سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
مەرگی مرۆڤێکی مەزن
مەرگی مرۆڤێکی مەزن
بە ناوی ماڵپەڕو گۆڤاری ئەنفالستانەوە پرسەو سەرەخۆشی ئاراستەی خانەوادەی کۆچکردو حاجی خالید مام نادر دەکەین، کە بەداخەوە ئەمرۆ ١٣/٨/٢٠٢٠ کۆچی دوایی کرد.
ئەم پیاوە کە بە دکتۆر خالید ناسراوە لە کیمیابارانەکەی گوندی گۆپتەپە کە ئێوارەی ٣ی ئایاری ١٩٨٨ رویدا، لەکاتێکدا ناوچەکە لەناو گازی خنکێنەردا بوو ئەم ئازایانە بۆ هاوکاری برینداران و بەرکەوتوان خۆی گەیاندبووەوە سنورەکەو بەهانای خەڵکەوە چووەو چەندین کەسی لەمردن رزگارکردووە.
جێگەی ئاماژەیە کە لە لاپەڕە ١١ -١٢ی ژمارە ٧ی گۆڤاری ئەنفالستان هێمن عەبدوڵا دیداریکی لەگەڵدا سازداوەو رۆژی ٣/٥/٢٠١٠ بڵاوکراوەتەوە.
وەک رێزێک بۆ مەرگی ئەم پیاوە جارێکی تر لێرەدا دیدارەکەی بڵاودەکەینەوە
ئەو دكتۆرەی پێویستە لە گۆپتەپە پەیكەرێكی بۆ دروستبكرێت .. بەڵام..!!
دیداری هێمن عەبدوڵا
باشترینەكانی مرۆڤ ئەوكەسانەن كە بەبێ تەماح روحییەتێكی ئینسانی و نەتەوەییان هەبێ.
زۆرن ئەو مرۆڤانەی كە ژیانی خۆیان بۆ خزمەت كردنی نشتیمان و مرۆڤاییەتی تەرخانكردوە كە دەبوو زیاتر لەوەی هەیە رێزیان لێبگیرایە، لە كۆمەڵگەدا پێگەی تایبەتیان هەبوایە، زۆر بەداخەوە بۆ ئەوەی لە كوردستان ئەوەی داوای مردن بۆ كەسە ماندوخاوەن شەهامەتە كان ودڵسۆزەكان دەكرێ ئەوەندەیان بۆ بكرایە كاتێك لە ژیاندابوون بەسیان بوو ئیمە ریزگرتن لەمردوەكان، ڕێزی مرۆڤە زیندوەكانمان فەرامۆش كردوە..!!، لە كاتێكدا شەهیدان لە پێناوی شكۆی زیندوە كاندا گیانیان بەخشیوە.
لێرە دەمەوێ ئەوەبڵێم خۆشگوزەرانی زیندوەكان گیانی مردوەكان ئاسودە دەكات ,خالید مام نادر ئاغجلەری ناسراو بە دکتۆر خالید یەكێكە لەو مرۆڤە بە ئەمەك و دڵسۆزانەی كە ژیانی خۆی بۆ خەڵكی كیمیا لێدراوەكانی ناوچەی قەڵاسێوكە بەگشتی و هەردوو گوندی گۆپتەپەو عەسكەربەتایبەتی تەرخان كردبوو.
بەمەبەستی دیمانەیەکی رۆژنامەوانی بەسەرمان كردەوەو ئەویش ئامادەیی دەربری و بۆ ئەم ژمارەیەی گۆڤاری (ئەنفالستان) قسەی بۆكردین:
سەرەتا ووتی: بەداخەوە لەبەر ئەوەی نەهامەتی زۆرم دیوەو تەمەنێكی زۆریشم بەڕێكردوە زۆرێك لەڕوداوە كانم لەیادنەماوە .
بۆیە ستافی گۆڤاری ئەنفالستان بەپێویستمان زانی بۆڕیزلێنان لەگەورەی و پیرۆزی ئەوكارەی بۆ بەركەوتوانی چەكی كیمیاوی پێشكەشی كردوە ئەمساڵ گۆشەیەك بۆ گەورەی ئەومرۆڤە لەگۆڤارەكە تەرخان بكەین، بۆئەو كاروخزمەتانەی پێشكەشی كردوون. دكتۆر خالید سەرەتا باسی ئەوەیكرد دەنكوباس بڵاو بوو، کەوا ڕژیمی بەعس كیمیای لەگۆپتەپەداوە و زۆرێك لە خەڵكەكەی كوشتووە و ئەوەی تریش كە ڕزگاریان بووە هەندێكیان بەرەو كۆیە چون و هەندێكی تریان بۆ تەكیە و چەمچەماڵ هاتوون.
بۆ شەوی دواتر كە دەكاتە ٤/٥/١٩٨٨ زۆرێک لە خەڵك دەهاتن بۆلام كە دەیان زانی دكتۆرم و پێشتریش عیادەم هەبووە، زۆرێك لەو ماڵانەی كە خەڵكی كیمیایی لێدراوی تێدابوو دەیان گوت : دكتۆر گیان فریامان بكەوە خەڵكیكی زۆر لە گۆپتەپەوە هاتوون زۆر حاڵیان پەرێشانە، ماڵێك و دووماڵ نەبوو دەچوومە هەر شوێنێك (١٠) تا (١٢) كەسی لێ بوو هەندێكیان چاویان نەدە بیناو هەندێكیان تەنگە نەفەس بوون، منیش بە ئاشكرا نەمدەتوانی چارەسەر بۆ هەموویان بكەم بە زۆری شەو سەردانی ماڵەكانم دەكرد چونكە ئەگەر ڕژێم بەم كارەی بزانیایە ئەوا بێ سێ ودوو پەتی سێ دارەیان بۆ دەكردم بە دیاری..! بەڵام لەگەڵ ئەو هەموو مەترسییەی سەرژیانیشم من بیرم لەوە دەكردەوە كە خودا بۆ ئەم ڕۆژەی دروست كردووم تا هاوكاری ئەوخەڵكە لێقەوماوو بێ دەرەتانە بكەم. دكتۆر باسی لەوەشت كرد كە ئەو دەرزی و دەرمانەی بە كاری دەهێنا بۆ بریندارەكان لەكەركوكەوە دەی هێنان ؟
بەڵێ لەوێوە دەمهێنان و زوربەشی بەقەرز بوون لەگەڵ ئەوەی كە دەرمانەكانی بە شێوەیەكی ئاشكراو بێ ترس نە دەگەیشت، دەبوو بكرێنە ناو خواردن و جلوبەرگەوە خۆ ئەگەر پیاوانی بەعسی گۆڕ بەگۆڕ بیان زانیبایە هاوكاری لێقەوماوانی كیمیاباران دەكەم ئەوا ئێستا منیش وەك هەموو ئەو كەسانەی كە ئەنفالكران و بەعسیی و بیابانەكانی عەرعەرو نوگرەسەلمان نەبی كەس نەیزانی چۆن كۆمەڵكوژكران منیش وەک ئەوان بم.
ئەوەی زۆر مەبستمە ئاماژەی پێبكەین ئەوەیە كە دكتۆر خالید هەموو ئەو هاوكاریانەی كردونی بێبەرامبەربوون، بێئەوەی بپرسێ ئەو كەسە كێ یەو خزمی فڵان و خەڵكی كوێیە.!!
لە كۆتا یدا ( دكتۆرخالید) ئاماژەی بەوەش كرد كە لەم وڵاتەدا كاری باش هەركیز پاداشتی نییە ئێستاش كەئەم قسانە دەگیڕمەوە بۆ پاداشت و ناو بانگ نیە، ئەم كارەشم بۆ ئەوە نەكردوە كە رۆژێك لە رۆژان باسی بكەم، تەنها لەبەرخاتری گەورەیی پەروەردگارو ویژدانی خۆم هاوكاری ئەو خەڵكەم كردوە، بۆ پاداشتە كەشی تەنها لە خودای گەورە چاوەڕوانم نەك كەسێكی تر..!!
بەڵام خۆ هەقە ئەم کارەباشەی تۆش نەفەوتێ ؟
بەڵێ وایە وەكو دۆكۆمێتیش حەقە نەفەوتێ و بۆ مێژوو لەشوێنێكی وەك ئەم گۆڤارە چاپبكرێ و پارێزراوبێ.
سوپاس دکتۆر خالید
سوپاس بۆ ئێوەش کە بەسەرتان کردمەوە
