دیدی ساڵح بێچاری شاعیر دەربارەی گەشتەکانی ئەنفالستان
دیدی ساڵح بێچاری شاعیر دەربارەی گەشتەکانی ئەنفالستان
پاشنیوەڕۆی دوێنێ پێنجشەممە (٢٠٢٢/٣/١٧) ئامادەی مەڕاسیمی بڵاوکردنەوە و واژۆکردنی کتێبی (گەشتەکانی ئەنفالستان) بووین..
هەڵبەت کتێبی ناوبراو بریتییە لە (٣) بەرگ بە قەبارەکانی (٨٦٨) و (٨٨٨) و (٧٧٠) لاپەڕە و -وەک نووسەر دەڵێ- لە هەر بەرگێکدا ٩٠ -٩٥ کەس دیداریان لەگەڵدا کراوە و هەندێک بەڵگەنامەش خراونەتە ڕوو.
ئەو مەراسیمە بۆ من یەکێک بوو لە ڕۆژ و ساتە زۆر تایبەت و بەهادارەکانی ژیانم، چونکە بەر لەمردن بینیم ڕەنج و ماندووبوون و قوربانیدان و شەونخونی زیاتر لە بیست ساڵی، یەکێک لە نزیکترین هاوڕێی تەمەنم، کاک (عومەر محەمەد) ی نووسەر و هونەرمەند بەهەند گیرا و ڕێزی لێ نرا. دەزگایەکی گەورە و گرانی وەک (دەزگای چاپ و پەخشی سەردەم) بە ئەمانەت و پێزانین و هەستکردن بە بەرپرسیارێتییەوە، -بەىی داواکردنی خودی نووسەر- کتێبی ناوبراویان بە شێواز و دیزاینێکی شایستە چاپ کردووە… هەر لە مەڕاسیمەکەشدا (خەڵاتی پێزانین)یان بەخشییە نووسەر.
بەدڵنیاییەوە لە توێی ئەو (٢٥٢٦) لاپەڕەیەدا، وێڕای نووسینەوە و تۆمارکردنی خەم و کۆژانی جینۆسایدی میللەتێکی بێکەس و پشتوپەنا؛ هاوکات کەرەستەی دەیان فیلم و توێژینەوە و لێکۆڵینەوەیان لەنێو خۆیاندا هەڵگرتووە.
salih bechar-parwen Aziz- Homar muhama
جێگەی پێزانین و دەست بەسینگەوە گرتنە کە دکتۆر مەنسوری تەیفوری بەشێوازێکی زۆر بابەتیانە و زانستیانە هەڵسەنگاندنی بۆ کتێبەکە و چیرۆک و دیدارەکان پێشکەش کرد.
هەر وەک لە پەراوێزی مەڕاسیمەکەدا وێڕای سوپاس و دەستخۆشی لە هاوڕێی دێرین و نووسەر و وەرگێڕ کاک (ئازاد بەرزنجی) -سەرۆكی دەزگای چاپ و پەخشی سەردەم- هاوکات پێم وت: “ئێستا کاک عومەر محەمەد خودی خۆی قوربانیی ئەنفالە!”. فۆتۆ: بەختیار قەرەداخی
