مام (سابیر جەبار مەحمود) لەگوندی توكن : ئەوەی لە نوگرەسەلمان بینیمان وەیل بوو، وەلێ‌ ئەمانیش لەوان باشترنەبوون.

کانونی یەکەم 10, 2017 Omer ئه‌رشیف, ئه‌نفال لێدوان نووسین ناچالاککراوە لە مام (سابیر جەبار مەحمود) لەگوندی توكن : ئەوەی لە نوگرەسەلمان بینیمان وەیل بوو، وەلێ‌ ئەمانیش لەوان باشترنەبوون.

---

مام (سابیر جەبار مەحمود) لەگوندی توكن :
 ئەوەی لە نوگرەسەلمان بینیمان وەیل بوو، وەلێ‌ ئەمانیش لەوان باشترنەبوون.
 عومەرمەحەمەد
  ١٩/١/٢٠١٢ – گوندی توکن
 
 مام (سابیر جەبار مەحمود) بەرلەئەنفال دانیشتوی دێی (توكن)ی سەربەناحیەی سەرقەڵا بوون بۆخۆی لە نوگرەسەلمان ماوەی ٦مانگ دەستەبەسەر بووەو (٥) سەر خێزانی بێسەروشوێن بوون.
 هەر كە گەیشتینە ناو گوندەکە، لەبەر دەرگای مالی پیاوێك گیرساینەوە، بە ناوی محمدستار، ئێمە چاوڕوانی هاتن وفەرموو کردن بووین،کە کاک سیامەند لەسەر ئەوە نەوەستا بێن بەدەنگمانەوە ئەو بەپێی تێکەلاوی کۆمەڵایەتیان دەرگای حەوشەکەی ترازاندو چووە ناوەوەو بانگی کرد، ماڵەکە کێ لەماڵە، پیاوێک بەپیریەوە هات و ئەملاوئەولای یەکتریان ماچ کردو خوڵقیان کردین بۆ ژورەوە، هێشتا دانەنیشتبووین،چاووم چووە سەرپیرەمێردێك کە پشتی چەماوەی بەدیوارێکی قوڕینەوە دابوو، لە دورەوە دیاربوو كە ئازار چەشتووی ئەنفالە. ئەو پیاوە مام سابیری ئەنفال دیدە بوو گۆچانەكەی بەتەنیشت خۆیەوە هەڵپەسارد بوو. لەژمارەکانی پێشتریشدا کاک عاسی فرود ئەم مام سابیرەی دواندبوو، بەڵام لەبەرئەوەی هیچ وێنەیەکی لەگەڵ دیدارەکەیدا نەناردبوو، من نەمزانیبوو ئەم پیاوە قسەی بۆ گۆڤاری ئەنفالستان کردووە.
 من زوو داوای یارمەتیم لە مەجیلسەکە کردوو،چوومە لایەوەو دواندم، سەرباری هەڵكشانی تەمەنی‌و ئەوئازارەی لە ئەنفالەوە بۆی ماوەتەوە کەچی مام سابیر هێشتا هەر قسەخۆشبوو، گوتی : من باو باپیرم هەر لێرەبوون و هەر لەبنەرەتەوە خەڵكی ئەم گوندە بوون، بەبیری مام سابیر گوندەكەیان سێجار لەلایەن " زاڵمانەوە" سوتێنراوەو بەڵام چۆكیان دانەداوەو سەرلەنوێ‌ دروستیان كردووەتەوە، گوندی توكن لەپێشەوە ٨٠مال زیاتر بوون، بەڵام پێش ئەنفال هەڵكشاوە بۆ ١١٥ماڵ.
 بە زیندانەكانی قۆرەتووـ تۆپزاوادا تێپەریووەو لە پۆلێنكردندا براوە بۆ قەڵای نوگرە سەلمان‌و ماوەی شەش مانگی بەبرسێتی‌و زیندانی بەسەربردووە، هەرلە تۆپزاوا لە ژنەكەی‌و كورو كچەكانی جیاكراوەتەوەو ئیتر نەیبنینەوە، بەهەناسەیەكی ساردەوە ووتی : كورە برا من باس كام ئازارمت بۆ بكەم من ٦ کەسم لە كورو كچ‌و هاوسەرەكەشم رۆین‌وئەنفالكران كەس نەیزانی ئەرز قوتیانیدا یان ئاوبردنی.!! برا دەردی ئێمە گرانە . پێشتریش مام سابیر خۆزگەیەکی خواستبوو کاتێک قسەی بۆ عاسی فرود کردبوو وتبووی : خۆزگە سەد خۆزگە لەمناڵەكانم جیانەكرامایەوە خۆ هەر نەبی لەباوشی خۆمدا لە گۆرێكی بەكۆمەڵدا زیندە چاڵدەكران .

كوڕە گەورەكەی سابیر بەناوی قادر لەساڵی ٨٨ دا تەمەنی هێشتا ١٥ ساڵ بووە، لەرێگای خزمێكی نزیكی خۆیەوە شەو رزگاری دەبێ و دەڕوات‌، بەڵام بۆ بەیانیەکەی هەمان رۆژ هەموویان بەرشاڵاوی جەیش وجاش دەكەون .
ئەم پیرەمێردە سەرباری ئەو کۆستە گرانەش بەورەیەكی بەرزەوە قسەی بۆدەکردم، لەسەرەتاوە باسی خانەوادەکەی خۆی بۆکردم، بە پەنجەكانی دەستی كەوتە ژماردنی ناوی ئەنفالكراوەكانی ماڵی خۆیان ” جەواهێر حسن ” ئەوە خێزانم بوو، كەنیشكەكانیشم: شەوقی، شعریە، زەینەب، حمدیە، كورەكەشم هیدایەت) خۆشم هەرئەنفالكرام چوومە قۆرەتووتۆپزاوا لەوێ‌ هەموومانیان جیاكردەوەو منیان رەوانەی نوگرەسەلمان كرد بە زەردەخەنەیەکی تەنزئامێزەوە وتی : (ئەیەرەكو بەئەنفال حسابم بكەن، خۆشم ئەوە حەوت)
ئینجا هاتەوە سەر ژماردنی ئەنفالکراوەکانی تر لەبراوبرازا گوتی ‌:
حاجی سەمینی براشم بە (١١) سەر خێزانەوە گیران وهەموویان ئەنفالكران، تەنیا ئەوەی ماوە کورێکێتی بەناوی كەریم، ئەوە حاجی ستاری برام خۆی لەگەڵ هەردوو ژنەكەی‌و كوڕێکی‌و (٢) كچی‌و (٩) كوڕەزای‌و (٨) كچە زای گیران و هەموویان ئەنفال بوون.
مام سابیر لەبارەی ژیانی ڕابوردویانەوە دەڵێت :
پێش ئەنفال حاڵمان خۆشبوو، خاوەن ماڵ بوین، خاوەن مناڵ بوین خاوەن میوان ‌و دیوەخان بوین. بەڵام بەرلەئەنفالەکە کەوتینە تەنگانەوەو هەموو ڕۆژێک لەژێر هەرەشەدابووین، ئێمە لەگەڵ زرمەوناڵەی تۆپ و تەیارە راهاتبووین و بەو حاڵەشەوە هەڵمان دەکرد، کەچی حکومەت لێمان نەگەڕاو هەموو رۆژێک مەگەرچۆنها دەنا تۆپبارانمان هەرلەسەربوو، لەسەرقەڵاوە تۆپی تێدەگرتین یان فرۆکەی دەناردەسەرمان، ئیتر بای ئەنفال هەلی كردو هیچ نەما، هەموو شتمان برا نەمناڵ ، نەماڵ نەمیوان، نەخاوەن ماڵ هیچی نەماو هەمووی برا..لەساڵی كورد قڕاندا وەك گورگی برسی بەخوێنی مناڵانی كورد پەلامارمانیاندا لەکاتی ئەنفالدا کە دەڵێن رۆژی رەش ئاوابوو، كەس بەكەس نەبوو، تاكە هیوایەك كە مابووم دەمزانی قادری كوڕم نەجاتی بووە و هیچی تر، لەنوگرە سلمان لەمناڵەكانم جیاكرامەوە كچە بچوكەكەم(٨) ساڵ دەبوو ئەوانی ترم هەموویان سەرووی ١٠ ساڵ بوون دوای ٨ مانگ ئینجا من لە نوگرەسەلمان ئازاد كرام، بەڵام چ ئازاد بوونێێك ؟ بەخوا هەموو ڕۆژێكم مردنێكە بەتایبەتی كە سەردانی دائیرەیەكی حكومەتی هەرێم دەكەم نەك ڕێز لەكەسوكاری ئەنفال ناگرن، بگرە بڕێ‌ وتەی ساردووسڕو ناخۆشیشمان پێ‌ دەڵێن، ئێمەی دانیشتوانی لادێكانی گەرمیان گەر ڕێژەی نەخوێندەواریمان كەمبێ‌، گەر ئاستی وشیاریمان لە خوارووی خەڵكی ترەوە بێت جێی شانازیمانە، چونكە جاش نەبوین بەعسی نەبوین، خائین نەبوین سەردەمی بەعس ئێمە كتێبە عەرەبێكانی بەعسمان ئاگر دەدا، پێشمەرگەیەكی خۆمان دەبوو بە مامۆستای مناڵەكانمان لە گوندەكان ئێستا دەچین مناڵێك دامەزرێنین، دەڵێن: نابێت چونكە شەهادەی نیە، لەو لاشەوە كوڕی ئەنفالچی و ماستاوچی‌و موستەشارەكان دەكەن بە ئەفسەر و دادوەرمنیش مناڵەكانم ئەنفالكراوە‌و لەساڵی( ٩١ )ەوە كورد دەسەڵاتی وەدەستەو حكومەتە.
دوای سەد جار من دەلێم سەد تۆ بڵێ دوو سەدجار، گێرەو كێشە‌و سەردانی دائیرەو دادگا، بەسەدان هەزار دینارم خەرج كرد تا بیسەلمینم مناڵەكانم ئەنفال بوونە، هەرگوێیان لی نەدەگرتم، ناچار محامیم گرت، موچەی ئەنفالانە ١٥٠ هەزاردینارە من بە ٢٠٠ هەزار دینار محامیم گرت تا مناڵەكانم بۆ كرا بەئەنفال، لەكاتێكدا مناڵەكانم تا ئەنفالەكە تەلەبەی شۆڕش بوون، مامۆستاكەشیان كە مامۆستای شۆرش بوو ماوە سەد كەس خەڵكی لادێكەمان ماون كەچی سودی نەبوو، تامحامیم نەگرت ئەم ئیشەی من تەواو نەبوو؟ لە كۆتایدا دەڵێم خۆزگە سەد خۆزگە لە مناڵەكانم جیایانەكردمایەتەوە خۆهیچ نەبی لە باوشی خۆمدا لەگۆرێكی بەكۆمەڵدا زیندە چاڵ دكراین.

سه‌رنجه‌كان

---