پلکە عەیش ……………..توانا مصلح
پلکە عەیش
پلکە عەیش
توانا مصلح
بۆخۆی برینداری چەکی کیمیایی و دایکی شەهید یوسف کریم توتمەیی، ئەمڕۆ 19-1-2019 کۆچی دوایی کرد.
عائیشە حەمەدەمین عەلی، بەرکەوتووی چەکی کیمیاییە لە بۆمبارانی کیمیابارانی گوندی وەرێ ی ناوچەی خۆشناوەتی و شایەدحاڵی دادگایی کردنی تۆمەتبارانی دۆسێی ئەنفال بوو کە سەدام حوسێن وعەلی حەسەن مەجیدیش وەک تۆمەتبارێک لەقەفەزی دادگاکە دابوون.
ئەم ژنە چێرۆکێکی سەرنج ڕاکێش و درامیشی لەڕۆژی کیمیابارانی گوندی وەرێ دا هەیە.
ئەو کاتەی کیمیابارانی گوندی وەرێ کرا، کوڕەکەی پور عەیش کەلەمێژنەبوو هاوسەرگیری کردبوو بەناوی یوسف کریم حسێن دەکەوێتە بەر کاریگەری کیمیاباران و شەهید دەبێ، لەزاری شایەدحاڵەکانەوە بیستمان کە پلکە عەیش باوەشی لە کوڕە جوانەمەرگەکەی دابوو و گیانی تێدا نەمابوو، ئیتر ئەوانیش تەرمەکان کۆدەکەنەوەو دەیانخەنە لایەکەوە بۆ ئەوەی بەیانی بێنەوەو بەخاکیان بسپێرن، بەیانی کەدەگەڕێنەوە دەبینن پلکە عەیش کەبەمردوویی بەجێیان هێشتبوو هێشتا زیندووەو شەهید نەبووە، ئەو شەوە تابەیانی لەگەڵ لاشەی کوڕەکەیی و شەهیدانی تر لە گوندەکە تەنیا ماوەتەوە….
ئەو ژنە بەدەردەسەری و ناسۆریەکی زۆر تەریب لەگەڵ ئازارەکانی جەستەی ئەرکی بەخێوکردنی کچە تاقانەکەی کوڕی شەهیدی کەدوای شەهیدبوونی کوڕەکەی لەدایک دەبێ لەئەستۆدەگرێ
گوندی وەرێ لە 17-5-1988 لەلایەن ڕژێمی بەعسەوە کیمیاباران کرا؛ کەتیایدا 37 کەس شەهید و دەیانی تریش بریندار بوون.
تێبینی : ئەوکچەی مامۆستا توانا مصلح باسی دەکات ناوی رازییەو ئێستا هاوسەرگیری کردووەو هەر لەگوندی توتمە دەژی، جێگەی ئاماژەیە ئەوسا ماڵی یوسف بۆسەلامەتی خۆیان لە توتمە باریان کردبوو، چووبوونە گوندی وەرێ بەنیازی ئەوەی درێژە بەژیان بدەن، چونکە وەرێ سەربەناحێی بێتواتە بوو کەئەوسا ئەنوەربەگی سەرۆک جاش کە خەڵک بەمیر بانگیان دەکرد گوندی وەرێشی لەسنوری قەڵەم رەوی خۆی دانابوو، بەڵام بەو حاڵەشەوە خەڵکە هەژارەکەی وەرێ لەگورزی بەعس و چەکی قەدەغەکراوی نێودەوڵەتی قوتار نەبوون، لە ئێوارەی عارفەدا کە بۆسبەی چەژنی قوربان بوو، کەوتنە بەرهێرشی کیمیایی و ٣٦ کەس گیانیان لەدەستدا . -ئەنفالستان
