قوربانی بوون شانازی نییە
قوربانی بوون شانازی نییە
عومەر محەمەد
٢٦ی ئۆکتۆبەری ٢٠١٩ –سلێمانی
رۆچونم بەناو دۆسێی ئەنفالدا، ئەوەی پێبەخشیم هەمیشە لێبوردەو ناتوندوتیژو هاوکات بەرەنگاریش بم . هەمیشە بە تەنیشت نوسینەوەی چیرۆکی قوربانیەکانەوە، ئەوەم لێخواستوون کەسوکاری ئەنفال و قوربانیانی گازباران بە زەلیلی نەمێننەوەو هەستنەوە سەرپێ و خۆیان لەبەردەم کەسدا بەگچکە نەبینن. زۆریش بەوە برینداربووم، کە دیومە کوڕوکچی ئەنفالکراوێک، تاقانەیەکی لەئەنفال یان رزگاربووی ناو گۆڕی بەکۆمەڵ خۆی لە بەرپرسێکی گەندەڵ گچکە تر ببینێ و بەوێنەیەک شاگەشکە بێت، کە بەتەنیشت بەرپرسێکەوە دەیگرێت بێئەوەی بەرپرسەکە هیچ هەستێکی بۆ بارودۆخی ئەوان هەبێت لە قسەی پوچ زیاتر.
لە کۆنگرەی نەتەوەیی کورد کە لە رۆژانی ٢٤ و ٢٥ی ئەیلولی ٢٠١٦دا لە پارێزگای کەرکوک، لە شارۆچکەی قەرەهەنجیر، لە هۆڵی کتێبخانەی گشتی بەڕێوەچوو، لە دووەم رۆژی کۆنگرەدا دەرفەتی ئەوەم پێدرا پێنج خولەک قسە بکەم.. لەمیانەی ئەوقسەکانمدا رەخنەم لە شێوەی بەرێوەچوونی کۆنگرەکە گرت، کە دانیشتنیان بەجۆرێکە خۆیان لەسەروی ئامادەبوانەوە دەدیت، بەڵام بەدەم رەخنەکەمەوە پێکەنین و زەردەخەنەیان هاتێ و منیش نا ئومێدبووم .
لەمیانەی ئەو پێنج خولەکەدا کە بەڤیدیۆ پارێزراوە، یەکێک لە راسپاردەکانم بۆ کەنەکە دەربارەی نادییە موراد بوو، داوامکرد کۆنگرەی نەتەوەیی بەفریای نادییە موراد بکەون و نەهێڵن ببێتە ملیونێرو کچانی ئێزدی لەناو چادرەکانی کەمپەکان بەجێبهێڵێ و ببێتە نەگبەتترین خەلاتکراوی سەدەو بە خەڵاتی بوونە باڵوێز لە دەست بچێت و خێر بۆ خەڵک بداتەوەو بۆخۆشمان هیچ، ئەفسوس ! ترسەکەم لەجێگەی خۆیدا بوو، ئەوەتا لەکاتێکدا دونیا لەسەر ستەمکاری سوڵتان – ئەردۆگان هاتووەتە دەنگ، کەچی نادییە موراد هەر قوربانی و زەلیلەکەی کۆچۆیەو بێ قسەترین کوردی پایەدارە لەناو نەتەوەیەکگرتووەکان بەرانبەر ئەو هەموو ستەمەی لە کورد دەکرێت ! نادییە موراد زەقترین سومبلی ژنی کوردە بەدەست غەدری چەتەکانی دەستکردی ئەردۆگانەوە، بەڵام لاوازترین کەسایەتی نێودەوڵەتیشە، کە لەتوانایدا لاوازنەبێت و دەنگێکی بڵندی کورد بێت.
راستە ئیزدییەکان بریندارترین پێکهاتەی کوردن بەدەست داعشی تیرۆرستەوە، بەڵام رۆژئاوا فریادرەسی ئێزدییەکان بوو، پێش هەموو رێکخراوە نێودەوڵەتیەکان و ئەمرۆ دەیانتوانی گرنگترین ڕۆڵبگێرن لەبەرەنگاربوونەوەی ئەو هێرشانەی تورکیاو چەتە ئیسلامیە توندرەوەکان دەیکەنە سەر دانیشتوانەکەی رۆژئاوای کوردستان، ئەمرۆ رۆژی نادییە مورادە، کە دەتوانێ لە زۆربەمان زیاتر رۆڵی لە ریسواکردنی دەوڵەتی تورک و تیرۆردا هەبێت، کەچی دەبینین ئەو باڵوێزەی ئاشتی کە شوناسێکی کوردی هەیە بێدەنگترین و بێبەرهەمترین کارەکتەری کوردە.
نادییە دەتوانێ لەبری ئەوەی فاشلترین قوربانی بێت، چالاکترین کارەکتەری ڕاچەنیوبێت لە قوربانی بوونی خۆی، چونکە ئەو کۆدێکی گرنگتری لە ئێمەومانان بەدەستەوەیەو دەتوانێت، کەمپەینی گەورەی ناوخۆیی و نێودەوڵەتی بۆ بەهاناوەچوونی کوردەکان بەڕێوەبەرێت، بەلای کەمەوە لەسەر ئەو ژن ومنداڵانە بەدەنگ بێت کە وەک خۆی نەبنەوە بەدیل و کەنیزەکی دەستی چەتە تیرۆرستەکان.
لەراستیدا ئەمە هەرشکستی نادییە نیە، وەک قوربانییەک شکستی کۆنگرەی نەتەوەیی کوردیشە، کە لەم رۆژانەی رابوردوودا خۆشگوزەرانەکانی کورد لە هۆڵندا بەستیان و پۆستی شیرینیان لەبارەیەوە کرد. لەراستیدا ئەوە نادیە موراد نیە، کە خاوەنی هیچ داهێنانێک نییە، بەڵکو دونیابینیە باوەکەی کوردە، کە بە پێچەوانەی ئەو بەرخۆدانە مەزنەی رۆژئاوا دەیەوێت قوربانی بوون وەک شانازی ببینێت. بۆیە شانازی بەخەڵاتی باڵوێزبوونی نادییەوە دەکات کە لەلایەن رێکخراوێکەوە پێی بەخشراوە تەنها زەلیلی مرۆڤایەتی دەوێت نەک ئازایەتی و شکۆی بەرەنگاری. باشە هەڵگری خەلاتی نۆبڵی ئاشتی بۆچی باشە ئەگەر هاو زمان وهاونیشتمانی و هاوخوێنەکانت لەناو کڵپەی ئاگری جەنگ وفسفۆری سپیدا بسوتێن ؟ خەڵاتی باڵوێزی ئاشتیەکەمان (نادییە موراد) ئەگەر بەپیر هاواری موحەمەدی تەمەن ١٣ ساڵەوە نەچێت بوون ونەبوونی چ جیاوازییەکیان هەیە ؟
