سهردێرهكان
سەرمایەی ڕەمزی (قوربانی)دان یادی ٣٥ ساڵەی جینۆسایدکردنی بارزانییەکان ………………………مەعروف حەسەن
سەرمایەی ڕەمزی (قوربانی)دان
لەکوێدا کەسووکاری بارزانییە جینۆسایدکراوەکان دەوڵەمەندن؟
یادی ٣٥ ساڵەی جینۆسایدکردنی بارزانییەکان ٣١.٧.١٩٨٣
مەعروف حەسەن
بەرەبەیانی ٣١ ی ٧، بەرەبەیانی وێستگەیەکی تری قوربانیدانی گەلی ئێمەیە بەگشتی و بارزانییەکان بەتایبەتی. لەدوای ئەو بەرەبەیانەوە ئیدی کەسوکاری جینۆسایدکراوان پێدەنێنە ناو تەپوتۆزی دونیای خودموختاری هێزە سیاسییە کوردەکانەوە. ئەو خودموختارییەی کە ماوە ڕاستەقینەکەی کەمتر لە ٢ ساڵی خایاند و ئیدی بووبە کابوسێکی سیاسی هار، کە ئێستاش هەناسە دەدات و دەژیت. کابوسی سیاسی، کە زمانحاڵ و منداڵی شەرعی شەڕی ناوخۆیە، بەرهەمەکەی فەزایەکی سیاسی قێزەون، سیستەمێکی ئابووری پڕ لە تاڵانی و بەیەکەوەبوونێکی کۆمەڵایەتی کۆمێدی ئاسابوو. لەناو ئەو فەزا سیاسی، سیستەمە ئابووری و بەیەکەوەبوونە کۆمەڵایەتییە سەیرەدا، کەسوکاری جینۆسایدکراوانی بارزانی، بە بوونی برینێکی قووڵ لەسەر جەستەیان، بەبوونی داڕمانێکی قووڵ لە دەروونیان، بەبوونی تێکشکانی گەورە لە پەیکەری کۆمەڵایەتییانەی خێزان و بەبوونی بۆشاییەکی مەزن لە دونیای سۆزدارییان، دێنە ناو ئەو دونیا بۆگەنەوە کە هێزە سیاسییە ڕزگارکەرەکانی کورد، بەرهەمیانهێناوە.
لێرەوە ڕۆژگارە هەرە ناشرینەکانی دونیای خۆبەڕیوەبەری ئێمە دەستپێدەکات و هێزە سیاسییە باڵادەستەکانی ئێمە دەکەونە دابەشکردنی ئەرز و ئاسمانی کوردستان بەسەر خۆیاندا. لێرەوە (قوربانیدان) تەفسیری جیاواز لەخۆدەگرێ و لەسەر بنەمای دونیای بەر لە مۆدێرنە خۆی بینادەکات و ئاراستە دەکات. تیوریزەکردنی چەمکی (قوربانیدان) هەموو مانا و ڕامانە سەردەمییەکان لەدەست دەدات و دەخزێتە ناو دونیابینی فەرماندە عەسکەرییەکان و بوارێک ناهێڵێتەوە بۆ تێگەیشتنە عەقڵییەکان لەخۆی. لەم سەرەتا ناشرینەوە بۆ تێگەیشتنێکی نەتەوەییانە و نیشتیمانییانە لە چەمکی (قوربانی)، ڕۆژگارە هەرە سەخت و ناخۆشەکانی کەسوکاری قوربانیانی جینۆسایکردنی بارزانییەکان لەدایکدەبێت. لەدایکبوونێک کە ژیان خالیدەکاتەوە لە مانا و لە لەززەت و بەردەوامیدەدات بەو شێوە ژیانە دژوار و سەختە، کە خواستی بەعس بوو خۆی سەرکردەی بووایە.
لەپاڵ هەموو ئەو ناشرینییە سیاسی و ئابوورییانەوە، ژنێکێ نەخوێندەوار بڕیاردەدات کە منداڵەکانی بەسواری پشتییەوە ببات بۆ قوتابخانە و خوێندنگایەکی خاڵی لە کتێب و لەهەر کەرەستەیەکی پێویست بۆ فێربوون. لە ساتە هەر دژوارەکانی شەڕی ناوخۆدا، ژنێکی نەخوێندەواری باوک و برا و هاوسەر جینۆسایدکراو، بڕیاری فرۆشتنی کەلوپەلەکانی ناو ماڵ دەدات، تا دەگا بە فرۆشتنی جل و بەرگیان، لەپێناو کڕینی کتێب و پێداویستی تایبەت بە خوێندن بۆ منداڵەکانیان. ئەوەی حوکمڕانی کوردی نەیتوانی دابینی بکات، ژنانی نەخوێندەوەر بە دەست و بازووی خۆیان دابینیانکرد.
سەرمایەی ڕەمزی قوربانیدانی کەسووکاری بارزانییە جینۆسایدکراوەکان، لە ئێستادا، کۆمەڵێک کچ و کوڕی خوێندەوار و ئاست بەرزن. کۆمەڵێک کچ و کوڕ لەبواری جیاجیادا، لە بڕوانامە و پلەی ئەکادیمی بەرزدا، لە بازرگان و دوکاندار و پێشمەرگەی دلێردا. هەموو ئەمانە لە دۆخێکدا بەدەستهاتوون، کە دۆخی پەراوێزخستن و بێماناکردنی قوربانیدان بووە. بۆیە لە ئێستادا ئێمە خاوەن سەرمایەیەکی مرۆیی و ڕەمزی گەورەین. ئەگەر نەگەیشتبین بە پلە بەرزەکانی دونیای ئیداری و حکومی کوردیدا، بەڵام ئاشنای دونیاین و لەنزیکەوە لەپاڵ دونیادا دەژین. ئەگەر نەمانتوانیبێت بە یاسا و ڕێسا باڵادەستەکان ماددە بەدەست بێنین، ئەوا خزاوینەتە ناو دڵ و هەناوی پێشکەوتنەکانی دونیاوە لە بواری هزر و بیرکردنەوە و ڕامان لە شتەکان.
ئێمە هیچمان نیە، جگە لە دایکێکی ماندوو و دەروونێکی بریندار و کتێبخانەیەکی بچووک، بەڵام پڕ لە حیکمەت، لە ژیاندا.
