سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
وتاری گۆڤاری ئەنفالستان بۆ یادی ٣٣ ساڵەی تاوانی ئەنفال – گەرمیان
وتاری گۆڤاری ئەنفالستان بۆ یادی ٣٣ ساڵەی تاوانی ئەنفال
کەسوکاری ئەنفالکراوانی ناوچەی گەرمیان
ئامادە بوانی بەرێز
بەبۆنەی یادی سی وسێ هەمین ساڵ تێپەڕین بەسەر تاوانی ئەنفالدا، وەفاداری دوپات دەکەینەوە، وەک بەکردەوەش سەلماندومانە، کە بۆ هەمیشە وەفاداری هەموو ئەو مرۆڤە بێ تاوانانە دەبین کە تەنها لەبەرئەوەی کورد بوون و لەزێدی خۆیاندا دەژیان، گێران وبێ سەروشوێن کران، یان گوللە باران کران. هاوکات وەفاداری کەسوکاریشیان دەبین و ئەمساڵیش پەیمان نوێ دەکەینەوە. کە لەسەر کاری خۆمان بەردەوام دەبین.
بۆخۆتان گەواهی دەدەن کە ئەنفالستان چەند ساڵێکە سەرقاڵی نوسینەوەی چیرۆکەکانی ئەنفال و کۆکردنەوەی دۆکیومێنتە دەربارەی ئەوە تاوانە، ئەمساڵ پانزەهەمین ژمارەی دەردەچێت، بەداخەوە ئەوە سی هەمین ژمارەیەتی کە بەهۆی قەیرانی داراییەوە چاپ ناکرێت، بەڵام ئەمەش نەیتوانیوە بمان وەستێنێت بەڵکو لەرێگەی ئۆنلاینەوە دەتوانین بڵاوی بکەینەوە. سوپاسی هەموو ئەو کەسانە دەکەین کە هاوکارمان بوون، جا ئەگەر بە بەخشینی بریکی زۆر کەمیش بووبێت لەداهاتی خۆی و لەگەڵماندا بەشداربووە لەنوسینەوەی ئەو مێژووە تراژیدییەدا. بێگومان ئەوە چەندە بۆئێمە مایەی هێزو خۆشحاڵی بووە، هێندەش بۆخۆیان شانازی و سەربەرزییە کە هاوکارو پشکدار بووە لەو پرۆژەیەدا.
ئامادە بوانی بەرێز
گۆڤار ئەنفالستان هەرچەندێکی کردبێت و چەندەش جێگەی ڕەزامەندیتان بووبێت، هێشتا هەر کەم بووە، ئەمەش نەک لەبەرئەوەی کاری خۆمان بەکەم بگرین، بەڵکو لەبەرئەوەی تاوانی ئەنفال گەلێک گەورەیەو تەنها گۆڤارێک و تەنانەت تەنها سەنتەرێکی لێکۆڵینەوەش لەوێزەی نایات.
بۆیە داواکارین هەریەک لەئاستی خۆیەوە هەوڵبدات، نەهێڵێت ئەنفال لەیاد بکرێت و یادەوەری ئەنفال ون ببێت، چونکە نەبوونی یادەوەری ون بوونی کوردە، تکایە با چیدی یادی ئەنفالکراوەکان لەم یادە یەک ساڵیانەدا کورت نەکرێتەوە، با هەموو رۆژێک وبگرە هەموو چرکە ساتێکمان، بەکارو کردەوەی باش و جوان یادیان بکەینەوە، یادی ئەنفال لە خۆشەویستی یەکتریدا بەزیندوویی دەمێنێتەوە، لە کلتورو باڵاو زمانی باڵاو رەفتاری باڵادا هێزی شوناسی کوردبوون بەزیندوویی دەمێنێتەوە. بەپێچەوانەوە هەر بێڕیزییەک بەیەکتری و نیشاندانی زەلیل بوونی کورد، ئاوکردنەوەیە بە ئاشی بەعسیزم و فاشیزم و توندرەوی داعشدا.
کەسوکاری ئەنفالکراوان ..
گۆڤاری ئەنفالستان لەم یادەشدا جەخت دەکاتەوەو دوبارەی دەکاتەوەو لەم دوبارەکردنەوانە ماندونابین بۆیە دیسانەوە بەدەنگی بڵند دەیڵێینەوەو داواکارین :
- کە پابەند بن بە رۆژی سەرنەبرینەوە لە یادی ئەنفالدا.
- بایادەکانی ئەنفال بەمیللی زیاتر بەمیللی بکرێن چونکە ئەنفال کۆستێکی نەتەوەیی ونیشتمانیە
- پابەند بن بە ئاشتی کۆمەڵایەتیەوە، دڵ لێکئێشاوەکان ئاشت بکەنەوە، دەستپێشخەری بکەن لە ئاشتکردنەوەی یەکتری و رۆحی ئەنفالکراوەکان ئاسودە بکەن.
- وێنەی ئەنفالکراوەکانتان بەماڵەکانتانەوە هەڵبواسن و کۆپی بدەنە مۆنۆمێنتەکانی ئەنفال و لەوێ بیانپارێزن.
- ناوی ئەنفالکراوەکانتان لەسەر تابلۆیەک بنوسن و بە دیواری دەرەوەی ماڵەکانتانەوە هەڵیانبواسن.
- بەهاوکاری دەستەجەمعی لەسەر تابلۆیەک ناوی هەموو ئەنفالکراوانی گوندەکانتان لەدەروازەی گوندەکانتان بنوسن بۆئەوەی ناویان ون نەبێت.
- هاوکارمان بن لە زانیاری پێدان دەربارەی ئەنفال، چیرۆکی ئەنفالکراوەکان و وێنەکانیان بنێرن بۆئەنفالستان و بۆ مێژوو بیان پارێزن.
- هاوکاری فیلمسازان بکەن بۆئەوەی زۆرترین فیلم لەسەر ئەنفال دروست بکرێت.
لەکۆتایدا دەڵێین :
شەرمە دەست وپەنجەی ئازایزانمان لە بیابانەکانی خواروی عێراق تێکەڵ بەلمی بیابان بووبن و ئێمەش لێرە دەست وپەنجەو دڵی یەکتری بشکێنین.
نەفرەت لە رۆژی ئەنفال و بەرزو بەرێز بمێنن گیانی قوربانیەکانی
بەرێزبێت یادی ڕاپەڕین، کە چۆکی گەورەترین دیکتاتۆری شکاند.
بەرێز بێت ٩ی نیسان کە رژێمی سەدامی دکتاتۆری تێدا ڕوخا.
گۆڤاری ئەنفالستان ٧/٤/٢٠٢١ – گەرمیان زینانە
