ئیدی من وام ……………………………….. عومەر محەمەد
ئیدی من وام
عومەر محەمەد
هەتا توانیبێتم خۆم لەمرۆڤی خراپەکارو بوودەڵە پاراستووە، بەلام بەدەست خۆت نیە کە هەندێکجار هەر توش دەبیت. لە بەرنامەیەکدا بەناوی دادگای ئەنفال کە پەیمان حەیدەری بەرێوەی دەبات بانگهێشتکرام و کاتژمێر ١٠ی شەوی ٢٠ی نیسانی ٢٠٢١ دەستمان بە دیبەیتەکەمان کرد، بەداخەوە لەو لایڤ ودیبەیتەدا کۆمەڵێک کەس کۆمێنت و قسەی پوچیان نوسی بوو، کەمن لەکاتی قسەکردندا تەماشام نەکردبوون و پێشکەشکاریش هیچ پرسیارێکی لەمەڕ کۆمێنتەکان لێ نەکردم، ئەفسوس تاقانەیەکی ئەنفال وکەسێکی دیاری ئەنفال داوای کردبوو پرسیاری ئەوەم لێبکات کە رونکردنەوە بدەم لەسەر ئەو سێ موستەشارەی کە گیراون و گوایە من داکۆکیم لەو سێ موستەشارە کردووە، کە گیراون ! ئەگەرچی دەبوو هەرلەوێ وەڵام وەرگرێتەوە بەڵام پێشکەشکار پرسیارەکەی نەکردوو منیش نەمزانی بوو، بۆیە ناچارم بۆ مێژوو وەلامی ئەو تومەتە بدەمەوە بابزانین ئەمە چ کۆمێنت و قسەیەکی گەوجانەیە!؟
ئینجا با بەدرۆی بخەمەوە:
١- ئەوانەی گیرابوون هیچیان موستەشار نەبوون، بەڵکو دوانیان فەرماندەی سریەی جاش بوون. ئەوەی تریان ناناسم و تەنانەت ناویشی نازانم .. ئەمە درۆیەک.
٢- من تەنها یەکێک لەو کۆنەجاشانە دەناسم ئەویش لەبەرئەوەی ٧ ساڵێک پێشگرتنی دیدارم لەگەڵدا سازکردووەو لە ژمارە ٧ی گۆڤاری ئەنفالستان بڵاوم کردووەتەوە.
٣- پۆلیسی حکومەتی هەرێم دەتوانێت تۆمەتباری ئەنفال لە کوردستان دەستگیر بکات، بەڵام دادگاکانی هەرێمی کوردستان ناتوانن دادگاییان بکەن. لەبەرئەوەی ئەو دادگایە لە کوردستان نییە. ئەوەش نەزانی بوختانچییەکەیە
٤- نازانم کەی و چۆن و لە کوێ داکۆکیم لە جاش کردووە ؟ رونی نەکردووەتەوە لە دادگا ؟ بەنوسین ؟ لەکوێ ؟ ئێ گەوجێکیش دەزانێت کە موستەشار خۆیان دەسەڵاتدارن و چ پێویستیان بە داکۆکی من نییە. ئەوەندەی من بزانم تەنها یەکێک لەو سێ جاشە بەربووە بەڵام بەنامەی پشتیوانی من نا .
٥- دەسەڵاتداری کورد بەئاشکرا داڵدەی داون و حسابیش بۆمن و تۆناکات ئیتر باشترە شەڕی خۆت لەوێ بکەیت لەلای من کە دەسەڵاتی گرتن و بەردانیانم نییە.
٦- ئەوەی من گوتوومە و هەمیشە لەبەرنامەو دیبەیتەکانمدا دەیڵێمەوە ئەمەیە :
آ- جاش لەسەر ئەنفالیش نەبێت دەبوو لەسەر خیانەتی نیشتمانی دادگایی بکرێن.
ب- ئەگەر بریارە بگیرێن پێویستە هەموویان بگرێتەوە، نەک دوسێ کەس بەهۆی کیشەی سیاسی و شەخسییەوە بگرن بەناوی ئەنفالەوە.
ج- سەبارەت بەموچەو خانەنشینیشیان، گوتومە ئەوانەی لەژیاندا نەماون و کوژراون لەگەڵ برینی موچەی ژن و منداڵیان نیم، چونکە هیچ جاشێک بەفرمانی ژن و منداڵی نەبووەتە جاش، هەتا ئەوان باجەکەی بدەن، بەڵام نابێت لەناو لستی شەھیداندابن.
ئەوە پوختەی ڕای منە، ئەگەر دادپەروەریتان دەوێ من وای بەراست دەزانم ئەگەر کێشەی شەخسیشتان لەگەڵ جاشێکدا هەیە ئەوە کێشەی خۆتەو پەیوەندی بەمن و تەنانەت پەیوەندی بەدۆسێی ئەنفالیشەوە نییە. بەڵی دوبارەی دەکەمەوە کە من کێشەم لەگەڵ کەسیاندا نیە، داوای دادپەروەری دەکەم ئەوەی سەرەوە پوختەی رای منە ئیدی کەسێکی تر باوبژێکی هەیە پەیوەندەی بەمنەوە نییە.
هەمووکارێکی باش کۆمەڵێک گەمژەی بۆ پەیدادەبێت بیڕوخێنن و دژایەتی هەرکەسێک بکەن، کەسەرقاڵی کاری باشە. بەڵام من خۆم و کارەکانم بناسم بەگەمژەو بودەڵە ناروخێین . هەمیشە حسابم بۆ خراپەی ئەو کەسانەش کردووە کە چاکەم بۆیان زۆرەکەسوکاری شەهیدو ئەنفال پیرۆز نین، دەبێت بەڕێزبن، پێشئەوەی من ڕێزیان بگرم، دەبێت لەپێشەوە خۆیان ڕێزیان لە خۆیان و شەهیدەکانیان گرتبێ.تێبینی:لەبەر رێزی ئەنفالکراوەکانیان ناوی تۆمەتچییەکەم پاراستووە.
