سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
هێشتا کارێکی ئەوتۆمان بۆ ئەنفال نەکردووە هەتا دەستی لێهەڵبگرین عومەر محەمەد
هێشتا کارێکی ئەوتۆمان بۆ ئەنفال نەکردووە هەتا دەستی لێهەڵبگرین
عومەر محەمەد – ٧ی ئایاری ٢٠١٩ – سلێمانی
رۆژی ٢/٥/ ٢٠١٩ دوای ئەوەی سیمنارێکم دەربارەی ئەنفال لە زانکۆی سۆران بۆ خوێندکارانی کۆلێژی ئاداب پێشکەش کرد، سیمنارەکەم دەربارەی کەمتەرخەمی چاپ وبڵاوکردنەوەو هەڵەو هەڵپەی نوسەران بوو، بەبەڵگە چەند هەڵەیەکی زۆر زەقی کوشندەم لە نێو چەند کتێبێکدا خستەڕو، ئەم هەوڵەی من ئەگەرچی زۆر دەستخۆشیان لێکردم بەڵام، لەبری دڵخۆشی مایەی نیگەرانی ئامادەبوان بوو، زۆریان پرسیان کە داخۆ ئەم هەموو بێباکی وکەم تەرخەمییەی ئێمە هۆکارەکەی چییە، هەر ئەو ڕۆژە بەدۆڵی ئالانەو دۆڵی بالیساندا گەرامەوە بۆسلێمانی، زۆر دەمێک بوو سەردانی بالیسانم نەکردبوو، ساڵانی پێشتر بە هاوکاری رێکخراوی وادی ئەڵمانی و ڕێکخراوی گرینکرۆز سەرپەرشتی چەند پرۆژەیەکی بچوکم بۆ خەڵکی ئەو دۆڵەکردبوو، لەهەموویان باشترو دڵگیرتر کردنەوەو دامەزراندنی کتێبخانەیەک و خولێکی فێربوونی کۆمپیتەر بوو کە بۆ گەنجەکانیان و خوێندکارەکانیان کردبوومانەوە، هاوکارییەکی ئەو رۆژنامەیەشمان کرد کە بۆ نوسینەوەو دۆکیومێنتکردنی ناوچەکە دەردەچوو، بەڵام کە بە دۆڵەکەدا تێپەڕیم توشی سەرسامی و نیگەرانی بووم، ئەو ناوچەیە گەشەیەکی زۆری کردبوو، تەنانەت گوندی تازە لەسەر رێگەکە دامەزرابوون و ڤییەلاو باخ و باخات، هاوکات زۆربوون و گەورە کردنی مزگەوتەکان، بەڵام ئەفسوس کاتێک لامدایە کتێبخانەکەی گوندی توتمە هەمان ئەو تابلۆیە بوو کە ساڵی ٢٠١٢ بۆخۆم بەکردم دابوو و بۆخۆشم بەهاوکاری گەنجەکانیان بە دیواری کتێبخانەکەدا هەڵمواسیبوو، هەرئەو تابلۆیە بوو، کە سەرمای زستان و هەتاوی هاوین گیانی تێدا نەهێشتبوو ! سەیرە ئەو خەڵکە دەتوانن باخ و باخات و مزگەوتی گەورە دروست بکەن، بەلام ناتوانن تەنها خانویەک بۆ کۆکردنەوەی وێنەی ئەنفالکراوەکانیان و شەهیدەکانی کیمیاباران دروست بکەن ؟ تەنانەت ناتوانن پارەی ئەو گۆڤارەش بەهەرەوەزی دابین بکەن کە مێژووی کیمیابارانی گوندەکەیان و ناوچەکەیان دەنوسیتتەو ؟! لە دۆڵی بالیسان دوو گۆڤار دەردەچوون بەناوی راز و خۆشناوەتی، بەڵام ئەفسوس بەبیانوی ئەوەی حکومەت هاوکارییان ناکات، ئێستا هیچیان دەرناچن، ئەم ساڵی رابورد یادەکەشیان نەکردەوە، بەپاساوی ئەوەی حکومەت نایکات .. ئەم بێباکی وکەمتەرخەمیانە هیچ پاساوێک قبوڵ ناکەن دەبوو خەڵکی ئەم دۆڵە هەرگیز ئەوەندە کەم تەرخەم نەبوونایە. ئێ باشە باحکومەت نەیکات ئەی خەڵک ئەی ڕۆشنبیرەکانی ؟ ئەی ئەوانەی دژە حکومەتن ؟ ئەوان بۆ دەستی بۆنابەن و هەرچی حکومەت پێی ناخۆشە بینوسن و دۆکێومێنتی بکەن ؟
ئەفسوس هێشتا کەسوکاری ئەو شەهیدانە هەر دەیانەوێ خەڵکی ترو حزب و حکومەت ببێتە زمانحاڵیان ؟! لە کاتێکدا ئەوان دەتوانن ببن بەزۆر شت، ببن بەفریاد ڕەسی خۆیان ببن بەقسەکەری خۆیان، ساڵانێکی زۆر ببوم بەگوێی ئەوان و ببووم بەزمانحاڵی ئەوان و دەنگی ئەوانم گەیاندە دونیا، ئەمریکاو ئەوروپا تەنانەت چەندین ئەوروپی و بیانیم بردە سێبەری ماڵەکانیان و گوێیان بۆگرتن، کەچی هەرگیز نەیانبیست و نەیانویست تێبگەن کە ئەوان دەبێت لەو پێستە بێنە دەرەوە.
لەناو ئەنفالکراواندا چیرۆکی سەیرو سەر سوڕهێنەر هەیە، لەم دۆڵی بالیسانە هەزاران چیرۆکی بیستراوی نەنوسراو هەیە، هەندێکیان کە ئێستاش لەژیاندا ماون لە دۆزەخ خراپتریان دیبوو، بۆیە هەرگیز ئەو ئازارانەیان بیرناچێتەوە بەڵام لەبیرنەچونەوەی ئازار بەکوێمان دەگەیەنێ ئەگەر هەوڵ بۆ شکاندنی نەدەین ؟ ئەگەر ئەو ئازارە توشی راچڵەکین و بەخۆداچونەوەمان نەکات و نەمانکات بەمرۆڤی بەهێز ؟ هەڵبەت مرۆڤی ئازارچەشتوتریشمان لەناو چیرۆکی جێنۆسایددا هەیە، هەندێکیان هەر تەواو سەرسوڕهێنەرن ئەوانە رێک لە ژێر تەرم و خوێن هاتبوونە دەرەوەو بە جل وبەرگ و جەستەی خوێناوی و رۆحی هەلاهەلاوە هاتبوونەوە ناومان ! وەلێ رێزیان نەگیراو هەر بەدڵشکاوی مانەوە. وا بەرەبەرە لێیان دەمرێ و بەدڵشکاوی ئەم دونیایە بەجێدەهێڵن. بەڵام منیش و ئەوانیش هێشتا سەرمان لەوە سوڕماوەو واقمان وڕماوە خەڵک بۆ لێمان تێناگەن خۆ هەر بەزمانی خۆیان دەدوێین؟ بۆ نازانن چیمان دەوێ ؟ هەر بەراست لە شکۆمەندی زیاتر چیمان دەوێ ؟!
هەندێکیش ڕەپ وڕاست پێم دەڵێن بەدوای کڵاوی بابردوکەوتووی، بۆ وازناهێنێ؟ منیش هەمووجارێک بە زەردەخەنەوە وەڵامیان دەدەمەوە کە لەراستیدا پڕە لەنیگەرانی و پێیاندەڵێم : هێشتا کارێکی ئەوتۆمان بۆ ئەنفال نەکردووە هەتا دەستی لێهەڵبگرین .
