مەرگی تاقانەیەکی تر
تاقانە دەربازبوویەکی تری ئەنفال کۆچی دوایی کرد.
ژیان جگەلە ئازارو بریندارکردن هیچی تری بۆتۆ پێ نەبوو.
زۆرن دڵیان بۆ مەرگت دەسوتێ، بەڵام لەمێژە من بۆژیانت دەسوتێم .
تۆ بەسەر زیندوبوویت بەڵام گومان دەکەم هەر ژیابیت ! تۆ ئەمڕۆ نەمردوی بەڵکو لەمێژە سیستم و دەوڵەت و دەسەڵات ڕۆحی تۆیان کوشتووە .
فۆتۆ : هێمن عەبدوڵا
ڕۆژی ٢٥/١/٢٠١٣ لەگەڵ مامۆستا هێمن عەبدوڵا چوین بۆگوندی جەلەمۆرد، كاتێك سەرم بەماڵەكەیدا كرد لەناخەوە تەزوویەك سمیمی و هێزێک رایچەلەكاندم كاتێك بینیم لەسەر دەرگایەكی یەك تاكی رەنگ سەوزی كاڵەوە بوو ئەم دێڕە نوسرابوو: ٢٥ ساڵ تەنیایی، بەرەو هیواكان ٣/٥/١٩٨٨ رۆژی ئەنفالكردن “جەلەمۆرد) نەمزانی کێ ئەو دێرەی بۆ نوسی بوو چونکە بۆخۆی خوێندەواری نەبوو.
محمود عەلی مستەفا، لە تاوانی ئەنفالدا تاكە دەربازبووی خانەوادەكەیەتی و هەتا ئەمڕۆ ١١ی شوبات بەتاقی تەنیا لە خانویەكی خراپۆكە‌و لە ژورێكی ساردوسڕدا بێ كەس وتەنیا لەگوندی جەلەمۆرد دەژیا، ئەمرۆ بەیەکجاری دونیای ستەمکاری و دڵڕەقی بەجێهێشت .
دڵنیام شەوەكانی مام مەمحمودوخەونەكانی وەك هی مرۆڤی ئەم سەروەختە نەبوون، ئەوهەمیشە لە خەیاڵی كوروكچەكانیدابووە، كە ئەنفال بردونی و جارێكی تر نەگەڕانەوە، بەڵام ئەو هەرگیز نەیدەویست بروا بەوە بهێنێ كە کوڕوکچەکانی لەژیاندا نەماون، ئەو پیاوە بیری لەلای دە كەسی خانەوادەكەیەتی‌و كاتێكی زۆری پێویستە كاتێك ناوی منداڵە ئەنفالكراوەكانیم پرسی
– هەڵوەستەیەکی کردو تەماشای ناو هەردووک چاوەکانی کردم و پرسی بەریز پێت بلێم بان كور بە جیاو كچ بەجیا ؟
– من وام پێباشە بەپێی تەمەنیان پێمبڵێ وتی : لە گەورەوە بۆبچك ، ؟
– بەڵێ لەگەورەوە بۆبچوک
– محمەد وئەحمەدو هاجەرە، زلیخا، زارا، عەلی و لەتەیف و عەزیز و بەناز) ئەوە کوڕوکچەکانمن هاوسەرەكەشم ناوی سەبریە قادر عەبدالرحمنە
مام مەحمود هەناسەیەكی هەڵكێشاوبەچاوێكی پرلە پرسیارەوە سەیری كردم ماوەیەك لێم وردبووەوەو ئینجا و تی : دەسەر خێزانم ئەنفالكراون، هەر ئەو رۆیشتنە بوو، جارێكی تر نەمبینینەوە
وتی : من بۆخۆم لەوهەلەتانە بە دوای ئاژەڵەوە بووم لەبەرئەوە نەگیرام، شەوێك پێش گیرانی ئەوان چوینە دۆلێكی تر بۆبەیانیش نەمانتوانی بگەرێینەوە لای ماڵومنداڵمان چونكە بەرۆژ نەماندەتوانی خۆمان دەربخەین، منداڵەكانم لە چەمی بابەروشە خۆیان شاردبووەوە بەڵام جاش چاوساغیانكردبوون بەتایبەتی جاشێكی خەڵكی ئەم دێیەی خۆمان بوو ناوی بایز عەبدالرحمن بوو، ناویان نابوو شێخ بایز پێشلەشكری سوپا بوو پیاوێكی نالەباربوو، ئێستا ئەویش لەژیاندا نەماوەومردووە، ئەوبانگی كردبوون‌وفریوی دابوون وەرن خۆتان تەسلیم بكەن‌وهیچتان بۆ نابی ئاواگرتبوونی دابونیە دەست سەربازی حكومەت ئەنفالی كردن.مام مەمحمودیش هەرئەوەندە لەبارەی چارەنوسی ژن‌ومنداڵەكانی دەزانێ كە پیرەكان بۆیان باسكردبوو، هەتا تۆپزاوا ئاگایان لەیەكتری بوو، ئیتردوای جیاكردنەوەونەبینرانەوە .
من ٢٥ ساڵی رەبەقە بەتاقی تەنیام كەسم نەماوە، هیچ شەوێك نیە من بیر لەمنداڵەكانم و لێقەوماوی خۆمان نەكەمەوە كەدەچمە سەرجێگا هەرلەبیریاندام وەكو ئەورۆژەی كە منداڵەكانمیان ئەنفالكرد،
بەخەمێكی قورسەوە مام مەحمود گوتی: ئەم گوندە ٤٥٢ كەسی ئەنفالكراوە، وەكو هەڵەبجەمان لێهاتووە، ئێرە هەڵەبجەی دووهەمە.
ئەو پیاوە دڵشكاوەی جەلەمۆرد، شتێکی زۆر سەرنجبەری پێگوتم : کاکە کە تەماشای گلۆپەكانی بەری كۆیە دەكەم بەشەو دەدرەوشێنەوە، دەڵێم ئێمە ماڵمان وێرانبوو، كەچی ڕوناكیشمان پێ ڕەوانابینن.
ماڵئاوا مام مەحمود
