کێ یەکەم شەهیدی ئەنفالی گەرمیانە ؟ ڕاستکردنەوەی مێژوو . مەلا تەحسین گەرمیانی

نیسان 07, 2018 Omer ئه‌نفال, وتار لێدوان نووسین ناچالاککراوە لە کێ یەکەم شەهیدی ئەنفالی گەرمیانە ؟ ڕاستکردنەوەی مێژوو . مەلا تەحسین گەرمیانی

---

کێ یەکەم شەهیدی ئەنفالی گەرمیانە

تەنها راستکردنەوەی مێژووە .

مەلا تەحسین گەرمیانی

ڕۆژی ٧ی نیسانی ساڵی ١٩٨٨  شەهیدبوونی ئەسکەندەری برام و ماڵوێرانی بنەماڵەیەک

دوای تیکشکانی هیزی پێشمەرگە لەقۆناغەکانی، پەلاماری یەک ودووی ناوچەی دۆڵی جافایەتی و سەرگەڵ وبەرگەڵو داتریش بۆ قەرەداغ، کەتیایدا سەدان پێشمەرگەی گەرمیان ڕۆڵی گەورەوکاریگەریان تێدا بینی، وچەندین ڕۆڵەی قارەمانی تێدا شەهید بوون، ئەوەشی کەمایەوە بەپەلە گەڕانەوە بۆگەرمیان. هەرئەو ڕۆژە کەرتی ٣ی تیپی ٥١ی گەرمیان پڵنگ ئاسا خۆیان کرد بەنێو گوندی باوەکردا. پێشمەرگەکان گڕیان لێدەباری زۆربەیان لەگەڵ شەهید ئەسکەندەری برامدا خۆیان بەماڵدا کرد، زۆر هیلاک وماندوو دیاربوون، سەروقژ و ڕیشهاتوو، بەڵام توڕەو ڕقی تۆڵە لەنێودڵ ودەرونیاندا پەنگی خواردبووەوە، چونکه لەسەرگەڵو بەرگەڵو قارمانی وەک شەهید فەتحوڵایان لەدەستدابوو، شەهید ئەسکەندەری برام، پێی گوتم : مەلای برام هابگرە، ئەوە چەکی شەهید فەتحوڵایە، بیپارێزە، چونکه چەکی دەستی شەهید زۆر پێرۆز بوو، ویستمان خواردنیان بۆ ئامادەبکەین بەنیازی گوشتیان بۆبکەین، بەڵام ئەوان وتیان ئێمە زۆر پەلەمانەو تەنها نان وماست دەخۆین، دوژمن هاتووەو دەبێت هەرچی زووە فریا بکەوین. واتا دوای نزیکەی ۳ مانگ لەگەڕانەوەیان یەک کاتژمێر لەماڵەوە مانەوە بەپەلە بەرێکەوتن بۆکوێ ؟ بەرەوپیری مەرگ لەپێناوی ڕیبازی کۆمەڵەی ڕەنجدەران وخاک ونیشتیمان، کە دەڵێم کۆمەڵە چونکه ئەوسا کۆمەڵە بوون، واتای بەرخۆدان و گیانبازی .

لەڕۆژی ٧ی نیسان رژێم لەقۆڵی گوندی عەزیزبەگەوە پەلاماری ناوچەکەیداو هێرشی هێنایە سەرگوندی تاڵاوی ناحێی نەوجول، هێزەکەی کەرتی ٣ بەسەرپەرشتی وفەرماندەیی خودی شەهید ئەسکەندەری برام ڕوبەڕوی ئەو پەلامارەی سوپای بەعس بووەوە، هێزەکەی دووژمن لە گوندی تاڵاو وەدەرنراو زیانی زۆریشیان بەرکەوت، بەڵام تیکشکانی دووژمن بەگیان بەخشینی کاکه ئەسکەندەری برام تۆمارکرا بە شاهیدی هاوڕێکانی هەتا شەهید بوونی بەپێوە شەڕی مان ونەمانی کردووە، چونکە ئەوکەلەماڵ دەرچوو، قسەیەکی کردو گوتی: دوای شەهید بوونی هاوڕێکانم ئیتر عەیبە من لەژیاندابمێنم، مبەستمە بڵێم ئەو هەرلەماڵەوە بریاری خۆیدا کەدەیەوێت بچێتە ناوکاروانی سەروەرانەوە.

بەداخەوە سەرلەئێوارەی هەمان ڕۆژ ٧/٤/١٩٨٨ کاتژمێر ٦:٤٠ دەقیقە چووە ناوکاروانی پڕ لەسەروەری شەهیدانەوەو شەرەفی یەکەمین شەهیدی بەرگری لە بەرپەرچدانەوەی پەلاماری ئەنفالی سێ بەرکەرکەوت، بەڵام لای ئیمه شەهید هەر شەهیدە جا یەکەم شەهید بێت یان دواهەمین شەهید، تەنها خۆمان وەک کەسوکاری شەهیدان ئاگامان لەحاڵ و خەم ودەرونی سوتاوی یەکتر هەیەو من شانازی دەکەم بەهەر شەهیدێکی کوردستان و بەشەهیدی خۆمی دەزانم، کەسوکاری هەرشەهیدێکیش جێیشانازیمانن مەبەست لەم نوسینە تەنها، ڕاستکردنەوەی مێژووەیەک بوو.

جێگەی شانازیمانە کە بەشەهیدبوونی ئەسکەندەری برام بنەماڵەکەمان بووه خاوەنی ۳ شەهیدی قارەمان .

تیبینی/ ئەوەی کلاشینکوفەکەی پێیە شەهید ئەسکەندەرە لەگەڵ شەهید سەید نجم .

سه‌رنجه‌كان

---