سهردێرهكان
فەتاح ئەسوەد : بەڵێ منیش لەناو (وێنەکە)دام
فەتاح ئەسود : بەڵێ منیش لەناو (وێنەکە)دام
پاشئەوەی ڕۆژنامەنوس ئەسعەد جەباری لینکی بابەتەکەی بۆناردم، کە لە ماڵپەڕی کوردستانی نوێ و لە ژمارە (٧٢٦٩) ی رێکەوتی ١٧ی ئایاری ٢٠١٧ ی ڕۆژنامەی کوردستانی نوێ)شا بڵاوکراوەتەوە، سەرباری سەرقاڵییەکی زۆرم بەڵام کەزانیم دەربارەی ئەنفالە دەستم کرد بەخوێندنەوەی، نایشارمەوە کە لەگەڵ ئەوەشدا دڵخۆش بووم بە دۆزینەوەی کەسێکی ناو وێنەکە بەڵام نەمتوانی گومانەکەم بشارمەوە، بەڵکو جگەلەوەی لەگەڵ کاک ئەسعەد گفتوگۆمان کرد لەژێر پۆستیهاورێکەی فەتاح و هاوڕێیەکیشیدا، ئەم کۆمێنتەم نوسی ( لەگەڵ رێزێکی زۆرم بۆ کاک فەتاح وکاک ئەسعەد جەباری و ئێوەی خۆشەویستیش من هیشتا بەگومانم لەم وێنەیە چونکە منیش چیرۆکێکی تری ئەم وێنەیەم لەلایە هەڵبەتە هیچ گومانم لە راستگۆی کاک فەتاح نیە، بەڵام گومانم لە یادەوەری بەرێزی و شوێنی وێنەکە هەیە ..) خۆشبەختانە کاک فەتاح واتا ئەو کەسەی ناو وێنەکە بەکۆمێنتێک وەڵامی دامەوەو هەر ئەمشەو بەهۆی کۆمێنتەکەمەوە کەوتینە گفتوگۆ، خۆشحاڵ بووم کەوا تێگەیشتنێکی باشی هەبوو، بەبێ ئەوەی هیچ هەڵچونێک لە نێوانماندا روبدات گفتوگۆیەکی کورت وکراوەمان کرد، من گومانەکانم نەشاردەوەو ئەویش جەختی کردەوە و گوتی بەڵێ ئەوە وێنەی منداڵانی ئەنفالەو یەکێک لەومنداڵانەی ناو وێنەکە منم . بۆیە بەپێویستم زانی پاشئەوەی مۆڵەتم لە ڕۆژنامەنوس ئەسعەد جەباری وەرگرت، کۆی هەڵە رێنوسیەکانم راستکردەوە کە بەسەر (ماڵپەرو ڕۆژنامەی کوردستانی نوێ) دا رۆێشتبوون دەقی دیدارەکە لەماڵپەری ئەنفالستان بڵاوبکەینەوە . سەبارەت بەم وێنەیە لە ماڵپەرو گۆڤاری ئەنفالستاندا گومانەکەم نەشاردووەتەوەو وا بڵاوم کردووەتەوە کە ئەم وێنەیە پەیوەندی بەئەنفالەوە نیە و پێدەچێت هی ئاوارەیی ساڵی ١٩٩١ بێت بەڵام کە ئێستا کاک فەتاح پەیدا بووەو جەخت لەسەر ئەوە دەکاتەوە دوای وردبینی و بەدواداچوونی زیاتر ئەوسا دوا قسەو بیرورای خۆم دەخەمەوە رو بڵاوکردنەوەی ئەم دیدارەش پشتیوانیە لە کاک فەتاح وکاک ئەسعەد جەباری و وەک هەوڵێکی گرنگ بۆ ساغکردنەوەی راستی بەڵگەی تاوان دەیخەمەوە بەردیدەی خوێنەران . سوپاس بۆ کاک فەتاح کەوێنەیەکی منداڵی خۆی بەمەبەستی بەراورد کاری بۆ ناردم ..تکایە لەخوارەوە وێنەکە ببینە .
سەرئەنجام :
فۆتۆگرافەری ئێرانی جاسم غەسبانپور دەرکەوت و بەبەڵگەوە سەلماندی کە فەتاح بەهەڵەدا چووەو ئەو وێنەیە هی ئەنفال نییە،بەڵکو هی ئاوارەکانی ساڵی ١٩٨٨ی کوردەکانی عێراقە[1]و وێنەکان من گرتوومن، دوای ئەوەی رۆژنامەنوس ئەسعەد جەباریم لەم هەواڵە بڵاوکردەوەو وێنەی جاسم و فۆتۆکەشم بۆ نارد ئینجا ئەویش پۆزشێکی نوسی .
[1] (ئەوسا ئاوارەکانی هەڵەبجەو بەشێکی زۆری خەڵکی ناوچەکانی ئەنفالی یەک ئاوارەی ئێران ببوون)
عومەر محەمەد سەرنوسەری ماڵپەڕی ئەنفالستان .
ئەوەی خوارەوە دیمانەی نیوان ڕۆژنامەنوس ئەسعەد جەباری و فەتاح خاڵۆبازانیە درێژەی بابەت
