ئەنفال دیدەیەکی تر(مام رەجەب) جەلەمۆردی کۆچی دوایی کرد
ئەنفال دیدەیەکی تر(مام رەجەب) جەلەمۆردی کۆچی دوایی کرد
مام رەجەبی گوندی جەلەمۆرد (٢٠١٨- ١٩٣٣) سالی ١٩٨٨ ( ژن ومنداڵەکان)ی هەموویان ئەنفالکران. ئەفسوس شەوی ٩-١٠/٧/٢٠١٨ لە گوندی جەلەمۆرد کۆچی دوایی کرد
رۆژی٢٥/١/ ٢٠١٣ لە ماڵەکەی خۆیدا دیدارم لەگەڵدا سازکرد، بەڵام ئەو تەواوتەمەنی هەڵكشاو شەکەت بوو، گوێیەكانی گران ببوون.
رۆژی ٣ی ئایاری ١٩٨٨ بە کیمیابارانی گوندی گۆپتە پەو عەسکەر قۆناغی چوارەمی ئەنفال دەستی پێکرد، رۆژی دواتر (٤ی ئایاری ١٩٨٨) هێرشی زەمینی گەیشتە دواگوندی ئاغجەلەرو ڕۆژانی دواتریش بناری خاڵخاڵان، مام رەجەب خۆی و ئەندامانی خانەوادەكەی بەنیازی خۆشاردنەوە لەگەڵ خەڵكی ئاوایی چوونە چەمی بابە ڕوشەو ماوەی دوو رۆژ لەوێ خۆیان شاردەوە، بەڵام هەر زوو بە چاوساغی جاشەكان سوپا گەیشتە سەریان و بەزەبری هێز لەوێش دەری پەراندن و خەڵکەکەش کەوتنە دەست چەتەکانی ئەنفال، خەڵکی جەلەمۆردو گوندەکانی دراوسێ کە وەک پەناگا هاتبوونە (بابە ڕوشە) پێكەوە دەستگیركران‌و پێکەوە ئەنفالكران.
ڕەجەب ساڵح مستەفاو خانەوادەكەی ( هاوسەرەكەی بەناوی نایلە شەریف) وكورەكانی (حسێن، جمعە)و كچكەشی (كافیە ) بەدەست‌و برد رەوانەی تۆپزاواكران‌و لەوێ لەیەکتری جیاكرانەوەو ئیدی جارێکی تر چاویان بەیەكتری نەكەوتەوە. رۆژی دوایی خۆی‌و نایلەی هاوسەری لەگەڵ خەڵکێکی زۆر رەوانەی نوگرەسەلمانكران‌و چوار مانگ لەوێ زیندانكران، كە ئازادیشكران بەخت یاوەریان نەبوو ماوەیەك دوای ئەوە هاوسەرەكەشی لە فیراقی كچ و كورەكانی نەخۆشكەوت‌و هەرزوو كۆچی دوایی كرد.
لەوە بەدوا مام رەجەب تەنیاكەوتەوەو لە ژورێكی تەنیاو ساردو سڕی لە قوڕ دروستکراوی بێ رایەخ و بێ رۆحدا بەتاقی تەنیا دەژیا ئەو پیرەمێردە ئەوەندە ماندوو بوو، تەنانەت ناوی كوڕەكانی بە زەحمەت بیر دەكەوتەوە، لەدیداری مام رەجەبدا لە ئینسانی بوونی خۆم تەریق بوومەوە، بەتایبەتی ئەو كاتەی پرسیارم لێدەكردو ناوی جمعەی كوڕی بیرچوو بوو، كاتێك دراوسێكەی هاوكاری كرد بە دەنگێكی بەرزتر وتی (جمعە) ئەوەندە بە سۆزەوە وتی : ئەی بە قوربانی ناوی دەمت بم، ئیمە كە هەربەسەر پێیانەوە بەدیاریەوە راوەستابووین لەناخەوە ئازارمان چەشت.
مام رەجەب ناوی کورەکانی و تەنانەت ساڵی ئەنفالکردنیانی بیرنەمابوو بەڵام ناوی جاشەکان و نوگرەسەلمانی بیرنەچوو بوو ! ئەوەی بیربوو كە جاش گرتویانن‌و ڕادەستی سوپایان كردون، هەر ئەو رۆژە گەیاندویانە تۆپزاوا، ئەوەشی لە بیرما بوو كە كورەكەی داوای لێكردووە بچێت لە سەربازەكان بپارێتەوە لەگەڵ ئەوان بێت، بەلام مام رەجەب، بە ئازارەوە دەلێت نەچووم لەبەرئەوەی دەمزانی بەقسەم ناكەن.
مام رەجەب دەلێت : هەرگیز نامەردی شێخ بایزی جاش‌وعەزابی نوگرەسەلمان‌و حەجاج‌و ئەو رۆژانەم لە بیر ناچێتەوە كە سەیارەی سەرداپۆشراویان بۆ هێناین‌و رەوانەی نوگرەسەلمانیان كردین، دەیگوت نوگرەسەلمان دۆزەخ بوو، دۆزەخ، حەجاجیش جەلاد بوو.. ئەوپیاوە هیلاكە تەنانەت بیری نەماوە چ سالێك ئەنفالكراوە كەچی ئەو عەزابەی نوگرەسەلمانی لە بیرمابوو، ناوی کورەکانی بیرچووبوو بەڵام ناوی جاشەکانی لەبیربوو!
