەهەر گوندێکیش هۆڵێک یان ژورێک بۆ یادەوەرییان دروست بکەن . بەبروای من ئەوەبکەن باشترین یادکردنەوەیە هەم رۆحی مردوەکان ئاسودە دەکەن و هەم ناکەونە بەردەم تانەی نەوەی داهاتووو، ئەم کارە بۆخۆتان ئابرومەندی گوندەکانیشتان جوانترە. خۆزگە لەهەر گوندێک فەرحان سلێمانێک پەیدادەبوو، کەلەگوندەکەی خۆی ناوی هەموو ئەنفالکراوەکانی لەسەردیوارێک نوسیوە، یان وەک گوندەکانی بنەکەو قەشەقەو نەوجولیان دەکرد.
رۆحی شەهیدەکان شادو ریسوایی زیاتر بۆ تاوانباران

سه‌رنجه‌كان

---